Akin ya Idalem so Mauges?

“SIOPAMAN a mangiwalwal na pamaakaran so magmaliw a kabusol na totoo,” so diparan ed Sagur ya Aprika. Ontan so agawa ed si Olu sanen indalem toy kuya ton nan-insesto ed ading ton bii. “Matila ka!” so inyeyag na kuya to. Insan to maramsak a pinekpek si Olu, pinataynan ed abung na pamilya ra, tan pinoolan ya amin so kawes nen Olu. Gampit iray kabaryoan to’d kuya to. Lapud agla naabrasa’d purok da, kaukolan ya onalis lay Olu. Salambengat nen apatnagan lay eges na ading ton bii ya amoria na kabaryoan ton tua manayay ibabaga nen Olu. Inamin na kuya to, tan si Olu so apaboran lamet. No pinmatnag ed inmuna ya aliwan tua iray bengatla. Ompan si Olu so apapatey.

Mabitar, saramay andian na aro ed si Jehova so maseguron agmalabay a niwalwal so kalilingoan da. Say makasalanan a tendensya na too et say iresisti ed panamaat a pan-imbelay siopaman a mamaat. (Ikompara so Juan 7:7.) Agpankelawan a dakel so agla-oneseesel a kuanmono ra bato no nipaakar ed panangipaamta’d saray impakalukso na arum ed saramay walaan na autoridad a mametek ed sikara.

Panamabli ed Kablian na Panamaat

Balet, diad limog na totooy Dios, duma so awawey no nipaakar ed panamaat. Papablien a tuloy na maridios a lalaki tan bibii so inyareglo nen Jehova a pananulong ed saray nalilingo ed loob na Kristianon kongregasyon. Bidbiren da a say ontan a disiplina et panangibalikas na maaron-kaabigan to.​—Hebreos 12:6-11.

Nayarin niyilustra iya ed agawa’d bilay nen Arin David. Anggaman sikatoy matunong a too nanlapulad inkatobonbalo to, sinmabi panaon a sikatoy naplag ed seryoson gawan-mauges. Unona, sikatoy akikalugoran. Insan, diad panasalin sakbongan so kasalanan to, inyareglo toy kipateyan na asawa na bii. Balet imparungtal nen Jehova so kasalanan nen David ed si Natan a propeta, a sipapakpel ton inarap si David asunto’d satan. Diad impangusar na mapuersan ilustrasyon, intepet nen Natan ed si David no antoy gawaen ed mayaman a toon walaay amayamay a karnero balet ta inala tan pinakgeran toy alenleneg a kordero, sakey a pinabpablin kokomponien, na sakey a pobren too pian parawesen labat so kaaro to. Si David, a datin pastol, so inmingongot tan sinmanok. Inkuanto: “Say laki a nanggawa na saya sikato so manepeg ya ompatey!” Insan inyaplika nen Natan so ilustrasyon ed si David, a kuanto: “Sika so laki!”​—2 Samuel 12:1-7.

Agsinmanok si David ed si Natan; agto anggan sinalin idepensay inkasikato nisay bueltaan to. Imbes, say impanumal nen Natan so anenyeg a maong ed konsiensia to. Atalos ed puso, impatua nen David: “Nankasalanan ak sumpa ed Jehova.”​—2 Samuel 12:13.

Say impangiwalwal nen Natan ed kasalanan nen David, a tinekepan na maridios a panamaat, so amawalay maong a resulta. Anggaman ag-asalimbengan si David ed saray nansumpalan na lingo to, sikatoy nagbabawi tan akipulangan ed si Jehova. Panoy liknaan nen David ed ontan a panamaat? Oniay insulat to: “Say matunong so mangabil ed siak et sikato naani sakey ya abig na linawa; tan banoen toak; et sikato naani maomaong a larak ed ulo agmo yabuloy ya aggabayey ulok.”​—Salmo 141:5.

Diad agew tayo met, nayarin nalanor iray aripen nen Jehova ed seryoson gawan-mauges, anggan saramay manmamatoor ed dakel lan taon. Lapud bibidbiren a makatulong iray mamatatken, dakel so unona lan onaasingger ed sikara pian patulongan. (Santiago 5:13-16) Balet no maminsan et nayarin sakbongan na managgaway-mauges so kasalanan to, a singa si Arin David. Antoy kaukolan tayon gawaen no bilang ta napamintuan tayoy seryoson gawan-mauges ed kongregasyon?

