Kasin Antam La?

Kasin talagan inunor iray prinsipyo ed Mosaikon Ganggan diad impanresolbe ed legal iran kaso ed Israel nensaman?

ON, NO MAMINSAN. Imanoen so sakey ya alimbawa. Ibabaga na Deuteronomio 24:14, 15: “Agmo sasaolen so sakey ya uupaan a trabahador a mankakkaukolan tan pobri, balanglan sakey ed saray agagim odino dayo ed dalin mo . . . Ta no andi, sikatoy ontawag ed si Jehova lapud sika, tan mankasalanan ka.”

Diad asingger ed Asdod, walay aromog ya rekord na ontan ya kaso ya agawa nen komapiton siglo B.C.E. Oniay ibabaga na dokumento ya insulat ed sakey a langa, ya posiblin parad sakey a trabahador ed uma a pinalsaan ya agto niiter so apampaknaan ya karakel na ilik: “Nen imbeneg iran agew kayarin tinipon na lingkor mo [say inmapela] iray ani, sinmabi si Hoshayahu ya anak nen Shobay tan inala toy kawes na lingkor mo. . . . Amin ya kakaibak ya nanani legan ya ampetapetang so agew et natasian da . . . ya tua iray imbagak. Anggapoy kasalanan ko. . . . No parad gobernador et agto obligasyon ya ipawil so kawes na lingkor mo, komon ta gawaen to itan lapud panangasi! Agka komon manpapareen lapud anggapoy kawes na lingkor mo.”

Sayan apela et “aliwa labat a nipaakar ed inkadesperado na trabahador ya nabawi so [kawes to],” so imbaga na historian ya si Simon Schama. “Ipapanengneng met na saya a say inmapela et walay amta to nipaakar ed ganggan na biblia, lalo la iray ganggan ed Levitico tan Deuteronomio ya paliisan so mauges ya panagtrato ed saray mairap bilay.”