Kristianon Panangaro​—Aliwan Diad Salita Labat

SANEN apoolan so abung da ed Trinidad, asimot so kayarian na pamilyan Bartholomew nilikud labat ed bilay da. Sikara so impanayam na sakey a kanayon diad abung to ya asingger ed lugar da balet ta ag-anggangga ditan so istorya.

Si Olive Bartholomew so sakey ed saray Tastasi nen Jehova tan saray kakongregasyonan to, ontan met ed saray membro na kongregasyon ed kabangibang, so nantutulongan parad kipaalagey ed naandin abung na pamilya to. Sakey a komite so atibukel ta pian mangasikaso ed proyekto, insan inggapo so panagpaalagey. Manga 20 Tastasi pati ed pigaran kakaabay so nantrabaho. Anggan saray tobonbalo so akitulongan met, bangta say arum a wadman so nampa-merienda.

“Nikelkelawan a tuloy so pamilyak,” so inkuan nen Olive, a singa nibalita ed Sunday Guardian diad Trinidad. “Aliwan Tastasi so pamilyak, tan say masiken ko so talagan nikelkelawan ed nanenengneng to.”

Diad panegek to ed impansagpot da, say manangasikaso ed proyekto so angidanet a saratan a kiwas so peteg a pakapangibiigan na tuan Inkakristiano. “Agkami labat mankakabkaabungan pian itongtong so nipaakar ed aro,” inkuanto. “Panggugunaetan min ikana so ipupulong mi.”​—Juan 13:34, 35.

[Litrato ed pahina 32]

Si Olive Bartholomew tan say masiken to