Anto so Ipaparungtal na Salming?

ONNENGNENG ed sakey ya salming. Anto so nanenengneng mo? No maminsan, say maganon inengneng ed salming so mangipaparungtal ed itsuram na depekton makapabaing a maliket mon nakorehi sakbay a naimano itan na arum!

Say Biblia so mipadparan tuloy ed sakey ya salming. Makatulong itan ed sikatayon makagamor na simamatuan panmoria ed inkasikatayo, a mamuger ed sikatayo manlapud panisip na alablabas​—odino masyadon melag—​ed balor tayo ed imaton na Dios. (Mateo 10:29-31; Roma 12:3) Niarum ni, niparungtal na Biblia iray depekto ed saray salita, kagagawa, odino ed saray awawey tayon kaukolan a korehien. Sano saya so nagawa, kasin ibaliwalam so ipaparungtal na salming?

Ibabaga na managsulat na Biblia a si Santiago: “Ta no say siopaman onpasen a dumerengel na salita, et aliwan mananumpal, kapara to so sakey a too a nenengnengen to so sipur a lupa to ed sakey a salming. Ta nengnengen to so lupa to, insan onarawi, et tampol a nalingoanan to no anto so nengneng to a too.”​—Santiago 1:23, 24.

Diad pidumaan, dedeskribien nen Santiago so sananey nin too, sakey “ya manimano ed ayadyarin katunongan, say katunongan na pankanawnawa, tan mansiansiad tan.” (Santiago 1:25) Say Griegon salita a nipatalos a “manimano” so mankabaliksan na ontewek ed diking odino onyuko pian onnengneng. “Nagkalalo nen say basta pamasikmat,” kuan na Theological Dictionary of the New Testament. Say salita so mangipapatnag na maalwar a panagsukimat ed niamot a bengatla. “Wala so bengatlan importanti a pilalek a nanengneng na ombabantag, anggaman nayarin mairap parad sikaton nanengneng itan tan narandan so kabaliksan to a maminpinsan,” insulat na komentarista ed Biblia a si R. V. G. Tasker.

Sirin, kasin susukimaten moy inkasika ed salming na Salitay Dios tan insan ontulok ed kakaukolanen to? Itutuloy nen Santiago: “Sikato so bangta aliwa a maililingoan a dumerengel, mananumpal ingen ed gawa, sayan too mapalar naani ed gawa to.”​—Santiago 1:25.