Isindag Mo so Liwawam!

SINMABIN siansia so panaon parad masiken a makanengneng ed nisipan a Mesias? Diad panamegley na madibinon panangiparungtal et naamtaan nen Simeon ya “agto nanengneng so patey sakbay a nanengneng to so Kristo nen Jehova.” (Lucas 2:26) Balet alay liket iman sanen linmoob si Simeon ed templo tan inyan nen Maria tan Jose so kapangianak a Jesus ed taklay to! Indayew to so Dios, diad impangibagan: “Natan, Soberanon Katawan, abuloyan mon bulos so aripen mo ed kareenan . . . lapud saray matak so akanengneng ed paraan na panangisalbam . . . sakey a liwawa parad panangekal na sakbong manlapud saray nasyon tan sakey a gloria ed saray totoom ya Israel.”​—Lucas 2:27-32; ikompara so Isaias 42:1-6.

Si Jesus, manlapud inkabautismo to ed edad a 30 ya anggad patey to, so apaneknekan a sakey a “liwawa” ed mundo. Diad antoran dalan? Insindag to so espiritual a liwawa diad impangipulong ed Panarian na Dios tan ed saray gagala To. Inwalwal to met iray palson relihyoson bangat tan impabidbir toray kimey a kien na kabilungetan. (Mateo 15:3-9; Galacia 5:19-21) Kanian, manepeg labat a nibaga nen Jesus a: “Siak so liwawa na mundo.”​—Juan 8:12.

Inatey si Jesus diad taon 33 K.P. Narep kasi so liwawa? Maseguron andi! Legan a wadiad dalin ni, imbaga nen Jesus ed saray babangatan to: “Onsinag komon so liwawa yo ed arapan na totoo.” (Mateo 5:16) Diad ontan, kayari impatey nen Jesus, impansiansia na saray patumbok to ya isinag so liwawa.

Bilang pangalig ed si Jesus, isisindag na Kristianos natan so liwawa nen Jehova diad pibibiang ed kimey na panagpulong. Sikara so “mantultuloy a manakar a bilang ananak na liwawa,” a papaneknekan da so inkasikara bilang onsisinag iran alimbawa ed Kristianon panagbilay.​—Efeso 5:8.