Kasin Nepeg Tayoy Onkerew na Tulong ed Saray Anghel?

KASIN manepeg so ontawag ed saray anghel sano nagogonigon? Ontan so iisipen na dakel a totoo. Diad tua, oniay imbaga na New Catholic Encyclopedia: “Manpipikasi so too ed . . . saray anghel . . . balet dia lambengat ed pantalos a sikaray onaakton manamegley ed Dios parad sikatayo.” Kasin nepeg tayoy ontawag ed saray anghel pian onakton manamegley parad sikatayo?

Naromog ed Salita na Dios so duara lambengat a ngaran na matoor ya anghel na Dios, si Miguel tan si Gabriel. (Daniel 8:16; 12:1; Lucas 1:26; Judas 9) Lapud asalambit ed Biblia irayan ngaran, natebek tayo a kada anghel et sakey a nikaduman espiritun persona a walaan na ngaran, aliwa lambengat a biskeg odino puersa ya andian na persona. Ingen, arum ya anghel so ag-inmabuloy a mangiparungtal ed ngaran da. Singa bilang, sanen kinerew nen Jacob ed sakey ya anghel a binmisita ed sikato ya ibaga to so ngaran to, sikatoy ag-inmabuloy. (Genesis 32:29; Uko-ukom 13:17, 18) Ag-inlista diad Biblia so kangaranan na saray anghel, pian say totoo so ag-alablabas a mangimano ed sikara.

Kabiangan ed saray kimey na anghel et say pangipasabi na saray mensahe na Dios ed totoo. Diad tua, saray orihinal a Hebreo tan Griegon salita ya impatalos ya “anghel” et literal a mankabaliksan na “mensahero.” Balet, saray anghel so agmanlilingkor bilang manamegley a mangitatarok ed saray pikakasi na too diad trono na Sankatageyan. Denetermina na Dios a saray pikakasi so ipasabi ed sikato diad ngaran na Anak to, si Jesu-Kristo, ya angibagan: “Antokaman a kerewen yo naani ed Ama lapu ed ngaran ko, iter to ed sikayo.”​—Juan 15:16; 1 Timoteo 2:5.

Si Jehova a Dios so lawas akaparaan ya ondengel ed sikatayo no onasingger itayo ed sikato ed dugan paraan. Oniay ipapaseguro na Biblia: “Si Jehova asingger ed amin ya ontawag ed sikato, ed amin day ontawag ed sikato ed katuaan.”​—Salmo 145:18.