Kasin say Dios so Natetel ed Saray Problema Tayo?

SANEN graben naapektoan so utek na wala la’d edad ya anak a bii nen Marion lapud aksidente, ginawa nen Marion so bengatlan gagawaen met na maslak ed sikatayo.a Sikatoy nampikasi ed Dios parad tulong. “Natan ko labat alikna so inkapakaskasi tan inkabegtebegtew,” kuan nen Marion. Diad saginonor, linmoor so kipapasen na anak to, kanian si Marion so ginmapon nanduaruwa ed Dios. Intepet to: “Akin ya onia so nagagawa?” Agto natalosan no panon a sikatoy nitepel a paulyanan na maaro tan manangiyansakit a Dios.

Kaslakan la so eksperiensya nen Marion. Momoriaen na dakel a totoo ed sankamundoan ya ikakaindan ira na Dios diad panaon na pankaukolan. “Nagogonigon ak nin siansia ed saray tepet ya ‘akin et aabuloyan na DIOS iray mauges a bengatla,’” kuan nen Lisa kayarin pinatey so apo ton laki. “Wala ni pananisiak ed Dios, balet aliwa lan singa dati a mabiskeg.” Mipadpara, kayarin asagmak na sakey a bii so agmakatunongan a trahedya a mangilalanor ed ugaw nin anak to, oniay inkuan to: “Siak so agniligliwa na Dios ed agawa. Anggapo so antokaman a pakapatnagan na panangiyansakit odino panangabagey to’d siak.” Inkuan to ni: “Agkon balot naperdona so Dios.”

Nababayuboan na arum so sakit na linawa ed Dios sano onnenengneng ira ed mundon kawalaan da. Naiimano da iray bansan kasmak so kairapay-bilay tan pakaeerasan, saray desperadon tinmakas ed bakal, dakerakel a naulilan ugugaw lapud AIDS, tan minilyon a totoon sasaloten na arum nin sakisakit. Sano nagawa iraya tan saray mipadparan trahedya, dakel so manetetel ed Dios lapud ompatnag a pamapaulyan to.

Balet, say katuaan et agnayarin itetel ed Dios iray probleman manasalot ed katooan. Diad tua et walaray makatunongan a rason pian panisiaan a magano lan panampoten na Dios so kaugsan a sasagmaken na katooan. Pasesegen mi kan mangibukay ed ontumbok ya artikulo tan imanoen a say Dios so peteg a mangiyaansakit ed sikatayo.

[Paimano ed leksab]