Kasin Nisalba Ka La?

SI Johnny so manedad na samplora sanen sikatoy inasinggeran na sakey a laki ed piryaan tan nantepet: “Inong, awaten mo ta si Jesu-Kristo bilang Katawan tan Manangisalbam?” Singano makapaderlaw itan a tepet parad si Johnny, ta sikatoy lawas manisia ed si Jesus. Kanian sikatoy inmebat, “Siempre aawaten ko.” “Idayew so Katawan!” so inyeyag na laki a nadngel na amin. “Sakey nin kamarerwa so nisalba parad Kristo!”

Kasin ontan kasimpli so kisalba? “Nisalba” ta si Jonny ed saman a bektan impangibaga to ed saraman a salita, ya anggan antokaman la ditan so gawaen to ed nakekeraan a kabiangay bilay to? Dakel a masimoon a totoo so onebat na on. Arum a relihyoson tract so mangibabagan isulat mo so petsan sika so “nisalba” ta pian natandaan mo itan.

Sakey a klerigo so nansulat a “bektaman a sika so walaay pananisia ed Kristo . . . say kapalaran na sakey so permanenti lan nigeter.” Ibabaga ton inkuan na Biblia a say kilalaban so depende ed saksakey tan maminpinsan a “gawa na pananisia, aliwan diad pantultuloy na pananisia.” Insulat na sananey a managsulat nipaakar ed relihyon: “Saya so asumpal a kimey. Agawa la parad sika . . . Say ‘pibabakal [mo] so angangga la.’ Say ‘kasalanan mo so nakal la.’” Balet anggan saray totoon sipepekder a kombensidon saya so tua so makakaimanon walay problema. Mabitar a dakel a totoon angibagaan a sikaray “nisalba” so agmanbibilay unong ed paraan ya ibabaga na Biblia. Sakey a kaslakan a salaysay et anganko ta talagan agda “inawat” si Kristo.

Kanian, antoy talagan kabaliksan na “pangawat” ed si Jesus? Kasin satan so maminpinsan a gawa na pananisia, odino satan ta so sakey a mantultuloy a paraan na panagbilay? Nepeg kasin say sisiaen tayo so ontanlan kabisbeg pian mamakiwas ed sikatayo? Talaga tan naawat tayo iray gungguna na bagat nen Jesus ya anggapoy katekep a responsabilidad a sikatoy tumboken?

Kaliktan na dakel a totoo iray bendisyon balet aliwan say responsabilidad ya itutumbok tan itutulok ed si Jesus. Diad tua, say salitan “ontulok” so mabetbet a mamapaaburido ed sikara. Ingen inkuan nen Jesus: “Gala magmaliw kan patumbok ko.” (Lucas 18:18-23) Tan ibabaga na Biblia: “Saraman so ag-ontutulok ed maong a balita nipaakar ed Katawan tayon Jesus . . . so managmak na panangukom a dusa ya andi-anggaan a kadederal.”​—2 Tesalonica 1:8, 9; Mateo 10:38; 16:24.

Dakel a bengatla so ibabaga na Biblia a mamapalesa na seryoson tepetepet ed nibabangat la nipaakar ed kilalaban. No labay mon seguroen no anton talaga so ibabaga na Biblia ed sayan tema, naromog mon nagkalautlan makapainteres iray onggendan a pahina. Ilukas moy Bibliam, tan basaen iray nisitan teksto pian nengnengen no antoy imbangat nen Jesus tan saray apostol to nipaakar ed sayan importantin pamaakaran.