Say Biblia​—Kasin Salita na Dios Odino Too?

Katuloyan na Kapitulo 12

Saray Prinsipyon Peteg a Matalona

23. (a) No agmaliket so sakey a panamaley, kasin say diborsyo so alenleneg a solusyon? (b) Antoray duaran tombok ed maliket, maligen a panamaley?

²³ Lapud say panamaley so inggagalan anggad intiron bilay, kaukolan tayon amtaen no panon iyan gawaen a maaligwas. Ikatunongan na arum a magmaong kuno so itaynan ed agmaliket a panamaley nen say mansiansia ditan tan magmaliw a miserabli. Balet wala so sananey a panpilian: say panggunaet a panresolbi ed saray probleman pansesengegan na kaermenan. Saya so sananey a pamaakaran a ditan et ontulong so Biblia. Anengneng tayo la so panisimbawa to ed sikatayon magmaliw a matoor ed asawa tayo, tan sakey iyan tombok ed maliket, maligen a panamaley. Sananey ni et say pamidbir a wala lambengat so sakey ya ulo ed panamaley, tan ibabaga na Biblia a nepeg a say asawan laki. Nasisimbawa so asawan bii a manuporta ed masiken to tan agmanuppiat ed kipapasen to. Diad biek a dapag, say laki so asimbawan mangusar ed kipapasen to parad pankaabigan na asawa ton bii tan agmagmaliw a masiblet.​—1 Corinto 11:3; 1 Timoteo 2:11-14.

24, 25. Panon a papasesegen na Biblia iray asawan lalaki tan asawan-bibii a manumpal ed manepeg iran betang da ed panamaley?

²⁴ Parad asawan-laki, ibabaga na Biblia: “Nepeg na saray asawan lalaki a panangaro ra ed saray kaasawaan dan dili a singa panangaro ra ed laman dan dili. Say mangaro ed asawa ton dili aroen toy dilin laman to, ta anggapo ni toon amusol ed laman ton dili.” (Efeso 5:28, 29) Agamilen na maaron asawan-laki so autoridad to ed makonsideran dalan. Sinononot ya anggaman sikato so ulo, say asawa ton bii so nepeg a konsideraen tan pankonsultaan. Say panamaley so panulop, aliwan inkadiktador.

²⁵ Say konseho na Biblia ed kaasawaan a bibii so mangisakup ed sarayan balikas: “Say asawan bii nepeg ton takotan so asawa to.” (Efeso 5:33) Respetoen to so asawa to lapud kipapasen to, tan say respeto to so mabitar diad panuporta to ed sikato, unong a say panangaro na asawa to so mabitar diad inkamapaga to ed sikato. Parad dakel iran modernon-managnonot ya indibidual, say onian simbawa so agnaawat. Ingen saray sanaasawan mangibase ed saray siglaotan da diad aro tan respeto​—unong ya isisimbawa na Biblia—​so lawas maliket.

26. Kasin peteg a matalona so Makasulatan iran estandarte parad panamaley? Iyilustra.

²⁶ Peteg a matalona so konseho na Biblia ed sayan pamaakaran so nanengneng ed sakey ya eksperiensia ed Abalaten a Kadayatan. Sakey a sanasawa diman, kayari samploy taon ya impanamong, so kombisidon say panamaley da so sinmaew. Kanian implano ra so mansiyan. Ag-abayag et akapitongtong so asawan-bii ed sakey ed Tastasi nen Jehova. Sikato tan say Tasi so nanaral ed simbawa na Biblia parad sanaasawa. Inkuan na asawan laki: “Legan a nanaaralan na akulaw ko iray prinsipyo na Biblia, saratan so nanggunaetan ton iyaplika ed bilay to. Diad pigaran simba lambengat, naimanok la so arum iran pananguman.” Nikelawan, sikato so akipaknan mibiang ed asawa to a manaral na Biblia tan naaralan to so konseho na Biblia parad asawan-lalaki. Say resulta? Inkuanto: “Natan aromog mi so letnegan parad peteg a maliket a pamilya.”

