Say Sankaimportantian ya Kualidad na Maong a Managbangat
1. Anto so sankaimportantian a kualidad na maong a managbangat?
1 Anto so kaukolan na sakey pian magmaliw ya maong a managbangat na Biblia? Sekular ya edukasyon? Eksperiensya? Talento? Diad tua, satan imay kualidad ya kasumpalan na ganggan, pakabidbiran ed saray babangatan nen Jesus, tan say sankatalonggaringan tan talagan makapasagyat ed saray manunan kualidad nen Jehova. (Juan 13:35; Gal. 5:14; 1 Juan 4:8) Satan et aro. Ipapanengneng itan na saray maong a managbangat.
2. Akin ya importantin nawalaan tayoy aro ed totoo?
2 Aroey Totoo: Impanengneng na Sankamaongan a Managbangat, si Jesus, so aro ed totoo, tan satan so amakiwas ed sikaran ondengel ed sikato. (Luc. 5:12, 13; Juan 13:1; 15:13) No iyaansakit tayo ray totoo, anamoten tayoy amin a pankanawnawa ya pulongan ira. Ag-itayo onkapuy anggano walaray mamapasegsegang o mangibabaliwala ed sikatayo. Ipanengneng tayoy impapuson personal ya interes ed saray pupulongan tayo, tan itukoy tayoy ibaga tayo ed saray kapagaan da. Aliwa labat a say pangiyaral ed kada iyaaralan tayo so ipanaon tayo noagta pati say pamparaan antis na kada pan-aral.
3. Panon a makatulong so aro ed katuaan a walad Biblia diad ministeryo tayo?
3 Aroen so Katuaan a Walad Biblia: Inaro met nen Jesus iray katuaan a walad Biblia tan impasen to iratan ya kayamanan. (Mat. 13:52) No inaro tayoy katuaan, maligsa tayon itongtong itan ed arum, tan satan so posiblin managyat ed interes da. Makatulong so ontan ya aro pian nisentro tayoy imano tayod saray makanan impormasyon ya inanabang tayo imbes a diad saray kakapuyan tayo, tan lapud satan et nayarin nabawasay pannerbiyos tayod ministeryo.
4. Panon tayon nabayuboan so aro?
4 Bayuboan so Aro: Panon tayon nabayuboan so panangaro ed totoo? Diad pandalepdep ed aro ya impanengneng nen Jehova tan na Anak to tan say pakaskasin kipapasen ed espiritual na totoo ed teritorya tayo. (Mar. 6:34; 1 Juan 4:10, 11) Napaaralem tayoy panangarod saray katuaan a walad Biblia panamegley na regular ya personal a panag-aral tan panagdalepdep. Say aro et sakey ya kabiangan na bunga na espiritu. (Gal. 5:22) Kanian sarag tayoy onkerew ed si Jehova na masanton espiritu tan tulong pian napadaak tayoy aro tayo. (Luc. 11:13; 1 Juan 5:14) Antokaman so edukasyon, talento, odino kabayag tayod katuaan, sarag tayoy magmaliw ya epektibon managbangat na Biblia diad pangipanengneng na aro.