“Labas Ni Anggaay Kalakal”

“LAPUD saray bakal so onggagapo ed kaisipan na totoo, diad kaisipan na totoo et kaukolan tayon ipaalagey so pakdaal na kareenan.” (Charter of the UN Educational, Scientific, and Cultural Organization) Walad kanonotan iyan balikas, nen 1993 et masulok a 500 iran onsiano ya inmatendi ed komperensya ed panagbawas na armas so angunsidera ed betang na relihyon ed pamaalagey ed ontan a pakdaal.

Si Jonathan Granoff, a mangilalaman ed say Lawyers’ Alliance for World Security, so amegley ed komperensya. Inkuanto: “Say laknab na kaplesan a gutgutan na relihyon tan etniko so labas ni anggaay sibilisadon kondukta, posiblin labas ni anggaay kalakal.” Saray salita nen John Kenneth Galbraith so matukotukoy ya inaon legan na komperensya: “Dakel a totoo so papateyen ed ngaran na relihyon nen say amin a bakal tan natural iran desyang a pankasakeyen.”

Inkuan nen Dr. Seshagiri Rao: “Saray doktor so nepeg komon a manambal tan aliwan mangikayat na saray sakit. Saray relihyoson tradisyon so agnepeg komon a mangikayat na gulaan tan marawal ya agpanpapaknaan sumpad sakey tan sakey. Sikaray magmaliw komon a puersa na pikakareenan. Diad katuaan to balet, sikaray mabetbet a kinmana tan siansian onkakana bilang mangaapag-apag iran puersa.”

Pigaran taon ed apalabas, inkomento na Catholic Herald na London a say kareenan so nipaseguro “no saray iglesia natan so makapangideklara na sakey a nankakasakey a panbosol ed bakal.” Anggaman ontan, inyarum na peryodiko: “Amta tayon saya so agbalot nagawa.” Sakey a Katolikon madre so apaskar a mankomento: “Agaylan duma so pagmaliwan na mundo no sikatayon amin so ombangon ed sakey a kabuasan a determinadon agmangusar na saray armas lamet, . . . a singa Saray Tasi nen Jehova!”

[Picture Credit Line ed pahina 32]

Tom Haley/Sipa Press