Maridios a Kakabatan​—Panon Itan a Nipatnag?

“SAY kakabatan na duka a too sikato so namudmora, tan saray salita to ag-ira pakadenglen.” Diad oniaran salita a sinampotan nen makabat ya Arin Solomon so istoryan nipaakar ed mapaabeba balet ta makabat a laki ya angisalba ed intiron syudad manlapud kadederal. Balet, makapaermen ta, “anggapo so too ya akanonot ed saman a duka a too.”​—Eclesiastes 9:14-16.

Onkiling so totoon manleglemew ed totoon anggapoan da, anggano sarayan pobri so akapanggawa na agaylay abig iran bengatla. Ontan so agawa ed si Jesus. Si Isaias so angipropesiya nipaakar ed sikato a: “Sikato so amudmora, tan inkaindan na saray totoo; sakey a too na saray er-ermen, tan amta to so ermen.” (Isaias 53:3) Si Jesus so minudmora na arum lapud ta sikatoy andian na posisyon odino inkaprominenti a singa saray lider ed agew to. Balet ta, mas matalonggaring so kakabatan to nen say kakabatan na siopaman nin makasalanan a too. Agbidbiren na saray kabaleyan nen Jesus a sayan “anak na panday” so walaan na ontan a kakabatan tan sikatoy akapanggawa na ontan iran makapanyarin gawa. Balet, satan so mapeligron lingo, ta intuloy na salaysay ya inkuan ya “agnanggawa’d man [si Jesus] na dakel a gawan makapanyari nisengeg ed agda panisia.” Agaylay inkaperdi na saraman a totoo!​—Mateo 13:54-58.

Komon ta agtayo nalilingon singa sikara. Ta oniay inkuan nen Jesus: “Say kakabatan napatnagan la ed saray gawa to.” Say pakabidbiran ed saramay manusumpal ed kimey na Dios tan manginanabang ed mangatatawen a kakabatan et aliwan diad panamegley na posisyon odino kipapasen ed sosyedad, noagta diad “maong a bunga” ya ipapatnag da​—say nibase’d Biblia a pananisia tan saray gawa ra.​—Mateo 7:18-20; 11:19.