Bawasan Iray Subskripsion

Say sangan opisina so maliket a mangipaamta ed sikayo a say Mananguley ya Ulop so angaproba ed pamawas ed saray subskripsion ya aasikasoen na saray sangan opisina ed sankamundoan. Unong a nipaliwawa ed sulat mi ed amin a kongregasyon na Enero 1, 2002, manlapud natan say sangan opisina so mangasikaso labat na limitadon bilang na saray subskripsion, lapud bili na koryo na sinansakey iran kopya na saray magasin. Saray peles a subskripsion so mantultuloy anggad manpaso iratan.

Amin ya agagi, ontan met ed saray interesadon totoo a makakapilimog ed lokal a kongregasyon, so makaawat la natan na saray personal a kopya ra panamegley na suplay na magasin ed kongregasyon tan aliwan diad panamegley na subskripsion. Lapud saya, nepeg a seguroen na amin a kongregasyon a makakaawat ira na magenap iran magasin ta pian amin a malabay so makala na saray magasin. Diad kaso na publiko, papasesegen mi iray manangipalapag a mangilista ed saraman so manpirawat a makaawat a regular na magasin tayo tan itulor iratan a personal. Ontulong iya ed sikaran namantini so personal a pakapitongtong ed sarayan indibidual, a nayarin manresulta ed dakel nin panangiyaral na Biblia.

Diad pigaran nipueran kaso, arum ya interesadon totoo so manaayam ed arawin maong iran lugar a mairap a nasabi, odino walaan na “post office box” a pangipatuloran ed saray sulat. Parad saratan ya indibidual, say sangan opisina so mangituloy ed pangipawit na personal iran subskripsion. Nepeg a daiset labat iraya, diad ontan et manresulta ed baleg a pakagimper ed bili na koryo tan ed pankaukolan na personahe ed opisina a mangasikaso ed datin uksoyan na subskripsion.