Siopa So Mamabanlong?
“Siopa so manuuley ed mundo?” No itepet itan na sakey ed sika, anto kasi ebat mo? Maslak a relihyoson totoo et nayarin ikuan dan say “Dios” odino si “Jesus.” Angiter na ebat so sakey ya artikulon pinmatnag ed The Freeport News, peryodiko ed Bahamas, a daiset so segurado ed satan.
“Anengneng koy sakey a tract ed arap na puertak,” ontan so gapo na managsulat ed artikulo. “Gendagendat ya agko babasaen so antokaman ya intilak ed arap na puertak, balet diad sayan bekta et denisidik a basaen itan. Intepet na paulon balita, ‘Siopan Peteg so Manguuley ed Mundo?’” Diad impamasa ed nibase’d-Biblian tract, naamtaan na sayan bii a say manuley ed sayan mundo et aliwan say Dios nisay si Jesus noagta si Satanas a Diablo.—Juan 12:31; 14:30; 16:11; 1 Juan 5:19.
“Konsideraen pa so andi-liknaan iran inkaalablabas diad ankabaleg a karuksaan,” isasalaysay na tract. “Saray totoo so angusar na gas chambers, saray kampo na panangipangawan, panagpugso na apuy, saray bomban napalm, tan arum niran mauges a metodo pian andi-panangasin mamairap tan mamatey ed balang sakey. . . . Antoran puersa so managdag ed totoo ed ontan iran makapadimlan gawa odino mangimaneobra ed sikara ed saray situasyon a no iner et napilitan iran manggawa na saray karelmengan? Kasin naumameng yo la no wala so marelmeng, agnanengneng a pakayarin mangiimpluensya ed totoo a manggawa na ontan a kiwakiwas na karawalan?” Makapasurprisa tay panatawag na Biblia ed si Satanas a “say Dios na sayan panaon”?—2 Corinto 4:4.
Makapaliket, asingger lay panaon sano si Satanas tan saray demonyo to so naandi la. “Say mundo mangangga tan saray penel to, sabalet so mangunor ed linawa na Dios onsiansia lawas.” (1 Juan 2:17) On, isisipan na Biblia a saraman so manggagawa na linaway Dios so makapanilalon manbilay a maando ed sakey a matunong a balon mundo. (Salmo 37:9-11; 2 Pedro 3:13; Apocalipsis 21:3, 4) Agaylan inawa sano say mauges ya impluensya nen Satanas tan saray demonyo to so naekal!
Kayari impanegek ed lugan na sayan melag a tract, oniay impanampot na managsulat ed artikulo na The Freeport News: “Talagan panliketan koy impakabasak ed satan a tract . . . lapud siak met so mapaga nipaakar ed kipapasen na mundo, tan no siopa so mamabanlong.”