Report na Saray Manangiyabawag na Panarian
Mansusumpal ed Bendision na Dios so Panagsungdo Diad Malawi
SI Jose so matoor ya aripen nen Jehova. (Hebreos 11:22) Sikato met so laki na matalonggaring a panagsungdo. Anggaman sikatoy intapat na mismon agagi to, amiduan inlako ed inkaaripen, tan diad saginonor et impriso ed silong na palson panamakasalanan, agkinmapuy si Jose. Imbes, siaanos ton sinungdoan iray taon na kairapan, a sipapaabeban tatalaranay panamendision nen Jehova.—Genesis 37:23-28, 36; 39:11-20.
Ontan met natan, saray Tastasi nen Jehova ed Malawi so siaanos a nanalagar ed bendision na Dios. Diad loob na 26 taon, sinungdoan na sarayan Kristianon Tastasi so pananebel na gobierno, pirmin panamasegsegang, tan dakel a kairapan. Balet atumangan so panagsungdo ra.
Sanen ginmapoy panamasegsegang ed Malawi diad saginonor na 1967, wala labat so 18,000 a manangipalapag na Panarian. Isipen pay gayaga na Tastasi sanen naamtaan dan say 1997 a serbisyon taon so ginmapo ed balon pantok a 38,393 a manangipalapag—mas doble ed karakel diad gapo na pananebel! Sakey ni, say inmatendi diad 13 “Mensaheros na Maridios a Kareenan” a Distriton Kombension a ginawa diad Malawi et asabi toy masulok a 117,000. Tua, bebendisionan nen Jehova so pananisia tan panagsungdo ra.
Sakey ya alimbawa na sayan panamendision et say eksperiensia na malangwer a laki a manngaran na Machaka. Sanen inawat nen Machaka so opresin panagaral na Biblia a kaibay Tastasi nen Jehova, sinmanok a maong iray atateng to. Inkuanda: “No labay moy magmaliw a Tasi, kaukolan ya ontaynan ka ed abung.” Anggaman ontan, sayan panamagyaw so ag-anismaya ed sikato ed pangituloy to’d panaaral to. Bilang resulta, inala na atateng nen Machaka so amin a kawes to. Kinmiwas iray agagi diad impanaliw day pigaran kawes parad sikato. Sanen abalitaan iya na atateng nen Machaka, inkuanda ed sikato: “No suportaan ka na Tastasi, taynan ka tan miayam ka’d sikara.” Kayari impangonsideran maong ed pamaakaran, tinmaynan si Machaka, tan sikatoy inabrasa na sakey a pamilya na Tasi ed lokal a kongregasyon.
Diad syodot a maong na atateng nen Machaka et deneside ray onarawi ed lugar da ta pian napaliisan day pakapiabet ed Tastasi. Siempre, naaburido si Machaka ed saya, balet ta aligliwan maong sanen insingbat na agagi ed sikato so Salmo 27:10, a kuanto: “Bangno paulyan ak na amak tan inak, si Jehova ed satan ampopoen toak.”
Asabi panaon, kinmepa so isusumpa na atateng nen Machaka, tan deniside toy ompawil ed sikara. Mapatnag a say determinasyon na anak da a manlingkor ed si Jehova so walaay baleg ya epekto ed sikara lapud labay da met lay paiyaralan na Biblia ed Tastasi nen Jehova! Sikara met so inmatendi ed taloran agew na “Mensaheros na Maridios a Kareenan” a Distriton Kombension, a kayari na satan et sikaray apakiwas a mangideklaran: “Petepeteg, saya so organisasyon na Dios.”
On, say isusumpa so nayarin makapasubok, balet ag-onsusuko iray matoor a mensaheros na Dios. Sitetepel iran ontutundas, lapud kabat dan “say kairapan, mangiter na anos; tan say anos, pakapatnagan.” (Roma 5:3, 4) Napekderan na Tastasi nen Jehova ed Malawi a say panagsungdo et mangitonton ed bendision na Dios.