Say Samploran Ganggan
ASUKAYAN na obispo na Gloucester ed Inglatera a masulok a kapaldua na saray klerigo ed diyosesis to so agmakapangulit ed say Samploran Ganggan, tan 10 porsiento ed sikara so agmakaamta no iner ed Biblia so pakaromogan ed saratan. Balet satan so 450 taon lan apalabas. Kasin say situasyon so inmaligwas la nanlapulad saman? Andin balot—a singa ipaparungtal na agano nin Sunday Times a palaranan ya impansurbi ed Anglikano iran klerigo.
Diad 200 a kleron ininterbio, 34 labat a porsiento so makapangisitas ed amin a Samploran Ganggan. Arum la, liknaen na sakey a masyadon dakel iray isesebel, tan say sananey et angiwaklit ed saratan a bilang agmakabaliksan ed saray problema ed moralidad natan.
Antam ta so Samploran Ganggan odino iner so pakaromogan ed saratan? Nirekord iratan ed Exodo, say komaduan libro na Biblia, say unonan 17 bersikulo na kapitulo 20. Akin ya agbasaen iratan? Nia so simplin paraan diad panegek ed saratan. Say unonan apatira et misiglaotan ed panagdayew tayo ed Dios, say komalima et ipapabitar toy bilay na pamilya, say komanem ya anggad komasiam et manutukoy ed siglaotan tayo ed kaparan too, tan say komasamplo et nikadkaduma, a pakiwasen to itayon usisaey kapusoan tayon mismo, imanoen iray motibo tayo. Nia so antikey a sumaryo no panon a niyaplika na Kristianos irayan prinsipyo.
Unona: Iter ed Manamalsa tayo so nikabkabiig a debosyon. Komadua: Agmanguusar na saray imahen ed panagdayew. Komatlo: Lawas respetoen tan igalang so ngaran na Dios. Komapat: Ikday panaon so pangiyapasakey ed espiritual iran pamaakaran, ya andiay pakaabalaan. Komalima: Ananak, respetoen yoy atateng yo. Komanem: Agmanpapatey. Komapito: Paliisay pikakalugoran. Komawalo: Agmantatakew. Komasiam: Ibaga so katuaan. Komasamplo: Paliisay inkaagum.
Say Samploran Ganggan so kabiangan na kodigo na saray ganggan ya initer ed si Moises. Balet saray prinsipyon nitekep et andi-geter. (Roma 6:14; Colosas 2:13, 14) Lapud saya, saray patumbok nen Jesus so angaon tan anukoy manlapud Samploran Ganggan. (Roma 13:8-10) Agaylan makapaliket—tan maligen—so bilay komon natan no amin so manrespeto tan manbilay unong ed sarayan pinuyanan na Dios iran prinsipyo!