Agmasuyat a Manpulong!
1 Sano manparaan itayo ya onlan manpulong ed kabkaabungan, say sankabalegan a babeng et nayarin say inkamasuyat tayo a manpulong. Nayarin napugeran itayon ompaway lapud liknaan ya agpakasarag a mangipakabat ed katuaan diad “amin a totoo.” (1 Tim. 2:4) Balet kaukolan ya agtayo masuyat a mangipulong ed maong a balita. Akin ya andi?
2 Mensahe Itan nen Jehova: Ipapasabi nen Jehova so salita to panamegley na Biblia. Sano ipapakabat tayo iyan mensahe ed arum, ipapasabi tayo iray kanonotan to, aliwan saray kanonotan tayo. (Roma 10:13-15) Sano ag-awaten na totoo so mensahe na Panarian, si Jehova so talagan agda aawaten. Ingen, ag-itayo nadidismaya. Matalek itayo a sayan mensahe so mamakiwas ed kapusoan na saraman so manpirawat na pananguman ed saray kipapasen na mundo tan saramay sinononot ed espiritual a pankaukolan da.—Eze. 9:4; Mat. 5:3, 6.
3 Iyaasingger nen Jehova so Totoo: Say toon datin ag-ondengel ed sikatayo so nayarin mangawat la natan lapud anguman la iray sirkumstansya to tan say kondisyon na puso to so linmemek la. Nayarin inatnat nen Jehova natan so abig-linawa to ed satan a sakey tan ‘iyasingger to.’ (Juan 6:44, 65) Sano nagawa iya, labay tayoy akaparaan a pausar ed si Jehova tan ontulok ed anghelikon panangiwanwan diad pananap ed saratan a totoo.—Apoc. 14:6.
4 Ipapagamor na Dios ed Sikatayo so Espiritu To: Say masanton espiritu so ontulong ed sikatayo a mansalita “tekep na inkakpel panamegley na autoridad nen Jehova.” (Gawa 14:1-3, NW) No nonoten tayo a walaan itayo na sayan mabiskeg a tulong ed ministeryo tayo, ag-itayo masuyat a mangibaga na katuaan ed saray kakaabay, katrabaho, kaklase, kakanayon, de-aral odino mayaman a totoo.
5 Babangatan Itayo nen Jesus no Panon: Angusar si Jesus na makatenyeg-kanonotan iran tepet, praktikal iran ilustrasyon, tan Makasulatan a panagkatunongan. Impapuso ton impaliwawa so katuaan diad simpli, makapasagyat a paraan. Siansia nin sankaabigan irayan metodo natan. (1 Cor. 4:17) Nayarin nanduruma iray sirkumstansya a pampupulongan tayo, balet ta siansian mabiskeg ni so mensahe na Panarian.
6 Apribilihyoan itayo a pausar ed si Jehova pian tulongan so totoo diad nikaduma tan makanan paraan. Agtayo sirin masuyat a manpulong! Komon ta magmaliw itayon makpel tan abuloyan tayo si Jehova a ‘mangilukas ed pinto nipaakar ed salita’ ta pian nipakabat tayo so maong a balita ed arum.—Col. 4:2-4.