Alerton Mananap na Telek a Totoo ed Teritorya Yo
1 Inanatnat nen Jehova so imbitasyon a: “Gala. . . [siopaman a] malabay, mangala ed danum na bilay ya andi bayar.” (Apoc. 22:17) Kaiba iray ondarakel a bilang na telek a totoo ya onkikiwas ed sayan tawag. Bilang resulta, legan na apalabas a 7 taon, sakey a sign-language a kongregasyon tan ngalngalin 15 a sign-language iran grupo so aporma la ed Pilipinas.
2 Anggaman saray sign-language a kongregasyon tan grupo so mangiyaapasakey ed saray sagpot da ed panagpulong diad panaanap ed telek tan walay deperensia ed pakadngel a totoo diad saray teritorya ra, dakel niray ontan a totoo a kaukolan ya anapen tan pulongan ed sayan bansa.
3 Panon Kayon Makatulong? Legan a walad mapubliko iran pasen, kasin naiimano yo iray totoo a manguusar na sign language? Kasin walay kabat yo ed pantratrabahoan yo odino diad paneeskuelaan yo a walaan na kapamilyan telek? Alerton mananap ed saraman so telek legan yon gagawaen iray inagew-agew ya aktibidad yo. Balet panon yon naseguro a sikaray napulongan nipaakar ed Panarian?
4 Pangiter na Pantasi: No walay amta yon sign-language a kongregasyon odino grupo ya asingger ed sikayo, nepeg yon ipaamta ed sikara so panaayaman na telek a too. Dakel iran telek so maples ya onaligwas ed panaaral da na katuaan sano makapipilimog ira ed saray telek a Tastasi diad saray miting ed kongregasyon a nikokondukta ed Philippine Sign Language. Sirin, no walay sign-language a kongregasyon odino grupo ed lugar yo, nepeg ya ipaamta na sekretaryo na kongregasyon yo so impormasyon nipaakar ed amin a telek a totoo a wala ed teritorya yo.
5 Panon balet no anggapoy walad asingger a mangiter na espiritual a tulong ed telek a totoo diad komunidad yo? Panon kayon makatulong? Akin ya agmanggawa na panagpawil tan mitongtong ed siopaman a makarengel iran membro na sankaabungan? Iyopresi ya ipabantay so video a sign-language pian sagyaten so interes na telek a too. Pigaran manangipalapag ed Pilipinas so manggugunaet a manaral na sign language ta pian lalon epektibon napulongan iray telek. (Gawa 16:9, 10) Say brosyur a Kakaukolanen tan say libron Pikakabat so wala ed video a sign language. Dakel laran maabig a resulta so agamoran ed pangiyaaral na Biblia ya uusaren irayan kagawaan.
6 Diad pagmaliw ya alerto ed pananap ed telek a totoo ed lugar yo, naikdan yo ira na pankanawnawan onggamor ed danum na bilay a libre.—Mat. 10:11.