Manbangat a Simpli
1. Anto so importante pian malinew tan epektiboy panagbangat tayo?
1 Importante so inkasimpli pian epektiboy panagbangat tayo. Napaaligwas tayoy “dunong ed panagbangat” no aralen tayoy paraan na Sankamaongan a Managbangat, si Jesus.—2 Tim. 4:2; Juan 13:13.
2. Panoy pambangat ya simpli, tan anto ray resulta na ontan ya panagbangat?
2 Mangusar na Simplin Salita: Say Sermon ed Palandey et walaan na araralem a katuaan ya imbalikas ed simplin paraan. (Mat., kap. 5-7) “Nikelawan iray totoo ed paraan na panagbangat” nen Jesus. Anggan saray nibakin mangerel ed sikato et nikuan dan: “Anggapo nin balot so too a nansalitan singa saya.” (Mat. 7:28, 29; Juan 7:46) Agtayo kaukolan so mangusar na araralem, komplikado iran salita, odino detalyado iran ilustrasyon pian magmaliw a makakombinse so katuaan. Sarag tayon ipaliwawa so katuaan ed simpli iran salita.
3. Akin et wala ray nasasagyat ya buntonan na impormasyon iray pupulongan da, tan panon iyan napaliisan?
3 Determinaen so Karakel na Impormasyon: Inkonsidera nen Jesus iray dumerengel to no kaunongan ya impormasyon so ipasabi tod sikara. (Juan 16:12) Nepeg ya maobserba tan mainomay itayon ontukoy, lalo la no pupulongan tayo ray kakanayon, balon interesado, odino ugugaw. Agtayo ra bubuntonan na impormasyon anggano nalikas tayon madengedengel ira. Saramay masimoon et itultuloy dan kabaten so tuan Dios, si Jehova.—Juan 17:3; 1 Cor. 3:6.
4. Akin a mas maabig no manpokus tayod saray manunan punto imbes ya diad saray detalye?
4 Manpokus ed Saray Manunan Punto: Ag-angiter na dakdakel ya detalye si Jesus ed impanbangat to kanian aliwan komplikado. Sanen imbaga ton: “Saray amin a walad pakanodnonotan iran lubok et . . . ompaway ira,” agto ni impaliwawan tampol so duaran pansumpalan na saray napaoli. (Juan 5:28, 29) No mangiyaaral tayo, manpokus tayo labat ed saray manunan punto tan paliisan tayoy mangiyarum na impormasyon ya agni kaibad topic ya aaralen.
5. Antoy bendisyon no simpli so pambangat tayo?
5 Agaylay pisasalamat tayo ta simpli so impangibangat nen Jehova ed amin a kaukolan tayon naamtaan! (Mat. 11:25) Gawaen tayo sirin ya simpli so panagbangat tayo pian nalikna tayoy liket ed mabungan ministeryo tayo.