Kasin Aanamoten Mo Iray Pankanawnawa Pian Ipaamta Iray Sisiaen Mo?
“WALA ta so absoluton katuaan?” Ontan so tema na nasyonal a kontis ed panagsulat na salaysay diad Poland. Oniay impaimano na saray instruksion parad satan a kontis: “Agtayo kaukolan so absoluton katuaan. Anggapoy mankaukolan ed saya. Tutal, anggapo met a talaga so absoluton katuaan.” Si Agata, a sakey a haiskul a mantaon na 15 tan sakey a Tasi nen Jehova, so anganamot ed satan a pankanawnawa pian ipaamta ed arum so pananisia to.
Ta pian niparaan to itan, si Agata so nampikasi ni ed si Jehova pian paiwanwan, insan ginapoan toy angolekta na saray reperensyan mitukoyan ed satan a tema. Aromog toy mipadparan impormasyon diad Say Panag-Bantayan na Hulyo 1, 1995. Inaon to so intepet nen Poncio Pilato ed si Jesus: “Anto so katuaan?” (Juan 18:38) Insulat to a satan a tepet et pakapatnagay panagleglemew, a singa to ibabagan: ‘Katuaan? Anto itan? Anggapo ’tay katuaan!’ Inyarum ni nen Agata a: “Say intepet nen Pilato et angipanonot ed siak nipaakar ed saray instruksion parad pansulat na salaysay.”
Insan to siningbat so lapuan na panguman-uman na estandarte, salanti, say ideya a say tua ed sakey a too et nayarin aliwan tua ed arum, balet ta ompan saratan a dua et “tua.” Inlaktip to met iray tepet a singa say, “Siopa ed sikatayo so makpel ya onlugan ed eroplano, no agtayo panisiaan ya absoluton katuaan iray ley na aerodynamics?” Insan to impaimano so Biblia, a kuan to: “Say panagmatalek ed Salitay Dios so malet a niletneg ed napekderan iran katuaan.” Imbaga ton sikatoy mailalo a saramay masimoon a mananap ed sayan absoluton katuaan so man-anos a maong pian naromog da itan.
Si Agata so analo, tan sikatoy akapanpulong met ed arap na interon klase. Pigara ed saray kaeskuela to so angawat ed opresi ton panagaral na Biblia. Pisalsalamatan nen Agata so impanganamot to ed pankanawnawa pian ipaamta ed arum iray sisiaen to. On, no alerto kan singa si Agata ya itongtong so pananisiam ed arum, manresulta itan na maabig. Antoran pankanawnawa so nayarim ya anamoten?