Saray Pakabat
◼ Opresin literatura ed Oktubre: Saray magasin a Say Panag-Bantayan tan Awake! No akaromog na interesado, iparungtal tan isingbat so tract a Labay Moy Makaaral nin Maong Diad Biblia?, a say kalat et pian makapangigapo na panangiyaral ed Biblia. Nobyembre: Manaral Manlapud Sankamaongan a Managbangat. No ibaga na totoo ya anggapoy ananak da, iyopresi so brosyur a Mantultuloy a Manbantay! Disyembre: Anggan dinan ed onggendan iran libro so nayarin iyopresi: The Greatest Man Who Ever Lived, Onapit ed si Jehova, odino Say Sekreto na Liket ed Pamilya. Enero: Nayarin iyopresi so anggan dinan a 192-pahinan libro ya impalapag antis na 1991. No anggapoy lay onian libro na saray kongregasyon, nayarin iyopresi da so libron Pikakabat (no wala) odino say brosyur a Mantultuloy a Manbantay!
◼ Saray order parad 2008 Yearbook so nayari la natan ya ipawit ed sangan opisina. Lapud satan, impawit mi la so Yearbook Order Blank ya akalaktip ed sulat parad Agosto. Saya so nepeg a sulatan na saray literature coordinator tan literature servant insan ipawil da so orihinal a kopya diad sangan opisina ya ag-onlampas ed Nobyembre 15, 2007.
◼ Duaran kompleton programa na distriton kombension parad saray telek so inyuksoy ed sayan taon, say sakey et diad Quezon City tan say sananey et diad Cagayan de Oro City. Kaukolan ya atendian na siopaman a telek a makatalos na sign language so anggan dinan ed sarayan programa, lapud anggapo lay arum a programa parad saray telek diad arum iran kombension.
◼ Lapud walay limaran Sabado tan limaran Simba ed Disyembre, sankaabigan a bulan iya pian man-auxiliary payunir.
◼ No Enero, singbaten ed Pantitipon Parad Panagserbi so video a Transfusion-Alternative Health Care—Meeting Patient Needs and Rights. No nakaukolan yo iya, nepeg a mangorder lan tampol so kongregasyon yo.
◼ Ipangasin imanoen a say agin akanbetang ed unor a parte na Pantitipon Parad Panagserbi so nepeg a mangiparungtal ed pansaran kanta. Balanglan sikato odino sakey a kualipikadon agi, ya apakabatan lan inmuna, so mangidaulo ed pansaran pikakasi.
◼ Balon Publikasyon a Naala:
New World Translation of the Holy Scriptures (maimpis so apis)—Iloko