Datin Huis so Onkekerew na Dispensa—Kayari 45 a Taon
DIAD sakey a korte diad Berlin, nen Agosto 1995, sakey a datin huis ed Korte Suprema so angibalikas ed sakey ed Tastasi nen Jehova na pagbabawi to lapud lingon ginawa to 45 a taon ed asasakbay.
Nen Oktubre 1950, say Korte Suprema na German Democratic Republic (GDR) so angideklara ed siameran Tastasi nen Jehova a nankasalanan ed sumpad-estadon panaggulo tan panag-espiya. Duara so senintensyaan na legay bilay a kapriso, tan pitora ni—pati ed 22 años a si Lothar Hörnig, a komapat a nanreklamo manlapud kawanan na say litrato—so naikdan na andukey a kapriso.
Apataplon taon ed saginonor, say GDR so nagmaliw a kabiangan na Federal Republic of Germany. Saray opisyal so angimbistiga ed pigaran ag-inkahustisya a ginawa ed datin GDR tan sinalin itarok ed hustisya iramay responsabli. Sakey ed saratan ya ag-inkahustisya et say bista na Korte Suprema ed Tastasi nen 1950.
Si A. T., a natan et 80, so sakey ed saray taloran huis a nandesisyon ed panangukom sanen siameran Tastasi so binista. Pinakasalanan a mamipikewet ed hustisya, sikato so inmapireng ed arap na Korte Rehyonal ed Berlin pian ipaliwawa so impansentensya to.
Diad salaysay to ed korte, inako na datin huis a sikato so angiboto parad walay kasalanan a panangukom 45 taon ed asasakbay, anggaman pinaboran toy agtanton mairap iran sentensya. Balet say kaso so nanggawa ed sikaton manisip lamet. Akin? Pinasegsegang iray Tastasi nen Jehova na saray Nazi legan na komaduan guerra mundial lapud impulisay da so panuporta ed si Hitler. Kayari na guerra saray Tastasi so pinasegsegang lamet, balet natan et say Komunistan rehimen. Saya so sengegan na “ontanlan inkagonigon” na huis.
Imbaga nen Lothar Hörnig ed korte a sikatoy angusar na limara tan kapalduan taon a nambukbukor ed panangipisokan tan sikatoy agnibulos ed prisoan na Brandenburg anggad 1959. Diad impakadngel ed salaysay nen Hörnig, say datin huis so akanangis. “Kaermenan kon tuloy,” mansebsebek ton inkuan. “Pangasim a perdonaen moak.” Inawat nen Hörnig so kerew na dispensa.—Ikompara so Lucas 23:34.
[Picture Credit Line ed pahina 32]
Neue Berliner Illustrierte