Asigta Yoy “Pamoponiti” Yo
1. Panon ya onaplika ed ministeryo tayo so 1 Corinto 9:26?
1 Oniay insulat nen apostol Pablo: “Ombabatik ak ya amtak so aarapen ko; say pamoponitik et aliwan singa pamoponiti ed dagem.” (1 Cor. 9:26) Tutukoyen nen Pablo ed saya so determinasyon ton sumpalen iray espiritual a kalat to. Balet, onaplika met so prinsipyo na saya diad ministeryo. Labay tayon asigtaey “pamoponiti,” odino pansasagpot tayo, pian nagawaaan so sankaabigan. Panon?
2. Sano mamipili na pasen tan oras na pampulong, panon tayon naalig si Pablo tan arum ni ran inmunan siglon Kristiano?
2 Onlad Kawalaan na Totoo: Nampulong si Pablo tan arum ni ran inmunan siglon Kristiano diad kawalaan na totoo. (Gawa 5:42; 16:13; 17:17) Kanian no labi ti’ labat nasabian iray maslak a totood teritorya tayo, nayarin saya so sankaabigan ya oras na pankabkaabungan. Kasin diad saray istasyon na bus et dakel so totoon paarap ed trabaho ed kabkabuasan odino pasempet diad bandad pansirunget? Kapigan dakel so totoo diad saray teritorya yon mall odino tindaan? Ompan say pan-street witnessing yo et mas epektibo ed onia ran oras.
3. Panon tayon naasigtay pankimey ed teritorya tayo?
3 Maasigtan Kimeyan so Teritorya: Kaukolan tayo met so manasigta pian epektibon nakimeyan so teritorya tayo. Singa bilang, imbes a manpulong ed saksakey a lugar so baleg a grupo, maabig no palduaen so grupo pian agnasayang so dakel ya oras tan sagpot a pangornisa tan pangiwanwan ed sikara. Ontan met, sano say pampulongan et baryo, mas maples tayon nasumpal so teritorya tan mas dakel so nakatongtong tayo no melag labat iray grupo. Sarag tayo kasi mangalay personal a teritorya ya asingger ed abung tayo pian agnaupot so oras ed pambiahe?
4. Antoy ontulong pian magmaliw itayon matalonan “sumisigay na totoo”?
4 Inkuan nen Jesus a saray ebanghelisador et singa “sumisigay na totoo.” (Mar. 1:17) Say gagala na sumisigay et aglabat la basta mangipaleg na iket noagta pian makarel na sira. Kanian, saray maong a sumisigay et oonla diad oras tan pasen a wadtan iray sira, tan tampol dan gapoan itan. On, maseet ira. Komon ta ipanengneng tayo met so ontan ya inkakuli diad ministeryo tayo.—Heb. 6:11.