Sankamundoan a Pansagpot Pian Iyabawag so “Tumboken so Kristo!” a Distriton Kombension Saray Manangipalapag so Mangibunog Lamet na Espisyal a Handbill
1 Nen katantaon, say sankamundoan ya impangiyabawag ed “Asingger la so Kililiktar!” a Distriton Kombension so walaay baleg ya epekto ed saray interesado. Diad sankaunaan a pankanawnawa, saramay angawat ed espisyal ya imbitasyon tan inmatendi so akaeksperiensya ed daakan ya espiritual a ponsia na saray Tasi nen Jehova. (Isa. 65:13) Agustoan da so impilimog ed makaaro tan nankakasakey a Kristianon impanaagi tayo. (Sal. 133:1) Pian amayamay so natulongan tayon makaatendi ed “Tumboken so Kristo!” a Distriton Kombension, mangibunog itayo lamet na espisyal a handbill ed sankamundoan.
2 Resulta nen Katantaon: Unong ed saray naawat a report manlapud nanduruman parte na mundo, ekselente iray resulta na impangiyabawag ed “Asingger la so Kililiktar!” a Distriton Kombension. Alimbawa, diad sakey a syudad et impalapag na sakey a dyaryo so pigaran pahina ya artikulo nipaakar ed sayan kampanya. Oniay nabasa ditan: “Pian napasabian na saray Tasi so amin a kakaabay antis na kombension, sikaray nansagpot a maong, a mas andukey so impankimey da, mas ararawi inaakar da, tan mas matalabit ira.” Diad sananey a syudad, positibo met so inreport na taloran dyaryo nipaakar ed kimey tayo antis na kombension. Sakey a reporter so nansulat na pigaran andurukey ya artikulo, ya apano toy masulok a duaran pahina na Simban edisyon na sakey a dyaryo. Impaliwawa toy nipaakar ed saray sisiaen tayo, say impanaagi tayo, say pangibubunog na handbill, tan say kombension. Kanian sanen iyaawat na sakey a manangipalapag so imbitasyon, sinmalet lan tampol so akan-abung, ya inkuanto: “On. Peles ko ni labat a babasaen so nipaakar ed satan diad dyaryo!” Onia met so inkuan na sakey nin akan-abung: “Babasaen ko ni labat so nipaakar ed sikayo, tan natan wadia ki la! Imbitasyon ko ’tan?” Insan to inyarum, “Maabig so gagawaen na saray Tasi nen Jehova.”
3 Dakel ya interesado so linma ed pankokombensionan a sankaegnaan day imbitasyon da. Arum ed sikara so nambiahe na arawi pian naatendian iray sesyon. Lapud kuli tayon angimbita ed arum, dinmakel so bilang na inmatendi. Diad sakey a bansa, dinmaak na 27 a porsiento so inmatendi ed kombension no ikompara nen imbeneg a taon. Diad Pilipinas, walay balon pantok a 340,215 ya inmatendi nen katantaon ed saray kombension tayo.
4 Pangobre ed Teritorya: Nayari yo lan ibunog so handbill, taloy simba antis na kombension yo. Nepeg a mansagpot pian nakimeyan so amin a teritorya na kongregasyon. Diad saray kongregasyon a maawang so teritorya, nayarin maalwar ya itilak na saray manangipalapag so handbill ed abung na saray agda asabian diad unor lan simba antis na kombension. Nepeg a panggunaetan na saray kongregasyon ya ibunog so amin a handbill a walad sikara tan gawaen da so anggaay nayarian da a kobrian so dakel a teritorya. No walay sulok, nayarin iter itan ed saray payunir na kongregasyon.
5 No Antoy Ibaga: Oniay nayari yon ibaga: “Kaiba kami ed saray mangibubunog na sayan imbitasyon ed sankamundoan. Nipaakar iya ed sakey ya importantin pantitipon. Nia so kopya yo. Naromog ditan so arum nin detalye.” No pansiansiaen tayon antikey so presentasyon tayo, mas dakel so nabunogan. Siempre, no walay tepet na akan-abung, ipanaon tayon ebatan itan. No walay interesado, isulat itan insan pawilen a tampol.
6 Talagan importante a pampelengan tayon tumboken si Kristo! (Juan 3:36) Say manasingger lan distriton kombension tayo so makatulong ed amin ya onatendi pian nagawaan itan. Nailaloan tayo a malaknab lamet so pakapantasi lapud sayan nankakasakey a pansagpot ya iyabawag so “Tumboken so Kristo!” a Distriton Kombension. Kanian, gawaen so anggaay nayarian pian dakel so naimbitaan. Komon ta bendisyonan a maong nen Jehova iray pansasagpot mo legan a mibibiang ka ed sayan nankakasakey tan sankamundoan a kampanya.