Magnayon a Kablian so Akindalem a Kalimgasan

ONIAY INKUAN NA MASIKEN LAN MATOOR A KRISTIANO: “IPAPARA NA SAKEY A KALANGWERAN A LAKI SO KALIMGASAN ED MARAKEP YA UGALI.”

On, say abayag lan tendensia na too ya importanti ed sikatoy akinpaway a kalimgasan, so mabetbet a mansumpal ed lingon panmoria ed akindalem iran kablian. Balet, antokamay itsura tayo, say nenengnengen na Manamalsa tayo et say akindalem ya inkatoo tayo. Diad onian dalan a sikatoy sankaabigan a napan­uliranan no nipaakar ed suston panmoria ed sakey a too. Unong ed Biblia et oniay inkuan a mismo na Dios: “Si Jehova onnengneng ya aliwa a singa say too ya onnengneng; ta say too onnengneng ed mapaway a nengneng, balet si Jehova onnengneng ed puso.”​—1 Samuel 16:7.

Say Dios so Lapuan na tuan kalimgasan na too, tan ipaparungtal na Salita to a sano determinaey tuan kualidad na sakey a too, say sankaimportantian et saray espiritual a kualidad. Kuan na Biblia: “Say dakep sikato so mamalingo, tan say kalimgasan sikato so apa; balet say bii ya antakot ed Jehova, sikato naani narayew.” (Uliran 31:30) On, nayarin disimolaen na akinpaway a ganggana so makapuy ya ugali. (Ester 1:10-12; Uliran 11:22) Anggaman say pisikal a kalimgasan so onkupas diad ilalabas na panaon, say akindalem a kalimgasan​—saray kualidad na puso​—so ombulaslas tan mansiansia.

Agaylan makabat sirin a bayuboan iray kualidad a singa say aro, gayaga, deen, andukey a panagtepel, panangasi, kamaongan, pananisia, kauyamoan, tan dangka! (Galacia 5:22, 23) Diad ontan et nawalaan itayoy akindalem a kalimgasan, a talagan walaan na magnayon a kablian.​—1 Pedro 3:3, 4.