Kasin Say Panagsalitam et Makasugat Odino Makapaabig?

LEGAN na sarayan mairap a panaon, talagan agla makapasurprisa a dakel so “nabtagan na puso” tan “kamarerwa a masakit ed panagbabawi.” (Salmo 34:18) Sirin, diad saray salita nen apostol Pablo, wala so tuloytuloy a pankaukolan ya “ibalap yo so apunaw ed puso” tan “tagano yo so saray makapuy.” (1 Tesalonica 5:14) Balet anto no say kapara tayon too so angopendi’d sikatayo odino akagaway bengatlan seryoson lingo? Diad ontan a situasyon, nayarin liknaen tayon makatunongay pangorehi ed indibidual ed makapasakit a paraan. Balet, matukoy so panalwar. Say konseho, anggan susto, so makaderal no niiter ed makapasakit a paraan. Ta ibabaga na Uliran 12:18: “Wala so mansalita a botaktak a singa saray kisaksak na kampilan.”

Sirin, sano ginetma tayon mangorehi odino mangasikasoy agpantatalosan, importantin nonoten so komaduan parti na Uliran 12:18: “Say dila na makabat sikato so kasil.” Lawas mon tepetay inkasika, ‘No kaukolan ak a nakorehi, antoy labay kon pakakorehi?’ Maslak ed sikatayo so mas onkiwas ed panamaseseg nen say kritisismo. Kanian magmaliw a mabunlok ed panangomenda. Saya so mabetbet a mangiter ed akaopendi ed determinasyon ya onaligwas, tan sikatoy lalon misalsalamat ed antokaman ya intulong.

Agaylan importanti a lawas timplaan iray salita tayo tekep na inkaulimek! Saray makapaabig a salita so maseguron mangitilak ed dumerengel a walaay liknaan a singa ed samay salmista, a nansulat: “Say matunong so mangabil ed siak et sikato naani sakey ya abig na linawa; tan banoen toak; et sikato naani maomaong a larak ed ulo agmo yabuloy ya aggabayey ulok.”​—Salmo 141:5.