Pananakbat ed Pako na Inkatobonbalo

DIAD sarayan “panaon a maatap,” nipapaarap iray kalangweran ed pirmin kadedesdesan. (2 Timoteo 3:1) Inagew-agew iran natatabek na propagandan mangipapaseseg ed imoralidad, panagsigarilyo, tan arum niran nengneng na makadesyang a walna. Saramay ontutumbok ed saray estandarte na Biblia so nayarin naludlurey ed agpibabarkada, tan nayarin liknaen na arum a Kristiano a magmainomay so onsuko.

Diad pansampo-sampot na komapiton siglo K.K.P., oniay insulat nen Jeremias: “Maong a nipaakar ed too ya awiten to so pako ed kaugawan to.” (Tagleey 3:27) Antoy labay ton ibaga? A say pakaaral ya ontalona ed saray subok legan na kaugawan so mangiparaan ed sakey pian naarap toray angat na inkawala-la’d-edad. Saray paniirapan, anggaman agmarakep, so agnapaliisay namparan Kristiano iran tobonbalo tan wala-la’d-edad. (2 Timoteo 3:12) Balet saray gungguna na inkamatoor so manaeg a tuloy ed antokaman a temporaryon pakainawaan ya itarok na pikokompromiso.

No sakey kan tobonbalo, diritsaan mon arapey subsubok ed pananisia. Sano natukson mangagamil na mauges a kondukta, agmikokompromiso. Anggaman mairap ni ed kaplesan so panggawa ed saya, diad panakar na panaon et ondaiset iray panpapagaan mo. Insipan nen Jesus: “Ala yoy pakok ed sikayo . . . , et naromog yoy inawa nipaakar ed saray kamarerwa yo. Ta say pakok mainomay tan anlemew so awit ko.”​—Mateo 11:29, 30.

Awaten so angat ed pambilay unong ed saray prinsipyo na Biblia. Say panggawa ed satan so mangiter ed sikay sankaabigan a dalan na bilay natan tan peteg ya ilalo ed arapen. A singa ibabaga na Biblia, “say mundo mangangga tan saray penel to, balet say mangunor ed linawa na Dios so onsiansia lawas.”​—1 Juan 2:17.