Say “Sakey-Gamet a Biblia”

APARALISADO kayari impakaataki’d pirmin petang na agew, makapansulat labat si Joseph Schereschewsky diad panmakinilya, ya uusaren so saksakey a gamet. Ingen arapat toy kalat to—ya ipatalos so Biblia ed salitan Intsik, sakey ed lenguahen sankairapan ya ikabisado na sakey a dayo.

Lapud nianak a Judio, sinuri tan inawat nen Schereschewsky so Inkakristiano nen wala la’d edad. Diad kaunoran sikatoy nagmaliw a misioniro diad Tsina. Diman, sikatoy akibiang ed dakel a proyektoy panagpatalos, a ginmapon asasakbay nen 1866 tan nantultuloy ed akauna iran taon na koma-20 siglo. Lapu ed Judion abenegan to, mas kabisado nen Schereschewsky so Hebreo nen saray kapara ton iskolar. Kanian, nimatalek ed sikato so pangipatalos ed intiron Hebreon Kasulatan. Diad pansamposampot na andukey a karera to, apawala to met so Intsik a patalos na intiron Biblia tekep na saray reperensya.

Bilang sakey a managpatalos na Biblia, si Joseph Schereschewsky so maseseg a manangiyalibansa ed saray bersyon ed kaslakan a lenguahe. Balet aliwan mainomay so kimey to. Nikadkaduma so agawaan to ed Biblian Intsik, ibabaga na The Book of a Thousand Tongues, “lapud malaklaknab a tuloy itan tan asumpal sumpad agaylan karakel a babeng.”

Kayarin aparalisado iray lima nen Schereschewsky, intuloy to ni so kimey to. Mankaukolay baleg a sagpot so panagmakinilya, lapud andian lay normal a pakausar ed limalima to. Kanian tinawag to itan a patalos a sakey-gamet a Biblia. Pian napawala itan anggaman ed kakapuyan to, nanpursigian nen Schereschewsky ed loob na 25 taon. Diad agto insuko, sikatoy akibiang ed impanggawan natalosan so Salitay Dios ed salitan Intsik—say lenguahen sasalitaen na dakel a totoo nen say dinanman.

[Picture Credit Line ed pahina 11]

Namparan litrato: Courtesy of American Bible Society Archives