‘Diad Dios so Pansalimbengan Ko’
DIAD SARAYAN “maatap a panaon a mairap a pidenengan,” ondaraak iray tukso tan desdes. Alimbawa, say inkamatua tayo so nayarin nasubok diad pantratrabahoan. Nayarin nasubok so kasimpitan tayo ed limog na kaeskuelaan. Tan say integridad tayo so mabetbet a nasusubok ed abulok ed moral a mundo.—2 Timoteo 3:1-5, NW.
Say managsulat na Biblian si Asaf so nambilay met diad sakey a panaon sanen sinmalindak so karelmengan. Impasirayew ni ingen na arum ed kapanaonan to so agmaridios a kondukta ra. “Say kakinonan singa golonggolong a nibawer ed beklew da,” insulat nen Asaf. “Say panlagsot sakbongan to ra a singa sakey a kawes. Sikara manlurey ira tan mansalita ra a sankabaglan na nipaakar ed panangimermer; atagtagey so panagsalita ra.” (Salmo 73:6, 8) Pamilyar ta iyan awawey?
Parad saraman so manpipilalek a manggaway maptek, say ontan a kondukta so makapagonigon a tuloy, makapadismaya ni ingen. “Dia ed amin a dukey na agew asalotan ak,” intagleey nen Asaf. “Sikato so maot-ot a tuloy nen saman ed siak.” (Salmo 73:14, 16) Nayarin naliliknam met so ontan, balet agnaeekalay ilalo! Atalonaan nen Asaf so karelmengan ed agew to, tan nayarian mo met. Balet panon?
Amoria nen Asaf a ngalngalin imposibli pakaromog na tuan hustisya ed silong na agnaspot ya uley na too. (Salmo 146:3, 4; Uliran 17:23) Kanian, imbes a daraken so mablin panaon, enerhiya, tan kaykayamanan to diad panalin ekaley amin a karelmengan ya akapaliber ed sikato, say piimano to et say siglaotan to ed Dios. Onia so indeklara nen Asaf: “Bangbalet ta maong ed siak so ondere ed abay a Dios. Inyan ko so panagmatale’ ko ed Jehova a Dios.”—Salmo 73:28.
Natan, saraman so mibibiang ed mauges ya agamil ed panagnigosyo so mabetbet a manggagayaga ed materyal iran pankaabigan. Ipapasirayew ni ingen na dakel so panangibaliwala ra ed moral iran ganggan na Dios. Balet say itatalona ra so agmagnayon. “Andi-duaruwa a sika inpasen mo ra ed andanglel iran paspasen,” inkuan nen Asaf. “Sika inpelag mo ra ed loob na kadederalan.”—Salmo 73:18.
On, diad nigeter a panaon na Dios, say panamalikdo, karawalan, tan kaugsan, pati ed amin niran agmaridios ya agagamil a nepeg a paliisan na tuan Kristianos, et naandi la. Ta isisipan na Biblia: “Saray managgawa na mauges napater ira, balet saray manalagar ed Jehova tawiren da so dalin.” (Salmo 37:9) Ambegya ni, iyaniweng tayo komon iray salita na salmista a kuanto: “Si Jehova so batondampay ko tan salimbeng ko tan mangiliktar ed siak. Dios ko, dampay ko. A dia ed sikato manmatalek ak.”—Salmo 18:2.