Kinontra na Atateng so Panaglabi na Maestro

Sakey a maestro ed elementarya diad Cassano Murge, Italya, so angipasempet ed pigaran eskuela to na saray istiker. Sarayan istiker, a ginagalan ipaskil ed arap na puerta, so pakabasaan na: “Katoliko Kami. Kekerewen ed Tastasi nen Jehova ya ag-ontotoktok ed sayan puerta.”

Arum ed atateng na sarayan eskuela, anggaman aliwan Tastasi nen Jehova et pirmin kinontra ra so ginawa na maestro. Unong ed dyurnal a Muoviti Muoviti, inyakusa na atateng a say ‘pangiter na onian mensahe ed ugugaw so pansengegay pangipulisay da la ed siopaman a midumaay kaisipan da ed sikara odino paarawien da so siopaman lapud “duma” so relihyon to.’ Sakey ya ateng a nansulat ed dyurnal so anawag ed istiker bilang “bukel a makaderal, say bunga na inka-ignoranti tan kabaglan.”

Singa ipapanengneng na sayan report, bidbiren na dakel a makatunongan a totoo a walay kapeligroan ed pangitanem na bukel na panaglabi. Rerespetoen da met so Kristianon ministeryon gagawaen na Tastasi nen Jehova diad intiron Italya tan ed sankamundoan. Akin ya agmo kerewen a mismo ed Tastasi nen Jehova ya ‘ipaliwawa so ilalo ra’? Magunaet dan ipaliwawa itan ed sika, tekep na “aralem a respeto.”​—1 Pedro 3:15, NW.