Report na Saray Manangiyabawag na Panarian

“Gawam so Kimey na Ebanghelisador”

ANTO so kabaliksan na pagmaliw a sakey ya ebanghelisador? Say salita so patalos na Griegon eu·ag·ge·li·stesʹ, a maapit a misiglaotan ed salitan eu·ag·geʹli·on, a mankabaliksay “maong a balita.” Kanian, say ebanghelisador et sakey a managpulong, odino mensahero, na maong a balita.

Amin a tuan Kristianos so ebanghelisador lapud iyaabawag da so maong a balita nipaakar ed Panarian na Dios. Matukotukoy, sinimbawa nen apostol Pablo si Timoteo a ‘gawaen so kimey na ebanghelisador.’ Kaukolan ya ipasen nen Timoteo iyan kimey a seryoso. Sikatoy pinaseseg nen Pablo a ‘pansiansiaey inkamalikas to ed amin a bengatla’ tan ‘sigpot a sumpaley ministeryo to.’​—2 Timoteo 4:5.

Bilang ebanghelisador et ipasen tayo met a seryoso so ministeryo tayo tan ‘pansiansiaey inkamalikas tayo,’ odino mansiansian alerto ya ipanabang so maong a balita ed kada pankanawnawa. Diad ontan et dakel so makakapikabat ed si Jehova tan saray sipan to kayarin apitongtongan ira na Tastasi nen Jehova ed impormal a paraan. Ontan so agawa ed si Seymore, sakey a laki ed Barbados.

Si Seymore so sakey a maestro ed publikon eskuelaan. Si Charles, sakey a part-time a maestro ed parehon eskuelaan tan sakey ed Tastasi nen Jehova, so sakey ya alerton ebanghelisador. Sikatoy sakey a sigpot-panaon a ministro, odino payunir, tan inanamot toy kada pankanawnawa pian ipanabang so maong a balita ed arum. Diad panamegley na impormal a panagtasi nen Charles et arengelan nen Seymore so mensahe na Panarian ed ununan pankanawnawa.

Ag-abayag et si Seymore met so determinadon mangipanabang ed saray katuaan na Biblia diad dakel no posibli. Kanian ginapoan toray impormal a pitotongtong ed saray totoo diad paneempleyoan to, nagkalalo la ed saray estudyante to. Anggaman diad arum a daldalin et nepeg ya ag-ibangat so relihyon ed publiko iran eskuelaan, sayan laki so pinabtangan a manbangat nipaakar ed relihyon tan moral. Balet natan et say dati iran panmoria nen Seymore ed sarayan pamaakaran so asalatan na balobalo nin agamoran ton pikakabat ed Biblia. Legan na recess, intongtong to ed saray eskuela to so nipaakar ed sipan na Dios a sakey a balon mundo tan say iilaloan ya andi-anggaan a bilay.

Panon so inkiwas na ugugaw? Dakel so angipanengneng na puron interes ed maong a balita na Panarian nen Jehova. Asabi panaon, inkondukta nen Seymore iray panagaral ed Biblia ed saray 13 ya estudyante to. Ontanlay interes da ya inyarunsa ray panaral na Biblia a mamidua ed sakey simba. Diad kaunoran et maslak ed sikara so inmatendi ed saray Kristianon miting diad lokal a Kingdom Hall na Tastasi nen Jehova. Anggad kaplesan, siamera ed sikara so nagmaliw a dedikado tan bautismadon Tastasi nen Jehova. Nipaakar ed si Seymore, sikato natan so sigpot a manusumpal ed ministeryo to diad panlilingkor bilang regular pioneer tan sakey a matatken ed sakey ed saray kongregasyon na Tastasi nen Jehova ed Barbados.

Saya so sakey lambengat ya alimbawa no panon a saray Tastasi nen Jehova ed interon mundo so ‘manggagawa ed kimey na saray ebanghelisador,’ a say sakey a paraan et diad panamegley na pibibiang ed impormal a panagtasi. Tutumboken da so simbawa na Biblia a naromog ed Colosas 4:5, 6, a kuanto: “Mantultuloy a manakar ed kakabatan ed saramay taga paway, a saliwen so makanawnawan panaon parad inkasikayo. Abuloyan a say pananalita yo so lawas a walaay inkamatamoy, ya atimplaay asin, pian naamtaan no panon so pangebat yo ed balang sakey.”