‘Maganat ya Ipulong so Salita’
1 No makaawat kayo na bengatlan amarkaay “MAGANAT,” panoy panmoria yo ed satan? Say salitan “maganat” et mankabaliksay “mankaukolay tampol ya imano.” Diad maabig a rason, binilin nen apostol Pablo iray Kristiano a ‘maganat dan ipulong so salita.’ (2 Tim. 4:2) Kasin onkiwas kayo diad tampol yon pangimano ed sayan kimey?
2 Nayarin nipakabat ed si Pablo a walaray agagin onkikiling a ‘mangiras ed saray kimey da’ bilang Kristiano. (Roma 12:11) Saya so nanlimita ed saray bunga na sagpot da ontan met ed gayaga ra a nayarin nagamoran da komon diad itulong ed arum.
3 Say Panmoria nen Jesus ed Ministeryo: Malikeliket si Jesus diad impanumpal to’d ministeryo to! Inkuanto: “Say kanen ko sikato so panggawak na linawa na saman so angibaki ed siak.” Say ehemplo nen Jesus so amakiwas ed saray babangatan to, a pinaseseg to ra diad impangikuan to’d sikaran ‘amputi la so kaumaan parad panagani.’ (Juan 4:34, 35) Say inkaganatan ya impanengneng to ed intiron ministeryo to so mapatnag sanen inkuanto ed saray babangatan to a “pikasi yo sirin ed Katawan na aanien, pian mangibaki na saray manani ed aanien to.” (Mat. 9:38) Pinabli nen Jesus a say niganggan ed sikato et manpulong, tan sikatoy determinado ya anggapon balot so makasbel ed panggawa to’d satan.
4 Komusta Itayo Met? Natan, walay pirmin inkaganatan nen say kapiganman pian ontundas ed panagpulong a kimey. Diad dakel a parti na mundo, binmuyag lay kaumaan parad panagani. Anggan diad saray daldalin a singano atatek lan apulongan, nilibo ni so nababautismoan ed kada taon. Lapud mapmaples ya isasabi na anggaan na sayan sistema na bengabengatla, walay “daakan nin gawaen ed kimey na Katawan.” (1 Cor. 15:58) Mas ni nen say dinanman a panaon, makana so pangibunek tayo diad panginabang ed arum na mensahe na Panarian.
5 Interesado tayo komon ya ipasabi ed arum so maong a balita, diad panagkabkaabungan tan inerman a pakaromogan tayo ed totoo diad teritorya. Diad sigpot a pibiang no nayadyari diad panagpulong a kimey, mabitar tayon nipanengneng ya iyuuna tayo ed bilay tayo so Panarian. (Mat. 6:33) Say inkamatoor tayo diad maganat a pangipulong ed salita so mangiter ed sikatayo na pirmin gayaga.