Saray Nansumpal ed Gilead​—“Petepeteg a Misioneros!”

“ANTO so sakey a misionero?” Satan a tepet so impaarap na sakey ya editoryal a peryodiko ed ngalngali apalabas lan apatiran dekada. Inkatunongan na managsulat a saray tuan misionero so instrumento diad pakareporma ed sosyedad tan ekonomya. Balet, ed Simba, Marso 5, 1995, diad Jersey City Assembly Hall na Tastasi nen Jehova, sakey a duman tuloy ya ebat so indanedanet. Say okasyon? Say impan-graduar na koma-98 klase na Watchtower Bible School of Gilead​—sakey ya eskuelaan a mangibabaki na saray misionero ed amin a parti dalin!

Kayari manangilukas a kanta tan pikakasi, ampetapetang ya inabrasa nen Albert D. Schroeder na Mananguley ya Ulop so amin a 6,430 ya inmatendi. Diad manangilukas iran balikas to, malinlinew ya insalaysay nen Brother Schroeder no akin a saray nansumpal ed Gilead so duma manlapud arum niran manatawag ed inkasikaran-dilin misioneros. Inkuanto: “Say Biblia so manunan libron-panaralan parad Gilead.” Saray nan-graduar ed Gilead so ipapasal pian magmaliw a managbangat na Salitay Dios aliwan social worker. Kanian sikara sirin so nikadkaduman kualipikadon mangasikaso parad espiritual iran pankaukolan na totoo diad saray lawak ed biek-taew.

Saray ontumbok ya espiker so aningbat na pigara ed arum niran pamaakaran a naprupruebaan iray nansumpal ed Gilead ed pagmamaliw dan “petepeteg” a misionero. Si Charles Molohan so nansalita ed sikara ed teman “Mantultuloy a Manbunga na Maabig a Bunga bilang Misioneros.” Angipaarap ed saray salita nen apostol Pablo diad Colosas 1:9, 10, pinanonotan nen Brother Molohan iray nan-graduar a say apalabas a limay bulan da diad Gilead so akatulong ed sikaran ombaleg ed “suston pikakabat na Dios.” Saya so ontulong ed sikara pian mamawala na saray bunga ed duaran dalan: diad pangipatnag na saray bunga na espiritu na Dios tan diad panginabang na saray katuaan na Biblia ed arum.

Tinmumbok si Daniel Sydlik na Mananguley ya Ulop tekep na seryoson teman “Agmikokompromiso Diad Kapeligroay Bilay Yo.” Sinalambit to so tepet nen Jesus: “Anto kasi iter na too ya isandi to’d bilay to?” (Mateo 16:26) Inkuan nen Brother Sydlik: “Insalat na totoo so kamarerwa ra parad mas mainomay, mas anlemew a kabibilay.” Anggaman ontan, saramay walaan na mabilay a pananisia so agmakapikompromiso sano nipaarap ed saray subok tan pakasubsubokan. Ipapanengneng na saray salita nen Jesus a say sakey so nepeg a mabulos a “mangiter,” salanti, mansakripisyo, ta pian nagamoray kamarerwa, odino bilay na sakey. Sinagyat iray balon misionero ya iter da ed si Jehova so interon kamarerwa ra, say sankaabigan da, diad serbisyo to!

Insan, nansalita si William Van de Wall na Service Department Committee ed teman “Say Apostol Pablo​—Sakey ya Alimbawan Manepeg ya Aligen.” Insalaysay nen Brother Van de Wall: “Si Pablo so angiyuna ed misioneron kimey diad inmunan siglo.” Matukotukoy sirin, ya apatiran lawak so nipabitar ya angipanengnengan nen apostol Pablo na maabig ya alimbawa parad saray misionero natan: (1) say masimoon a paga tan aro nen Pablo ed totoo, (2) say inka-epektibo to diad ministeryo, (3) say inkaumildi to ya intalirak ton iyalibansay inkasikato, (4) say agnapanduaruwaan a talek to ed si Jehova.

“Pasokayan ed si Jehova diad Balon Asainmin Yo” so teman siningbat nen Lyman A. Swingle na Mananguley ya Ulop. Diad impangusar ed teksto ed saman ya agew, Salmo 139:16, binidbir nen Brother Swingle a bilang balon misionero, makaabet ira na saray problema ed saray asainmin, balet amta nen Jehova iray solusyon. “Onkerew na tulong ed sikato,” insimbawa to, “mitongtong ed sikato sano walaan kayo na problema. Panggunaetan a tebekey linawa to.”

Insan si John E. Barr na Mananguley ya Ulop so nansalita ed paulon “Say Pananisia Yo so Lalon Ombubulaslas.” (2 Tesalonica 1:3) Diad Lucas 17:1, nabasa tayo ditan ya inkuan nen Jesus: “Ag nayari ya ag onsabi so saray sengeg na kagapolan; ingen abagey la, so sata’y panlapuan da.” Arum so agapol nisesengeg ed saray personalidad na kaparan misionero. Balet pinaseseg nen Brother Barr iray misionero a nawalaan na say nakakaukolan a pananisian mamerdona. On, diad sayan konteksto ya akikasi iray babangatan nen Jesus: “Aroman mo so pananisia mi.” (Lucas 17:2-5) Say pananisia na misioneros so nasubok met diad panamegley na nanduruman pananguman ed organisasyon. “Kasin walaan tayo na say pananisian mangawat ed saraya,” intepet nen Brother Barr, “odino kasin saratan so magmaliw a singa-palandey iran babeng?”

