Say Pananisia so Anagdag ed Sikaton Onkiwas
SANEN ginanggan nen Jehova si Moises ya idaulo so nasyon ya Israel ed pangibulos ed inkaaripen ed saray Ehipsio, diad gapo et akikasi si Moises, a nankuan: “Itepel moak, Jehova, balet aliwa ak a sakey a marlas a managsalita, anggan nanlapulad nen karuman nisay sakbay na saya nisay nanlapud kinatongtong mo so aripen mo, lapud siak so matantan ya impansangi tan matantan ed panagsalita.” (Exodo 4:10) On, ag-alikna nen Moises a sikato so kualipikado parad onman ya ambelat ya asainmin.
Ontan met natan, dakel ya ariripen nen Jehova so makakalikna no maminsan ya agda nayarian a sumpalen iray kimey ya impabtang ed sikara. Alimbawa, sakey a Kristianon manangasikason manngaran na Theodore so nankuan: “Diad amin a pagagawa ed siak nen Jehova, say lawak a ministeryo so sankairapan. Sanen siak so malangwer ni, tampol kon asinggeray puerta, kunwari et itelpek so doorbell, tan mankalkalna ya onalis, a manpirawat ya anggapo komon so akadngel odino akanengneng ed siak. Sanen tinmatken ak la, tinundaan ko la itan, balet naaalipanesan ak sano nonoten koy pankabkaabungan. Anggan natan, naaalipanesan ak sakbay a mamaarap ed ministeryo, balet ta ontutuloy ak met lanlamang.”
Anto so amakayari ed si Moises tan ed modernon agew a Tastasi a singa si Theodore a makaarap ed ontan iran itatakot? Oneebat so Biblia: “Diad pananisia et tinaynan to [nen Moises] so Ehipto, . . . ta nantultuloy ya agnagiing a kuanmono nanenengneng imay Sakey ya agnanengneng.”—Hebreos 11:27.
On, diad panamegley na pananisia ed si Jehova, atalonaan nen Moises so liknaan na inkaandi-pakayari tan asumpal toray impabtang ed sikaton responsabilidad bilang ukom, propeta, nasyonal a lider, manamegley na Ganggan a sipanan, komander, manag-awaran, tan managsulat na Biblia.
Mipadpara, sano sikatayo so walaan na pananisia a singa ed si Moises, manakar tayo a singano ‘nanenengneng imay Sakey ya agnanengneng.’ Say ontan a pananisia so mangiiter na biskeg na linawa a nasakbat tayoray Kristianon responsabilidad tayo—anggan singano agnayarian.