Report na Saray Manangiyabawag na Panarian
Sipapaabeban Pitunosan ed Dalan nen Jehova
“ANAPEN yo si Jehova, sikayo ya amin a mauyamo ed dalin.” Sayan imbitasyon, ya improklama na Hebreon propetan si Sofonias ed apalabas lan 26 a siglo, so siansian ninanatnat ed totoo ed intiron dalin natan. (Sofonias 2:3) Antoy kabaliksan na pananap ed si Jehova? Say panggawa’d saya so onggapo’d panangalay pikakabat ed alenleneg a tua tan mabilay a Dios, si Jehova.—Jeremias 10:10; Juan 17:3.
Balet, say panangala labat na pikakabat so agmangitonton ed naabobonan a talindeg ed arap na Dios. Pian nagamoray pabor na Dios, nepeg ya iyaplika met na sakey iyan pikakabat. Panon? Diad sipapaabeban panangitunos ed panagisip tan kondukta to unong ed saray estandarti na Dios, a singa iyiilustra na onggendan ya eksperiensian manlalapud Suriname.—Efeso 4:22-24.
Panpirawatan nen Eddy, sakey a maestron mamegpegley la’d 30 años, iray makapenek ya ebat ed tepetepet a singa: ‘Antoy papel na relihyon ed sosyedad natan?’ tan ‘Kasin say Biblia, a kadaanan a libro, so mitunosan ed modernon siensia?’ Sanen dinmalaw iray Tastasi nen Jehova tan angiter na nibase’d Biblia iran ebat ed sarayan tepet, tinmalineng a maong si Eddy. Sikato ni ingen so nannota ta pian sukayan no duga iray eksplinasyon na Tastasi.
Sakbay to, membro si Eddy na sakey a relihyon ya angibangat ed sikato a say totoo kuno so resultay impamasimbalo na Dios ed saray bakes. Kanian sanen inopresian na Tastasi na publikasyon a Life—How Did It Get Here? By Evolution or by Creation? mabulbulos ton inawat itan. Nandinayewan toy malinew ya eksplinasyon na libro ed salaysay na Biblia ed panamalsa. Diad panaaral toy Biblia, kombinsidon aromog to lay katuaan!
Balet natan et nipaarap ed sakey a subok. Manaayam si Eddy ed abung a say panagtakew tan ag-inkamatua so paraan na kabibilay. Kanian, sikatoy nipaarap ed panpilian: balanglan tumboken toy abulok a kabibilay na kakuartoan to odino ipulisay so ontan a kondukta nisengeg ed estiloy-bilay a mangigloria ed Dios. Sikakabat, pinili nen Eddy so komadua. Intunda toy amin a mauges a pililimog tan tinmaynan ed abung.—1 Corinto 15:33, 34.
Maples ya inmaligwas si Eddy kayari inggapo ton iyatendi ed saray miting diad Kingdom Hall. Inuman to met so panagkawes tan panagayos to tan itotongtong to la ed kakaaro tan kakanayon to so nanaaralan to. Saginonor, pinmalaloy gayaga to sanen naaprobaan a mibiang ed panangipulong ed ‘maong a balita’ diad publiko. (Mateo 24:14; Gawa 20:20) Nen Disyembre 1996, asabi so abayag ya inalagar ya agew sanen insimbolo toy dedikasyon to’d si Jehova panamegley na baustimo ed danum.
Kada taon, nilasus nilibon matuan impanpuso so onkikiwas ed imbitasyon ya ‘anapen si Jehova.’ Diad panggagawa ed saya, naeeksperiensia ra so inkamatua na Uliran 22:4, a kuanto: “Say tumang na kauyamoan tan say takot ed Jehova sikato so saray kayamanan, tan dayew, tan bilay.” On, diad sipapaabeban pitunosan ed dalan nen Jehova, panggagayagaan na saray manangaro na katuaan so ontan iran bendision natan, tan matalek ya onnenengneng ed arapen ed magnayon iran bendision dia a mismo ed dalin.—Salmo 37:29.
[Saray mapa ed pahina 18]
(Parad aktual a format, nengnengen so publikasyon)
Caribbean Sea
GUYANA
SURINAME
FRENCH GUIANA
BRAZIL
[Credit Line]
Globo: Mountain High Maps® Copyright © 1997 Digital Wisdom, Inc.