“Maliket ya Asawan Laki na Makapaay-ayat ya Asawan Bii”

TUNGGAL paminsan et walaray totoon direktaan a mangaakusan saray Tastasi nen Jehova so mamubuyak ed saray panamaley. Balet, ipapanengneng na saya ya aliwan tua iya lapud dakerakel so matalonan panamaley anggaman sakey labat a kapareha so Tasi nen Jehova. Nagawan maliket iray panamaley lapud pananumbok ed konseho na Biblia nipaakar ed bilay na pamilya, a singa ipapanengneng na onggendan a sulat a niimprinta ed sakey a dyaryo a Pranses.

“Diad loob na ngalngali 28 taon la natan, siak so maliket ya asawan laki na makapaay-ayat ya asawan bii a sakey ed Tastasi nen Jehova. Pinabaleg toy limaran ananak ko, a duara ed sikara so sioman to, tekep na parehon panangasikaso tan ontanlan panangaro. Lapud diad kaplesan et sakey ak a direktor na kompanyan walaay 45 empleyado nipasegurok ed sikayon balbaleg a talagay nitulong to’d aligwas na propesyon ko. Kanian sanen abasak ed naynay kon babasaen a peryodiko a saray Tastasi nen Jehova kuno et kasigensigenan ed lugar a Lot-et-Garonne, denisidik ya iparungtal so napanmatalkan a paneknek.”

Inkuan met na sulat: “Ag-ira mansisigarilyo nisay manbuebuek. Kasin kasigensigenan iya? Sikaray maabuloy a Kristiano ya agda ipipilit ed siopaman iray totontonen a tutumboken da. Imbes, sikaray alimbawa ed dakel a pamaakaran. . . . Ag-ira napipibali ed saray mabanday a gawa nipaakar ed pinansyal odino ed panaglako na druga. Ag-ira mansasamba nipaakar ed agpipiasawa, tan nipasegurok ed sikayo a normal so panagbilay da. . . .

“Nayarin nitepet yo ed siak: Akin balet ya aliwa kan sakey ed Tastasi nen Jehova? Lapud nakakaukolay Kristianon pananisia tan mapeget iran moralidad, tan sarayan bengatla so mairap a naromog ed limog na kaslakan a totoo.”