Ontumbok et say simbawa na duaran instruktor na Gilead. Pinaseseg nen Jack Redford iray nansumpal a pansiansiaen so positibon awawey. Indalatdat to so nipaakar ed misioneran anaynan ed asainmin to lapud reaksion to ed impanlurey na kapara ton misioneros ed panagluto to. Anggaman ontan, papasakbayan itayo na Kasulatan sumpad pagmaliw a masenti. (Eclesiastes 7:9) “Nawalaan na suston awawey,” impaseseg to. “Magmaliw a manamerdona ed saray lingo tan saray ag-inkaayadyari na arum a walad kaliber-liber yo.”

Insan intepet nen U. V. Glass, say registrar ed Gilead: “Kasin akaparaan kayon sitatalonan onarap ed ‘panaon tan ag-iniloan a nagawa’”? (Eclesiastes 9:11) “Say istiloy-bilay tayo so lawas mansasalat,” kuan nen Brother Glass, “tan pigara’d saratan so makapasakit-ed-linawa ra.” Walaray misioneron ag-inilaloan a nidunget ed onkakapuy a bunigas, sakit, tan saray problema ed pamilya, ya amilit ed pigara a taynan iray asainmin da. “Antokaman itan ya ag-inilaloan a nagawa,” kuan nen Brother Glass, “kabat tayon amta itan nen Jehova tan mapaga ed satan. No manmatalek tayo ed sikato, kabat tayon sikatayoy manbiktorya!”

Sakey a paliwawan apauloan na “Nitalaga Parad Misioneron Serbisyo” so pantok ed kabuasan na serye na saray paliwawa. Impaarap nen Theodore Jaracz na Mananguley ya Ulop so tepet ya asalambit ed gapo, salanti, “Anto so sakey a misionero?” Diad ebat, siningbat toray kapitulo 13 tan 14 na Gawa nipaakar ed misioneron kimey nen Pablo tan Bernabe. Malinew, satan a kimey so niyapasakey, aliwan diad panagresolbi na saray problema ed sosyal, noagta ed ‘panangiyabawag na maong a balita.’ (Gawa 13:32) Intepet nen Brother Jaracz: “Agta mipakna kayo a si Pablo tan Bernabe so angidemostra no anton talagay pagmaliwan na sakey a misionero?” Say beteranon misionero a si Robert Tracy na Mexico so tinawag ed satan pian manginabang ed pigaran makapasagyat iran eksperiensia to bilang ebanghelisador.

Akarateng so programa ed kabuasan ed pantok to diad impangibunog nen Brother Schroeder ed saray diploma na 48 nansumpal. Aliketan iray dumerengel diad impakadngel ed kangaranan na 21 a daldalin ya akapabtangan na saray misionero: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, tan Venezuela.

Kayari panangugto, nantitipon lamet iray dumerengel tan nanggayagaan da so mabilabilay a panagaral na The Watchtower, ya inkondukta nen Robert P. Johnson na Service Department. Saray membro na koma-98 klase so inmebat ed saray tepet. Saya so tinumbokan na makapasagyat a serye na saray interbion indaulo na saray staff member na Gilead. Apaseseg a tuloy iray dumerengel legan ya ipapanabang na saray nansumpal iray eksperiensia ra ed lawak tan diad impangibalikas na saray liknaan da nipaakar ed saray pan-misioneron asainmin da.

Diad loob na anemira tan kapalduan taon, nipasen so Gilead diad saray pasilidad na Watchtower Society diad Wallkill, New York. Anggaman ontan, nen Abril 1995, say eskuelaan so inyalis ed balon Watchtower Educational Center diad Patterson, New York. Antoy liknaan na pamilyan Bethel ed Wallkill nipaakar ed sayan pananguman? Diad sayan impan-graduar et walaray pigaran ininterbion nanlapud Wallkill. Say makatenyeg iran balikas da so mangipatnag a saray estudyante ed Gilead so angitilak na magnayon ya impresyon ed sikara. Malinew, sarayan mabulos a lalaki tan bibii so petepeteg a misioneros​—mapaabeba, dilin-manangisakripisyo, mapagan tuloy nipaakar ed arum.

Legan a mansamposampot lay graduasyon, amin a wadman so matalek a say Eskuelaan na Gilead so mantultuloy a sitatalonan manggawa no antoy nagagawaan to la ed masulok a 50 taon​—mamapawala na petepeteg a misioneros!

[Kahon ed pahina 18]

Saray Istatistika na Klase:

Bilang na saray nirepresentan bansa: 8

Bilang na saray bansan angi-asainan: 21

Bilang na saray estudyante: 48

Promedyon edad: 32.72

Promedyon taon ed katuaan: 15.48

Promedyon taon ed sigpot-panaon a ministeryo: 10.91

[Litrato ed pahina 18]

Koma-98 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.