Say Kakabatan Pian ‘Naamtaan so Pansumpalan ed Kaunoran’
“SIKARA so totoon abalang da lay maong a pakatebek da tan andian iray pakatalos. No makabat ira, natalosan da iya tan naamtaan da so pansumpalan da ed kaunoran.”—Deuteronomio 32:28, 29, Beck.
Sarayan salita so imbaga nen Moises ed saray Israelita sanen manalalagey ira ed ketegan na Insipan a Dalin. Impasakbay nen Moises so nipaakar ed panaon sano italirak day Jehova tan agda imanoen iray pansumpalan na saray kiwas da. Diad saray siglon sinmaginonor, saray totoo na Israel—pati say dakel ya arari—so angibaliwala ed saray pasakbay na Dios.
Alimbawa, amta nen Solomon so madibinon ganggan ya agmangasawa na saray managdayew ed dirios ya aliwan si Jehova. (Deuteronomio 7:1-4) Anggaman kuan, sikatoy angasaway “dakel a sankaili a bibii.” Say resulta? Insalaysay na rekord na Biblia: “Agawa, sanen si Solomon masiken la a saray asawa to pinapawil da so puso to ya ontumbok ed saray dirios da; et say puso to sikato so aliwa a naskey ed Jehova a Dios to, singa say puso nensaman nen David ya ama to.” (1 Arari 11:1, 4) Anggaman makabat a too, kinmulang si Solomon na maong a pakatebek pian ‘naamtaan so pansumpalan ed kaunoran’ no sikatoy ontunganga ed ganggan na Dios.
Komusta itayo balet? Napaliisan tayo so pirmin ot-ot no nonoten tayon maong so posiblin pansumpalan na saray desisyon ed bilay. Alimbawa, saray Kristiano so nasisimbawan ‘linisan da komon so inkasikaran dili ed amin a tilol na laman tan espiritu.’ (2 Corinto 7:1) Makabat iya, balet ta dakel so andian na maong a pakatebek pian amtaen so pansumpalan ed kaunoran no ibaliwala ray makabat a konseho nen Pablo. Alimbawa, dudutakan na dakel a kalangweran iray kalamanan da diad panagsigarilyo, ya iisipen dan saya so mangiduman maong ed sikara tan ompatnag iran matakken la. Agaylan makapaermen ta diad banda’d kaunoran na bilay da et pigara so anagmak na saray depekto ed puso, kanser ed bala, odino emphysema bilang nansumpalan!
Importanti so seryoson pangonsidera ed saray pansumpalan na saray desisyon tan kiwas tayo. Tekep na maabig a rason, insulat nen Pablo: “Antokaman ya itanem na too satan met so anien to. Ta say mantanem na nipaakar ed laman ton dili, dia ed laman manani na kabulok; balet say mantanem na nipaakar ed espiritu, dia ed espiritu manani na bilay ya andi angga.”—Galacia 6:7, 8.