Tepet

◼ Antoy nepeg ya ikonsidera no labay tayon arum odino amin ya kaykayarian tayo et onlad organisasyon nen Jehova no ompatey itayo?

No ompatey so too, anggapo lay kontrol tod materyal ya kaykayarian to. (Ecl. 9:5, 6) Kanian legan ya mabilay ni, dakel so manggagaway testamento odino dokumento ya mangipapaliwawa ed no antoy labay dan nagawa ed saray kaykayarian da. (2 Ara. 20:1) Kaslakan et nanengneng met ed satan a legal ya dokumento no siopay pinili dan trustee odino executor (pangibilinan). No anggapoy ontan ya dokumento, diad dakel ya bansa et say gobierno so mandesidi no antoy gawaen ed saray kaykayarian na inatey. Kanian no wala ray espisipikon labay tayon gawaen ed saray kaykayarian tayo, singa bilang no labay tayon onlay arum o amin ed organisasyon nen Jehova, importantin manggawa tayoy legal a dokumenton mangibabagad satan, tan pilien tayon maong so trustee odino executor.

Baleg so responsabilidad na trustee odino executor. Dependid karakel na kuarta o kaykayarian, nayarin dakel so detalyen nalalanor tan ompan maabak na panaon so pankuenta tan pangapag ed saratan. Likud ed satan, kaslakan et wala ray totontonen na gobierno ya nepeg ya unoren. Aliwan amin a membro na kongregasyon et sarag to lan magmaliw ya maong a trustee o executor. Kaukolan a say pilien tayo et samay amta tayon sarasarag to, napanmatalkan, tan unoren toy labay tayo.​—Nengnengen so artikulon “The Wisdom and Benefits of Estate Planning,” diad Disyembre 8, 1998, ya isyu na Awake!

No Pilien Da Kan Trustee odino Executor: No bilang ta walay mantepet ed sika no labay mon asikasoen so kaykayarian to kayari ipatey to, kaukolan ya amtaen mo nin amin so nalalanor ed satan, tan ipikasim a maong no kasin sarag mo itan a responsabilidad. (Luc. 14:28-32) No ompatey itan a too, kaukolan mon ipaamtad amin ya beneficiary to ya pinili to ra. Insan no wala lay autoridad mo, responsabilidad mon apagen iray kaykayarian unong ed ley tan eksaktod samay akasulat ed testamento o dokumento. Kaukolan ya amta na sakey a trustee odino executor ya baleg man o melag so kaykayarian, agto nepeg ya ibaliwala so akasulat ed testamento. Antokaman ya inter ed legal a korporasyon ya uusaren na saray Tasi nen Jehova et donasyon ya gawa la na organisasyon nen Jehova.​—Luc. 16:10; 21:1-4.