Siopay Akanresponsabli’d Satan?

Sano nakabatan na mamatatken so seryoson gawan-mauges, asinggeran da so indibidual ya alanor pian ikdan na nakakaukolan a tulong tan panametek. Responsabilidad na mamatatken so pangukom ed saratan diad dalem na Kristianon kongregasyon. Diad alerton pangasikaso’d espiritual a kipapasen na kongregasyon, tutulongan tan sisimbawaen day siopaman a mangalay maatiw odino lingon kundang.​—1 Corinto 5:12, 13; 2 Timoteo 4:2; 1 Pedro 5:1, 2.

Komusta balet no aliwa kan matatken et akabatan moy nipaakar ed seryoson gawan-mauges ed biang na arum a Kristiano? Saray pananontonan et nidatak ed Ganggan ya inter nen Jehova ed nasyon na Israel. Nibaga’d Ganggan a no natasian na sakey a too iray apostatan gawa, isusumpa’d uley, panagpatey, odino arum niran seryoson krimen, responsabilidad ton idalem itan tan mantestigo’d no antoy amta to. Ibabaga na Levitico 5:1: “No walay siopaman a mankasalanan ed pandengel to na bosis na panagsamba, a bangta sikato so sakey a tasi, balanglay anengneng to odino akabatan to, no agto ibaga, sikato ed satan so man-awit na kaugsan to.”​—Ikompara so Deuteronomio 13:6-8; Ester 6:2; Uliran 29:24.

Anggaman andi’d silong na Mosaikon Ganggan, saray Kristiano natan so nigigiya na saray prinsipyo a walad benegan na satan. (Salmo 19:7, 8) Kanian no naamtaan mo so nipaakar ed seryoson gawan-mauges na sakey a kaparan Kristiano, antoy kaukolan mon gawaen?

Panangasikaso’d say Pamaakaran

Unona’d amin, importanti a walay putel a rason a napanisiaan a talagan agaway gawan-mauges. “Agka mantasi sumpa ed kaabay mo ya andi makasengeg,” so ikuan na toon makabat. “Et agka mamalingo ed saray bibil mo.”​—Uliran 24:28.

Nayarin desidien mon ideretso la’d mamatatken. Agpa mauges no ontan so gawaen mo. Balet, gendagendat a say sankamaaroan a kurang et say iyasingger ed toon nalalanor. Anganko ta aliwan onman manaya ed abaloan tayo. Odino ompan aasikasoen lay mamatatken itan a pamaakaran. Kalmadon isingbat so pamaakaran ed too. No walan siansiay rason a panisiaan a walay agawan seryoson kasalanan, sikatoy pasesegen ya onasingger ed mamatatken parad tulong, tan ipaliwawan makabat itan a kundang. Ag-itotongtong ed arum so pamaakaran, lapud satan so panagtalabutob la.

No ag-ibaga na too ed mamatatken ed loob na resonablin peryodoy panaon, insan ditan mo la ibaga. Sakey odino duaran matatken so mangisingbat na pamaakaran ed indalem. Kaukolan na mamatatken a ‘mangalasir tan gawaen so pananukimat, tan upapeten a maong’ pian amtaen no walay agawan mauges. No wala, asikasoen da so kaso unong ed Makasulatan a pananontonan.​—Deuteronomio 13:12-14.

Anggan panon et duaran tasi so kaukolan pian napaletan so panamakasalanan a gawan-mauges. (Juan 8:17; Hebreos 10:28) No iburi na too so panamakasalanan tan sika labat so makapantestimonia, ipalima la so pamaakaran ed si Jehova. (1 Timoteo 5:19, 24, 25) Gawaen iya ed pikakabat ya amin a bengatla et ‘mapatpatnag’ ed si Jehova tan no nankasalanan so too, diad banda’d kaunoran et sikatoy “anapen” na saray kasalanan to.​—Hebreos 4:13; Numeros 32:23.

Balet no bilang ta iburi na too so panamakasalanan tan sika lambengat so mogmon tasi sumpad sikato. Makanepegan ta’n sikay bueltaan na panagpauges? Andi, no agmo intalabutob ed saramay agnalalanor ed pamaakaran. Aliwan panagpauges so pangidalem ed saray kipapasen a mangaapekta’d kongregasyon diad saramay walaay autoridad tan responsabilidad a mangasikaso tan mametek ed saray pamaakaran. Diad tua, mitunosan itan ed pilalek tayo a lawas a manggaway maptek tan matoor.​—Ikompara so Lucas 1:74, 75.

