Balansien so Kimey tan Panagrelaks

“SAY panagrelaks so marakdakep a kawes, balet ta ag-ombayag no naynay ya isulong.” Diad sarayan salita, say agkabat a managsulat so matukotukoy a mangiyiilusra ed kablian na panagrelaks. Balet, ipapanengneng to a nepeg a balansien itan tekep na mabungan kimey.

Sayan pamaakaran so tinukoy met na apuyanan a managsulat ed Biblia a si Solomon. Sayan makabat ya ari so angipabidbir ed duaran inkaalablabas a kaukolan a paliisan. Unona, inkuanto: “Say maatiw pandakopen to so saray lima to, tan kanen to so dili a laman to.” (Eclesiastes 4:5) On, say inkangiras so sengegay iduka na sakey. Bilang pansumpalan, iyan to’d kapeligroan so bunigas na sakey a mangiras, pati say bilay to ni ingen. Diad biek a dapag, walaray pigaran mangisasakripisyo ed amin a bengatla nisengeg ed impasyan kimey. Deneskribe nen Solomon so andi-tundan pankekesaw da bilang “kaapaan tan panguusil ed dagem.”​—Eclesiastes 4:4.

Tekep na maabig a rason, inrekomenda nen Solomon so inkabalansi: “Magmaong so sankaakop, a tekep na kareenan, nen duaran kaakop a tekep na sagpot tan panguusil ed dagem.” (Eclesiastes 4:6) Nepeg a “manliket a maong [so sakey a too] ed kimey to”​—salanti, panapanaon et nepeg ton ipanaon a panggayagaan so nanaalmo to. (Eclesiastes 2:24) Tan nepeg a walaray arum a bengatla ed bilay likud ed sekular a trabaho. Say pamilya tayo so makanepegan na panaon tayo. Indanet nen Solomon a say manunan obligasyon tayo et, aliwan say sekular a trabaho, noagta say serbisyo ed Dios. (Eclesiastes 12:13) Kasin sakey ka ed saramay manggagayaga ed balansin panmoria ed kimey?