Report na Saray Manangiyabawag na Panarian

Pakakarateng ed Nisulinek Iran Panaayaman ed Greenland

DIAD loob la na dakel a dekada et uusaren na Tastasi nen Jehova so Watchtower tan Awake! iran magasin ed panangipulong ed maong a balita. Sarayan palapagan so mangitatandoro ed kakabatan nen Jehova unong a nibalikas ed Salita to, say Biblia. Sikaray mantultuloy a manbabantay ed saray ebento ed mundo a nisisiglaot ed propesiya na Biblia, tan iyaaplika ray makatunongan a simbawa na Biblia ed kaplesan iran problema.​—Santiago 3:17.

Nen 1994, Saray Tasi ed Greenland so nanggawa na sakey a nikaduman sagpot pian iyopresi so The Watchtower tan Awake! ed dakel a totoo anggad posibli. Legan na tiagew, sikaray nanggawa na saray oksuyan a bisitaen so pigara ed saray sankasulinekan iran panaayaman ed Greenland. Sakey a grupo na manangiyabawag na Panarian so nanlayag ed onsulok nen 4,000 kilometro ed tagey na sagur a baybay anggad Qaanaaq (Thule), a sasabien so pigara ed sankaamianenan iran komunidad na globo. Say impanlayag da so binmayag na pitoran simba. Diad bukig a baybay, sakey a sanasawan Tasi so akasabi’d panaayaman ed Ittoqqortoormiit tan diad sankaunaan a pankanawnawa et sistematikon akobrean itan tekep na maong a balita.

Asasakbay ed saman a taon, legay bulan na Abril, 7,513 kopya na The Watchtower tan Awake! so nipalima ed saray totoo ed Greenland. Kabaliksan na satan a, diad promedyo, kada sakey ed 127 manangipalapag na Panarian et akapanpalima na 59 magasin​—1 a magasin ed kada 7 manaayam. Diad saman a bulan, say Awake! so angiparungtal na sakey a nantutumbokan iran artikulo diad silong na paulo’d apis a “Breast Cancer​—Every Woman’s Fear.” Sakey a Tasi, ya akapangipalimay 140 magasin, so angitilak na saray kopya na satan ya Awake! diad sakey a television reporter. Duaran agew ed saginonor, sakey a balita’d telebisyon a programa so angiparungtal ed saray artikulo ed breast cancer. Say reporter so angiparayag ed magasin diad telebisyon, a mangipapanengneng ed pigaran pahina legan a dadayewen toy kualidad na Greenlandiko a patalos. Impabitar to met so praktikal iran suhestion ya inter na Awake! bilang managalwar a panangasikaso’d bunigas.

Say Tasin akapangipalima ed saray magasin ed reporter so ininterbio ed parehon programay TV. Inebatan toray dakel a tepet nipaakar ed Tastasi nen Jehova tan nansalita nipaakar ed malaknab a panangibunog ed saray magasin ed saman a bulan. Kinomentoan to met so nipaakar ed praktikal a kakabatan a naromog ed Biblia tan inpabitar a say ontan a makatunongan a simbawa so makatulong ed sikatayon makatalona’d saray problema natan.

Say programa so kinapotan na sakey ya interbio ed presidenti na Greenlandic Cancer Society. Inkuan ton sikatoy agnin balot akanengneng na ontan kaabig tan makaibangat a materyal ed sayan tema ed lenguahe to. Insan sikatoy angimbita ed amin daramay interesado ed tema nipaakar ed breast cancer a manbasa ed saray artikuloy Awake! Imbaga ton wala so maabig a rason pian magmaliw a misalsalamat ed Tastasi nen Jehova parad inkamabulos dan onkiwas.

A singa diad Greenland, Saray Tasi nen Jehova ed interon mundo so mantutultuloy a mangipupulong ed maong a balita “ed amin a pinalsa ed leksab na tawen.” (Colosas 1:23; Gawa 1:8) Diad panamegley na literaturay Biblia, tekep na The Watchtower tan Awake!, tutulongan da so amin a klase na totoo a makatalona ed kaplesan-agew iran problema ontan met ed pangiter ed sikara na ilalo parad magmaong ya arapen.

[Mapa ed pahina 8]

(Parad aktual a format, nengnengen so publikasyon)

Qaanaaq (Thule)

Ittoqqortoormiit

Nuuk (Godthäb)