Inkasimoon—Makaroyroyo, Balet Kasin Magenap la Itan?
KASIN talagan makaroyroyo so inkasimoon ed inagew-agew a panagbilay tayo? Inukeran na sakey a diksionaryo so “inkasimoon” bilang “andian na pankuankuanan odino pansimpisimpitan; inkamatua; inkaprangka; inkapuro.” Malinew, sayan kalidad so makagunggona diad pamaelet na maabig a relasyon ed arum. Onia so bilin nen apostol Pablo: “Ontulo’kayo ed amin a bengabengatla ed saray kakatawan yo unong ed laman; aliwa a lingkor ed mata, a singa saray managpaliket ed saray totoo, noag dia ed malinis a puso, a tekepan na takot ed Katawan.” (Colosas 3:22) Wala ta so agmangapresya ed pakawalaan na masimoon ya empleyado? Natan, mas walaan na tsansa iray masimoon a totoo a makaromog tan mamasiansia ed saray trabaho ra.
Anggaman ontan, magmaliw a makaroyroyon maong so inkasimoon no apektaen na satan so relasyon tayo ed Dios. Nanggayagaan na saray Israelita nensaman so bendisyon na Dios sanen maalwar dan inunor iray ganggan tan saray piesta. Diad panisingbat nen Pablo ed kalinisan na kongregasyon, pinaseseg to iray Kristiano: “Ngilinan tayo so piesta, aliwa a pati daan a lebadura, aliwa met a dia ed lebadura na panag-isip na mauges tan say karelmengan, noag dia ed anggapo a lebadura na tinapay na kalinisan tan katuaan.” (1 Corinto 5:8) Pian abobonan na Dios so panagdayew tayo, aliwa labat a makaroyroyo so inkasimoon noagta makana met itan. Ingen, imanoen a say inkasimoon et aliwan magenap. Nepeg a tekepan itan na katuaan.
Nayarin masimoon a panisiaan na saray nanggawa tan pasahero na Titanic a say pampasaheron barko so ag-onlereg. Balet, diad primeron biahe to nen 1912, dinmumbo itan ed abalbaleg a yelo tan 1,517 a totoo so inatey. Nayarin masimoon a panisiaan na saray pigaran Judio nen inmunan siglo so paraan na panagdayew da ed Dios, balet say seseg da so “aliwa ya unong ed kakabatan.” (Roma 10:2) Pian abobonan itayo na Dios, saray masimoon a sisiaen tayo so nepeg a nibase ed suston impormasyon. Saray Tasi nen Jehova ed komunidad yo so maliket ya ontulong diad pangusisa yo ed no antoy nasasaglawi diad panlingkor ed Dios a walaan na inkasimoon tan katuaan.