‘Pisalamatan Iray Tastasi nen Jehova Lapud Relihyoson Kawayangan’

“SAKBAY mon palalbogan na kapot so sakey a Tasi nen Jehova,” kuan na sakey ya artikulo ed dyaryon USA Today, “umameng mo pa nin magano so makapabaing a panamasegsegang a sinagmak da ed apalabas, ontan met ed baleg ya impakatulong da ed Sankaunaan ya Impan-amenda na saray kawayangan a panggagayagaan tayon amin.” Apasegsegang iray Tastasi nen Jehova ed Estados Unidos diad dekada na 1940, lapu ed agda pansaludo na bandira, nilikud ed arum niran bengatla.​—Exodo 20:4, 5.

Diad loob na limaran taon ed baetan na 1938 tan 1943 et manga 30 a kaso so insegep ed Korte Suprema na E.U. sumpad Tastasi nen Jehova. Oniay kuan na artikulo: “Mabetbet a saray Tastasi so amalesa ed saray importantin isyu nipaakar ed Sankaunaan ya Impan-amenda kanian nisulat nen Judge Harlan Fiske Stone, ‘Nepeg a tumangan iray Tastasi nen Jehova lapud tulong da ed impakaresolbi ed saray problema ed ley nipaakar ed saray kawayangan na sibil.’”

Kanian, diad pansampot la na artikulo et oniay inkuanto: “Kaukolan a misalamat so amin a relihyon ed saray Tastasi nen Jehova lapud inlaknab na [relihyoson] kawayangan.”

[Picture Credit Lines ed pahina 32]

Say bilding a walad benegan: Nilitrato nen Josh Mathes, Collection of the Supreme Court of the United States; leksab a litrato, saray huis: Collection of the Supreme Court of the United States