TEPETEPET NA SARAY MANBABASA
Kasin samay imbaga nen David ed Salmo 37:25 tan imbaga nen Jesus ed Mateo 6:33 et mankabaliksan ya agbalot abuloyan nen Jehova ya naerasan so sakey ya Kristiano?
Insulat nen David ya ‘agnin balot akanengneng na matunong ya apaulyan, ya saray ananak to et mipabpayabol na naakan.’ Imbaga to itan base ed saray naeksperiensya to. Sikatoy agbalot pinaulyan na Dios. (Sal. 37:25) Balet agkabaliksan na samay imbaga nen David ya aglan balot nakulangan ed materyal so sakey ya lingkor na Dios.
Anggan si David et asali toy nanirap. Say sakey ed saratan et sanen ibabatikan toy Saul. Ngalngali anggapoy naakan to tan saray kaiba to, kanian kinmerew na tinapay. (1 Sam. 21:1-6) Diad saman a pankanawnawa et nibagan kinmulang na naakan si David. Balet diad saman ya mairap a kipapasen, amta ton sikatoy agpinaulyan nen Jehova. Diad tua, anggapoy nabasa tayod Biblia ya akipayabol si David pian walay naakan to.
Diad Mateo 6:33, impaseguro nen Jesus ya iter na Dios so pankaukolan na saray matoor ya lingkor to ya mangiyuunad Panarian. Imbaga nen Jesus: “Itultuloy yo sirin ya anapen nin unona so panarian tan say inkatunong to, tan sarayan amin a bengatla [kaiba lay naakan, inumen, tan kawes] so niarum ed sikayo.” Balet, impaimano met nen Jesus ya saray ‘agagi’ to et posiblin naerasan lapud panamasegsegang. (Mat. 25:35, 37, 40) Agawa itan ed si apostol Pablo. Asali toy naerasan tan napgaan.—2 Cor. 11:27.
Impasakbay nen Jehova ya napasegsegang itayo met diad nanduruman paraan. Nayarin abuloyan to ya nasali tayoy manirap legan tayon papaneknekan ya aliwan tua imay akusasyon na Diablo. (Job 2:3-5) Alimbawa, wala ray agagi tayo, singa saramay nipriso ed panamairapan a kampo na Nazi, ya apairap a maong lapud panamasegsegang. Ginagala na saray Nazi ya agpakanen na susto iray Tasi pian ikompromiso day pananisia da. Saraman ya matoor a Tasi et inunor day Jehova tan agto ran balot pinaulyan. Inabuloyan to ran napairap ya singa ed arum ya Kristianon makakaeksperiensya na nanduruman subok. Balet, nia so segurado: Tutulongan nen Jehova so siopaman ya napapairap lapud ngaran to. (1 Cor. 10:13) Tandaan tayo may nabasad Filipos 1:29: “Niiter ed sikayo so pribilehyo nisengeg ed si Kristo, ya aliwa labat a manisia kayo ed sikato, noagta manirap kayo met nisengeg ed sikato.”
Insipan nen Jehova ya sikatoy kaiban lanang na saray lingkor to. Alimbawa, oniay ibabaga na Isaias 54:17: “Anggapo so ayura ya agawa a sumpa ed sika ya onaligwas naani.” Saya tan saray arum nin sipan so garantiya ya protektaan na Dios iray lingkor to bilang grupo. Balet, bilang indibidual, say sakey a Kristiano et posiblin nasubok, tan nayarin ompatey ni ingen.