Panamantini’d Inkamasanto Diad Kongregasyon

Say sakey a rason ed panangipaamta’d gawan-mauges et pansiansiaen toy inkadalisay na kongregasyon. Si Jehova et malinis a Dios, masanto a Dios. Kakaukolanen to ed amin na saramay mandayew ed sikato a magmaliw a malinis ed espiritual tan moral. Onia so isisimbawa na apuyanan a Salita to: “Unong na anak na katooran dia ed agyo pinunong ed saray ugagep yo wari nen wala kayo ni ed katikeyan na kanonotan. Noag ingen, unong a say anawag ed sikayo et masantos, masantos kayo met komon ed ganaganay panagbilay, ta nisulat a: ‘Masantos kayo komon ta masantos ak.’” (1 Pedro 1:14-16) Saray indibidual a mangaagamil na inkarutak odino gawan-mauges so mansumpal ed katilolan tan agpanamalabo nen Jehova ed intiron kongregasyon likud no onkiwas a peteken odino ekalen ira.​—Ikompara so Josue, kapitulo 7.

Ipapanengneng na saray sulat nen apostol Pablo ed Kristianon kongregasyon na Corinto no panon a say panangidalem ed gawan-mauges so epektibon mamadalisay ed totoo na Dios diman. Diad inmunan sulat to, insulat nen Pablo: “Ta dia ed tua dengel a wala ed sikayo so lawanan, tan satan a lawanan anggapo ni ed saray Gentiles, ta sakey ed sikayo kayarianen to so asawa na ama to.”​—1 Corinto 5:1.

Ag-ibabaga na Biblia so nanlapuan na sayan dalem a naawat na apostol. Nayarin naamtaan nen Pablo so situasyon manlapud si Estephanas, Fortunato, tan si Achaico, a nambiahen nanlapud Corinto pian onla’d Efeso a kawalaan nen Pablo. Akaawat met si Pablo na sulat a manuupapet manlapud Kristianon kongregasyon ed Corinto. Inerman so nanlapuan to, bektaman a nireport itan ed si Pablo na napanisiaan a tastasi, makapangiter ed satan na panangidirehi’d pamaakaran. Oniay insulat to: “Paekal yo sirin so mauges a too ed pegley yo.” Say too so pinapaway ed kongregasyon.​—1 Corinto 5:13; 16:17, 18.

Kasin angitarok na maong a resulta so instruksion nen Pablo? Peteg ya ontan! Mabitabitar, say managgaway-mauges so akamoria’d inkauges na ginawa to. Diad komaduan sulat to ed saray taga-Corinto, pinaseseg nen Pablo so kongregasyon a “komon a perdonaen tan ligliwaen” so managbabawin too. (2 Corinto 2:6-8) Kanian say impangidalem ed gawan-mauges so angitonton ed gawan nanresulta’d panaglinis ed kongregasyon tan kipawil lamet na too ed pabor na Dios ya akaderal ed relasyon to ed Dios.

Naromog tayo lamet so sananey ya alimbawa ed inmunan sulat nen Pablo ed Kristianon kongregasyon ed Corinto. Diad sayan pankanawnawa et binitla na apostol so kangaranan na saray tasin angidalem ed pamaakaran. Insulat to: “Lapu ed imbaga ra ed siak, so nisengeg ed sikayo, agagik, na saray kaamong nen Cloe, dia ed sikayo wala so saray siblangan.” (1 Corinto 1:11) Amta nen Pablo a sayan agpantutunosan, tekep na agmanepeg a panamagalang ed totoo, so amawalay inkaapag-apag a manesesga’d pakabuyak na pankakasakey na kongregasyon. Sirin, lapud aralem a panangikuenta’d espiritual a pankaabigan na saray kapananisiaan to diman, kinmiwas a tampol si Pablo diad impansulat to na manametek a konseho ed kongregasyon.

Natan et baleg a bilang na agagi ed saray kongregasyon ed intiron mundo so mamapasya ed kipreserbay espiritual a kalinisan na kongregasyon diad pamamantini na naabobonan a talindeg ed arap na Dios bilang indibidual. Arum so manasagmak na irap lapud panggagawa’d satan; arum ni ingen so inaatey pian makapanmatoor. Maseguron say pangonsenti odino panakbong ed gawan-mauges so pakapatnagay kakulangay apresasyon parad sarayan sagpot.

