Manplanon Masakbay—Parad Anto?
1 Amin tayo so mannononot ed saray plano tayo ed arapen. Saramay walaan na mangaraldalin ya ilalo so manatalaran ed pambilay ya ando lan ando ed matunong a balon mundo na Dios. Balet wala iray impluensia a nayarin manamsam ed impapuson ilalo tayo. Kakaukolanen so masimoon a sagpot pian mansiansian akasentro so intereses na Panarian ed kabibilay tayo tan ag-itayo nisuawi na makatukso iran pilalek na laman.—1 Juan 2:15-17.
2 Agnatebek na mundo iray pilalek na maespiritual a totoo. (1 Cor. 2:14) Legan a pambabanikelan na arum ed katooan so ombantog, nawalaan na pakayari, odino kayamanan, panggugunaetan tayo iray espiritual a kayamanan. (Mat. 6:19-21) No sinali tayon umanen so kaisipan tayo pian itunos ed panmoria na mundo nipaakar ed arapen, kasin nadampot tayo ni iray espiritual a kalat tayo? Agmanbayag et saray minumundon bengatla so sigpot a managyat ed kapusoan tayo. Panon tayon naamper iya?
3 ‘Isulong so Katawan a Jesu-Kristo’: Say sakey a paraan pian nadetermina no kasin iyaapasakey tayoy arapen tayo ed intereses na Panarian et say pangusisa tayo’d sasalitaen tayo. Kasin naynay tayon totongtongen so nipaakar ed materyal iran bengatla tan minumundon intereses? No ontan, nepeg tayon konsideraen no kasin say puso tayo et onsusuawi la ed espiritual iran kablian. Nayarin nagkalalon kaukolan tayon iyapasakey so ‘pangisulong ed Katawan tayo a Jesu-Kristo imbes a manplanon masakbay parad pilpilalek na laman.’—Roma 13:14, NW.
4 Saray kalangweran so nayarin ‘mangisulong ed Kristo’ diad pamplanon masakbay parad panaon ya iloob da ed sigpot-panaon a ministeryo. Sakey a kalangweran a malabay a man-regular payunir so binmaleg ed sakey a kultura a say ontatalonan akaugalian na saray kalangweran a lalaki et say pagmaliw a maligen ed pinansyal. Kanian, sikatoy nigalet a maong ed negosyo anggad punton singa labat la rotina so pipiaral tan pibibiang to ed ministeryo. Sanen nanmatalek la ed saray salita nen Jesus a naromog ed Mateo 6:33 tan intunda toy datin apasakey a rotina to, sikatoy linmoob ed kareran sigpot-panaon a serbisyo. Natan, tekep na maabig a konsiensia, sikatoy manseserbi ed si Jehova, unong ya inkuanto, ‘anggad anggaay nayarian to.’
5 Ibabaga na Biblia a makabat so panplano parad arapen. (Uli. 21:5) Komon ta amin tayo so manggawa ed satan a lawas manunaan ed nonot tayo so linawa na Dios.—Efe. 5:15-17.