Say Pangdem na Katawan​—Anto Itan?

ANTOY nanonotan mo no narengel mo so balikas a “say pangdem na Katawan”? Dakel a totoo so makanonot ed samay pandinayewan a tuloy ya impinta nen Leonardo da Vinci, diad Milan, Italya (1452-1519). Diad tua et say Pangdem na Katawan so mabetbet ya uusaren a pinagkatema na saray pintor, managsulat, tan musikero diad loob la na saray siglo.

Balet, anto so Pangdem na Katawan, tan anto so kakanaan na satan ed saray totoo diad sayan koma-21 a siglo? Ipanengneng ed sika na saray ensayklopedia tan diksionaryo a say Pangdem na Katawan et say pangdem nen Jesu-Kristo a kaiba iray apostol to antis na masakripisyon impatey to. Lapud saman so unor lan pangdem nen Jesus a kaiba iray matoor a patumbok to, saman so tinawag na arum ya Unor a Pangdem. Tan lapud saman so inletneg a mismo nen Katawan a Jesu-Kristo, matukoy so tawag a Pangdem na Katawan.

Diad loob na pigaran siglo, dakel so angisakripisyo ed bilay da lapu ed ipapasen dan makana iran gagala. Arum ed sarayan ipapatey so apinabangan na pigaran totoo diad dakel a taon. Balet, no ikompara iratan a masakripisyon ipapatey ed impatey nen Jesu-Kristo, arawin tuloy so kaimportantian na impatey nen Jesu-Kristo ed saratan, anggaman pandinayewan iratan. Niarum ni, anggapoy ipapatey diad sayan magonigon ya awaran na katooan a posiblin nawalaan na ontan lan malaklaknab ya epekto. Akin?

Pian naebatan itan tan pian natulongan kan mangamta no anto so kakanaan na Pangdem na Katawan ed sika, imbitaan mi kan basaen so ontumbok ya artikulo.