27. Antoran prinsipyo na Biblia a no iyaplika et makatulong ed saray Kristiano a maniirap ed ekonomikon inkaduka?

²⁷ Say panalona ed kairapan so sananey nin pamaakaran a ditan et apaneknekan a makatulong so konseho na Biblia. Alimbawa, say panagsigarilyo tan panagbuanges, a namparan sumlang ed saray prinsipyo na Biblia, so mandarak ed limitadon kayarian. (Uliran 23:19-21) Niarum ni, irerekomenda na Biblia so inkakuli, lapud say makulin too so mas maganon makaromog na paraan pian taganoen so pamilya to nen say sakey a mangiras odino say sakey a maganon nadismaya. (Uliran 6:6-11; 10:26) Sakey ni, say itulok ed simbawa a sumpad “iyibeg ed saramay manggagawa na ag-inkatunong” so mangamper ed sakey a too diad ibaling ed saratan a bengatla a singa say krimen odino sugal bilang paraan pian talonaan so kairapan. (Salmo 37:1, NW) Saratan ya ag-agamil so singa mangiyopresi na tampol a solusyon ed pinansyal iran kairapan, ingen ta ampait a tuloy so bunga ra ed arapen.

28-30. (a) Panon a say pangiyaplika ed saray prinsipyo na Biblia so tinmulong ed sakey a Kristianon bii pian makatalona ed inkaduka? (b) Diad anto so papaneknekan na saray eksperiensia na nilibulibon Kristiano a walad duka iran kipapasen?

²⁸ Kasin sayan konseho so peteg a makatulong ed saraman so duka a tuloy, odino sakey lambengat a teoryan marakep a dengelen. Say ebat so, Say simbawa so matalona, unong ya ipanengneng na dakel iran eksperiensia ed intiron mundo. Bilang sakey ya alimbawa lambengat, sakey a Kristianon bii ed Asia so abalo, andian na anapan, tan walaan na tobonbalon lakin anak pian asikasoen. Panon a say Biblia so tinmulong ed sikato tan ed anak to?

²⁹ Sikato so makuli, unong ya isisimbawa na Biblia, tan ginmapon mandait na saray kawes pian saraya so ilako. Lapud sikato so matua tan napanmatalkan, unong met ya isisimbawa na Biblia, ag-abayag sikato so awalaan na saray suki. (Colosas 3:23) Insan, sakey a kuarto ed abung to so impagmaliw ton melag a pakanan tan kinabuasan ya ombangon ed alas kuatro pian iparaan so taganon ilako, tan saya so akaarum ed aanapen to. “Anggaman ontan,” ikuanto, “nakaukolan mi so manbilay a simpli.” Ingen ta sikato so sinononot ed simbawa na Biblia: “No wala siri pantagano tayo tan kawesen tayo, pasaragen tayo komon ’ya.”​—1 Timoteo 6:8.

³⁰ Inyarum to: “Anggaman manbibilay ak ed inkaduka, agak sinmanok nisay nanermen. Say katuaan na Biblia so amano ed siak na positibon panmoria.” Niarum ni, aromog ton samay makatantandan sipan ya inter nen Jesus so peteg ya akatulong ed sikato. Inkuanto: “Ingen anapen yo nin unona so panarian, tan say inkatunong to, et amin iraya a bengatla [materyal iran pankaukolan] niarum ira ed sikayo.” (Mateo 6:33) Lapud inyuna to ed bilay to so serbisyo ed Dios, naeksperiensia to ya anggan panon et sikato so lawas makakaawat na materyal iran pankaukolan ed nanduruman dalan. Saray eksperiensia na sayan Kristianon bii, no iyulop ed saramay agnabilang nin arum a dukan Kristianos, so mangarum na paneknek a say konseho na Biblia so peteg a matalona.

31. Anto so nagawa sano tumboken tayo so konseho na Biblia, tan anto so tasian na sayan katuaan?

³¹ Diad sayan kapitulo, samet lambengat so impanalambit tayo ed baleg a kayamanan na konseho tan simbawa a lugan na Biblia, tan anengneng tayo so pigara lambengat a kipapasen a ditan et tinmalona iyan konseho. Saray eksperiensian asalambit so nayarin ondakel ed libulibon danay. Mabetbet a sano tumboken na totoo so Biblia, sikara so nagunggunaan. Sano ipulisay da itan, sikara so manirap. Anggapoy arum a koleksyon na konseho, kadaanan odino moderno, so ontanlan naulit-ulit a makagungguna tan onaplika ed totoo ed amin a rasa. Say makabat a konsehon singa saya so imposiblin kakabatan lambengat na mamasiken. Say katuaan a say Biblia so mayaman a simpenan na ontan a kakabatan so mabiskeg ya ebidensian satan et Salita na Dios.