Report na Saray Manangiyabawag na Panarian

“Onsisinag Bilang Liwawa diad Mundo”

PROMINENTI so Tastasi nen Jehova bilang nikadkaduma tan mabetbet a mauges so kipapalapag da lapud agda pangaawat na panangiyalis na dala. Anggaman ontan, say talindeg da so mabiskeg a nibased Biblia. Ipapanengneng ton kokondenaen na Dios so lingon panangusar ed dala, ta say dala so mabli ed imaton to. (Genesis 9:3, 4; Levitico 17:14) Bilang resulta na panangusisa ed Kasulatan ed sayan tema, nibaga na Tastasi nen Jehova a say panangidirehi na Biblia ya ‘onarawi manlapud dala’ so mabitabitar a mangilalaktip ed modernon agamil a panangiyalis na dala.​—Gawa 15:19, 20, 28, 29.

Diad agano niran taon saray membro na medikal a komunidad, ontan met ed saray korte na pigaran bansa, so asabin anuporta ed Tastasi nen Jehova ed sayan isyu. Alimbawa, diad Denmark sakey a kalangweran ya ina a mikabat ed panmoria na Biblia nipaakar ed dala so inatey lapud aksidenti ed luluganan. Lapud agto awaten so panangiyalis na dala, sinugsugan na dodoktor to so sibubusol a kampanya na media sumpad Tastasi nen Jehova a nambayag na sakey bulan.

Kinerew na atateng na kalangweran a bii so panagsukimat, tan nen Abril 1994 sakey a desisyon so inyanunsyo na Commission of Patients’ Complaints na Denmark. Impabitar na saya a say pasyenti so inatey, aliwan lapud agto impangawat ed panangiyalis na dala, noagta lapud aliwan panagtambal. Say desisyon so nibased saray imbestigasyon na Board of Forensic Medicine tan saray autoridad ed bunigas. Diad sakey a sirkular a parad amin a pasilidad na health-care diad Denmark, inkuan na say National Board of Health ya obligado iray doktor ya ikdan na sankaabigan a nausar a kasalat a panagtambal iray Tastasi nen Jehova, ya ikokonsidera so agda pangawat ed panangiyalis na dala.

Sakey nin kaso so manasaglawi ed si Dan, sakey a 15-taon a Tasi ya inatey lapud leukemia. Diad sayan kaso saray doktor nen Dan so nanrespeto ed mapekder a desisyon ton agpanlabay ed panangiyalis na dala. Saya so nansumpal ed malaknab a kampanya na saray peryodista a ditan et tinetel na media iray doktor ed impatey nen Dan. Anggaman ontan, dakel so ag-inmabobon ed negatibon propaganda.

Alimbawa, say ulon-managbangat na eskuelaan a panaaralan nen Dan so presenti ed Kingdom Hall ed paliwawa na ponpon. Nikelawan ed agmakatunongan a panangibalita ed impatey nen Dan. Kayari to et tinmepet ed katrabahoan ton Tasi nipaakar ed Tastasi nen Jehova, inawat to so sakey a kopya na video a Jehovah’s Witnesses​—The Organization Behind the Name. Ontanlay impanagyat na video ed sikato ya inyuksoy toy pakabantay na satan na amin a managbangat diad eskuelaan. Diad saginonor, say video so nipabantay ed amin ya estudyante, sansakey a klase ed kada palabas.

Say minister of health ed Denmark so agmet inmabobon ed mauges ya imbalita ya inawat na saray doktor nen Dan. Inkuanto a susto so ginawa na saray doktor diad impanrespeto ra ed susto’d desisyon tan niletneg a maong a pananisia nen Dan.

Walaray minilyon a mangiyaabawag na Panarian ya ontutulok ed saray ganggan na Dios. Lapud katutulok da, sikaray naiimanon, “onsisinag bilang liwawa diad mundo.”​—Filipos 2:12, 15.