Tepetepet Manlapud Managbasa

Diad istrikton kabaliksan, wala ta so pandumaan ed baetan na saray termino ed Biblia ya ‘arum a karnero’ tan “baleg ya olop”?

On wala, anggaman agtayo nepeg a magmaliw ya alabas a maarti nipaakar ed panangusar na salita odino pan-aburidoay pakapanbaliktaran a pakausar ed sarayan salita.

Kabisado na maslak a Kristiano iray bersikulon pakaromogan tayo ed sarayan termino. Say sakey ed saya et say Juan 10:16. Ditan et inkuan nen Jesus: “Wala ni ray arum a carneroc, ya ag ira taga dia ed saya a panangipokokan: kaokolan ya awiten ko ra met, et dengelen da so voces ko; et magmaliw ira’n saksakey a polok, saksakey ya pastor.” Say sakey met a balikas, et say “baleg ya olop,” ya onaapireng ed Apocalipsis 7:9. Onia so nabasa tayo: “Kayari sarayan bengatla ninmengneng ak, tan nia, so sakey a baleg ya olop, a sikato so ag nayari a bilangen na too a nanlapu ed balang nacion tan amin na saray kailalakan, tan binaleybaley, tan salita, ya manalalagey irad arap na trono, tan ed arap na Cordero, a nankawes ira na kawekawes ya ampoti, tan wala so palmas ed saray kalimaan da.”

Konsideraen tayo pan ununa so Juan 10:16. Sioparay karnero? Bueno, maabig no tandaan tayo ya amin ed matoor a papatumbok nen Jesus so tutukoyen bilang karnero. Diad Lucas 12:32, NW, tinawag to iramay patumbok to ya onla’d tawen bilang say “melag a pulok.” Pulok na anto? Na saray karnero. Saray ‘karnero’ na “melag a pulok” so magmaliw a kabiangan na Panarian ed tawen. Anggaman ontan, wala niray arum, saramay midumaay ilalo ra, a momoriaen met nen Jesus bilang karnero.

Nanengneng tayo iya ed Juan kapitulo 10. Kayari impanaglawi nipaakar ed saray karnero a singa saray apostol a tinawag to nipaakar ed bilay ed tawen, inyarum ni nen Jesus so bersikulo 16: “Wala ni ray arum a carneroc, ya ag ira taga dia ed saya a panangipokokan: kaokolan ya awiten ko ra met.” Abayag lan atalosan na Tastasi nen Jehova a say tutukoyen nen Jesus ed sayan bersikulo et saray totoon walaay ilalo a manbilay ed dalin. Dakel a matoor ed sakbay na Kristianon panaon, a singa di Abraham, Sara, Noe, tan Malaquias, so walaan na ontan ya ilalo. Kanian manepeg a nipibilang tayora bilang kabiangan na ‘arum a karnero’ na Juan 10:16. Legan na Milenyo, saratan a matoor a tasi sakbay na Kristianon panaon so paolien tan kayari et makaaral tan mangawat ed si Kristo Jesus, a magmaliw ya ‘arum a karnero’ na Maong a Pastol.

Amta tayo met a lapud angangga lay inkalapagan a tawag parad mangatatawen a klase, minilyon so nagmaliw a tuan Kristianos. Saraya met so manepeg a tawagen ya ‘arum a karnero,’ lapud sikaray agkabiangan na “melag a pulok.” Imbes, iilaloan natan na arum a karnero so panbilay a tuloy-tuloy a mamaarap ed mangaraldalin a paraiso.

Natan, anto so nibaga nipaakar ed pakabidbiran ed say “baleg ya olop” ya asalambit ed Apocalipsis 7:9? Bueno, imanoey bersikulo 13 tan say tepet ya, “Siopara, tan iner so nanlapuan da?” Naromog tayo so ebat ed Apocalipsis 7:14: “Saraya sikara so nanlapu ed baleg ya irap.” Kanian, titibukolen na say “baleg ya olop” iramay pinmaway, odino akaliktar ed baleg a kairapan. Oniay kuan na bersikulo 17, sikaray “irawa’to ed saray sobol na danudanum na bilay” ed dalin.

Anggaman ontan, natalosan a pian makaliktar iraya ed onsasabin baleg a kairapan, nepeg a naurasan da laray kawekawes da diad dala na Kordero, a magmamaliw a tuan managdayew. Kanian, anggaman dedeskribien na Apocalipsis 7:9 iyan ulop kayari kairapan, nayarin niyaplika tayo so terminon “baleg ya olop” ed amin a walaay mangaraldalin ya ilalo a mangisasaklang na sagradon serbisyo natan ed si Jehova, sakbay na iterak na baleg a kairapan diad panangataki na saray nasyon ed palson relihyon.

Bilang sumaryo, nayarin natandaan tayo so ‘arum a karnero’ bilang say mas malaknab a termino, a laktipen to so amin ya aripen na Dios a walaay ilalon manbilay na ando lan ando ed dalin. Lalaktipen to so mas limitadon kategorya na kinmarneron totoo natan a natutugyop bilang “baleg ya olop” a walaay ilalon makabasil a mabilay ed manasingger lan baleg a kairapan. Maslak ed saramay matoor a Kristianon manbibilay natan so kabiangan na ‘arum a karnero’ tan sikaray kabiangan met na “baleg ya olop.”

Makana so pangulit ya, anggaman marakep so pamalinew ed sarayan detalye, agkaukolan ed siopaman a Kristiano ya alabas a maimano ed salita​—a natawag a kritiko ed salita. Impasakbay nen Pablo so nipaakar ed pigaran “mapangta” tan nalalanor ed “pisasang-sangan ed saray salita.” (1 Timoteo 6:4) No personal a kabat tayo so pandumaan na saray termino, marakep itan. Ingen, agtayo nepeg ya imanoen so arum, diad akinpaway odino diad akindalem tayo, diad pagmaliw a kritiko ed sakey ya agto amtay eksakton panangusar na saray termino ed Biblia.