Kasin Panisiaan na Amin a Klerigo so Ibabangat Da?

KAPATEPATEY labat na masiken na bii. Impaliwawa na pari da a say masiken to so agni magenap a maong pian direktamintin onla’d tawen nisay mauges pian ibaki ed mangapuy-apoy ya impierno. Kanian, unong ed pari, sikatoy manasagmak na dusa anggad sikato lay onkualipika ed tawen. Binayaran na bii so pari a mangidasal ta pian agla pigan nibulos so masiken to ed purgatoryo ed maganon panaon. Kontento lay balo ed saya, a liknaen ton sisiaen met na pari iray masimoon a sisiaen to.

Diad padesir mo kasin nadismaya so balo no naamtaan ton say pari da et talagan agmanisia ed dusa kayari patey? Dakel so naaaburido a makaamtan dakerakel a klerigo so agmanisia ed karaklan ya ibabangat dan mismo. Onia so ibabaga na National Catholic Reporter, diad pangipapaimano ed tatawagen a “mas graben problema na saray klero nen say sekso,” kuanto: “Diad saray klero ed inkalapagan, dakel so agla manisia ed kiwawala na Dios odino saray doktrinan tumang tan dusa odino say kioli . . . a say kulturay klero so mangitatarok ed sayan agpanisia bilang manunan kabiangan na panmoria na saray klero, a singano makelpa.”

Arum a relihyon so nipapaarap met ed mipadparan problema. Sakey a surbi na saray klero ed Church of England so angiparungtal a dakel so “agmanisia ed manuna iran kabiangan na tradisyonal a Kristianon pananisia a singa say impananak na birhin, saray milagro nen Jesus tan say komaduan isasabi na mesias,” so inreport na Canberra Times na Australia.

Intepet na managsulat ed relihyon a si George R. Plagenz nipaakar ed sakey a ministro no panon ton nisalaysay, diad maong a konsiensia, so kredo ya agto panisiaan a mismo. Inkuan na sakey a ministro ya uumanen to labat iray manangilukas a salita na kredo a, “Sisiaen ko.” Inkuanto: “Inggapok so kredo diad pangikuan na, ‘Manisia IRA ed Dios say Ama a Makapanyarin-amin . . .’” Tinawag nen Plagenz itan a pansimpisimpitan a “say sankabalgan a palikdo ed bansa.”

Makapaermen, say ontan ya agpanisia tan ag-inkasimoon na saray klero so manidismaya ed dakel a totoo nipaakar ed relihyon ed inkalapagan. Balet aliwan satan lambengat so makapaaburidon aspekto na relihyon natan. Maslak a mimimisa so nababangatan lan say Biblia et Salitay Dios. Kasin nasurprisa ira ed pakaamta ya arum ed abayag lan aawaten iran doktrinay relihyon et agnibabangat ed Biblia? Singbaten na ontumbok ya artikulo so sakey ya alimbawa.