Tulong Parad Saray Mankakasalanan

Akin ya arum ed saramay naplag ed graben kasalanan so masuyat ya onasingger ed saray matatken ed kongregasyon? Mabetbet ya ontan lapud agda kabisado iray gungguna ed iyasingger ed mamatatken. Arum so sililingon manisia a no ipatua ra, say kasalanan da et niwalwal ed intiron kongregasyon. Papalikdoen na arum so inkasikara no nipaakar ed inkagrabe na kurang da. Siansian iisipen na arum a sarag dan ipetek so inkasikara ya anggapoy tulong na mamatatken.

Balet saratan a managgaway-mauges so mankaukolan na maaron tulong manlapud saray matatken ed kongregasyon. Oniay insulat nen Santiago: “Mangiinagem so sakey ed sikayo? Patawag to so saray mamasiken na iglesia; tan sikato so ipikasi ra komon, a puyokan da na larak ed ngaran na Katawan. Et say pikakasi pananisia ilaban to so agmakayari, tan say Katawan bangonen to; tan no nankasalanan napaandi’ra ed sikato.”​—Santiago 5:14, 15.

Agaylan marakep a probisyon so tulong ed saray nalilingo ed kipawil na espiritualidad da! Diad panangiyaplika’d makatambal a konseho na Salitay Dios tan diad panangipikasi ed biang da, natulongan na mamatatken iray mansasakit ed espiritual pian nipaliis ed nalilingon daladalan da. Diad ontan, imbes a manliknan akondena, saray managbabawi so mabetbet a narepreskoan tan nainawaan sano mitongtong ira ed saray maaron mamatatken. Sakey a balolakin taga-Sagur ya Aprika so akilawanan tan sinakbongan toy kasalanan to diad pigaran bulan. Kayarin pinmarungtal so kasalanan to, inkuanto’d saray matatken: “Agayla so pankaliktan kon wala komoy manepet ed siak nipaakar ed relasyon ko’d satan a bii! Agaylan kainawa ed siak sanen nipatuak la iyan bengatla.”​—Ikompara so Salmo 32:3-5.

Sakey a Gawa na Aprinsipyoan ya Aro

Saray bautismadon ariripen na Dios so “linmabas . . . ed patey a pinmugta ed bilay.” (1 Juan 3:14) Balet no akapanggawa ray seryoson kasalanan, sikaray pinmawil ed dalan na patey. No ag-ira natulongan, nayarin magmaliw iran nailuam ed gawan-mauges, ya agmanpipilalek a magbabawi tan ompawil ed panagdayew ed tuan Dios.​—Hebreos 10:26-29.

Say pangidalem ed gawan-mauges so sakey a gawa na puron panagpaga parad managgaway-mauges. Insulat nen Santiago: “Agagik, no nalingo so sakey ed sikayo ed katuaan, et panpataolien na sakey a too, amtaen to komon, ta say mamagbabawi na makasalanan lapu ed inkalingo to ed saray dalan to, nilaban to so kamarerwa ed ipatey tan saniban to so dakerakel a kasalanan.”​—Santiago 5:19, 20.

Sirin, akin ya idalem so mauges? Lapud pawalaen toray maong a resulta. Peteg, say pangidalem ed gawan-mauges so sakey a gawa na Kristianon aprinsipyoan ya aro a nipanengneng ed Dios, ed kongregasyon, tan ed say managgaway-mauges. No kada membroy kongregasyon et sitotoor ton itandoro iray matunong ya estandarte na Dios, mayamyaman a bendisionan nen Jehova so intiron kongregasyon. Oniay insulat nen apostol Pablo: “Sikato [Jehova] met so mamabiskeg ed sikayo ya angga ed kasampotan, pian andi-gapo so pakabalawan yo no agew la na Katawan tayo a Jesu-Kristo.”​—1 Corinto 1:8.

[Litrato ed pahina 26]

Panangipanengneng na aro so pamaseseg ed mankakasalanan a Tasi a mitongtong ed mamatatken

[Litrato ed pahina 28]

Ontulong iray mamatatken a nipawil iray mankakasalanan ed pabor na Dios