Saray Reperensya Parad Workbook ed Aral
© 2022 Watch Tower Bible and Tract Society of Pennsylvania
MARSO 6-12
KAYAMANAN ED SALITA NA DIOS | 1 AWARAN 23-26
“Organisadon Maong so Panagdayew ed Templo”
mwbr23.03—it-2 241
Levita
Inorganisan maong nen David so kimey na saray Levita tan anuro na saray manangasikaso ed kimey, saray opisyal, saray ukom, saray bantay na puerta, tan saray manag-asikaso na kayamanan. Anuro met na dakdakel ya katulongan na saray saserdote diad templo, diad saray sular, tan diad saray kuarton pananganan ya parad saray apay, diad panagbagat, panaglinis, panagtimbang, panagsukat, tan diad nanduruman kimey na guardia. Inorganisa met iray Levitan managtogtog ed 24 ya grupo, mipara itan ed saray grupo na saray saserdote, ya mantuturnoan a manlilingkor. Pinili iray magmaliw ya betang da panamegley na pampapalaranan. Ontan met so ginawa diad impamili na espisipikon puerta ya bantayan na saray grupo na bantay na puerta.—1Aw 23, 25, 26; 2Aw 35:3-5, 10.
mwbr23.03—it-2 686
Saserdote
Diad panaglingkor ed templo, naapag iray saserdote ed nanduruman opisyal. Pipilien iray espisipikon betang da ed panaglingkor panamegley na pampapalaranan. Walay 24 ya grupo, tan kada grupo et manlingkor ya sakey simba no turno da la. Diad sakey taon et mamidua iran onturno. Balet no wala ray piesta, mapatnag ya onlan manlingkor so amin ya saserdote ta diad saratan ya piesta et nilibo so bagat ya iyapay na saray totoo, ya singa agawa nen indedika so templo. (1Aw 24:1-18, 31; 2Aw 5:11; ikompara so 2Aw 29:31-35; 30:23-25; 35:10-19.) Nayarin manlingkor so sakey ya saserdote diad arum ya panaon basta agnaapektoan so panaglingkor na saray saserdoten akaeskedyul ed satan ya panaon. Base ed tradisyon na saray rabbi, dakdakel so saserdote diad samay panaon ya wadiad dalin si Jesus, kanian say sakey simban panaglingkor et inapag ed nanduruman pamilya ya kaiba ed grupo, kada pamilya et manlingkor na sakey agew odino onsulok ni depende ed karakel da.
mwbr23.03—it-2 451-452
Musika
Nen ipaparaan so templo nen Jehova, imbiig nen David so 4,000 ya Levita pian manlingkor bilang managkansion tan managtogtog. (1Aw 23:4, 5) Diad satan ya bilang, 288 so “nipasal ed panangansion parad si Jehova, a marurunong ya amin.” (1Aw 25:7) Say interon uksoyan parad musika et idadaulo na taloran lalaki ya marundunong ed musika, si Asaf, Heman, tan Jedutun (nayarin sikato lanlamang si Etan). Sarayan talo et nanlapud poli na taloran ananak nen Levi ya si Gersom (nanlapuan nen Asaf), Kohat (nanlapuan nen Heman), tan Merari (nanlapuan nen Jedutun), kanian inrepresenta da so taloran manunan pamilya na saray Levita diad organisasyon na musika ed templo. (1Aw 6:16, 31-33, 39-44; 25:1-6) Say bilang na amin ya ananak a lalaki na sarayan taloran lalaki et 24, tan amin da et kaiba ed saramay abitlan 288 ya marurunong ed musika. Diad panamegley na pampapalaranan, balang anak a laki et apili ya mangidaulo ed sakey ya grupo na saray managtogtog. Idaulo to so 11 nin “marurunong,” ya pinili ed saray mismon ananak to tan arum nin Levita. Kanian say 288 ([1 + 11] × 24 = 288) ya marurunong ya Levitan managtogtog et inapag ed 24 ya grupo, ya singa met impangapag ed saray saserdote. No apagen so nakekeraan ya 3,712 a “manaaral ni labat,” diad kada grupo na samay 24 ya grupo et walay manga 155 nin lalaki, labay ton ibaga et manga 13 ya Levita ya nandurumay amta ra ed musika so ipasal na kada sakey ya marunong. (1Aw 25:1-31) Tan lapud saserdote iray managpaknol na trumpeta, onarum ni ira ed bilang na saray Levitan managtogtog.—2Aw 5:12; ikompara so Nu 10:8.
mwbr23.03—it-1 898
Bantay na puerta
Diad Templo. Antis ya ompatey si Arin David, inorganisa to nin maong iray Levita tan saray mankimey ed templo, kaiba la ray bantay na puerta ya 4,000 so bilang da. Kada grupo et sakey simba ya manlingkor no turno la na grupo da. Responsabilidad dan guardiaan so abung nen Jehova tan seseguroen dan lukasan tan ikapot iray puerta ed dugan oras. (1Aw 9:23-27; 23:1-6) Likud ed pangua-guardia da, say arum et mangaasikaso ed saray donasyon ya inter na totoo parad templo. (2Ar 12:9; 22:4) Sinmabi panaon, nen nilanaan na atagey a saserdoten si Jehoiada si Jehoas pian magmaliw ya ari, wala ray inyasain ton guardia ya manbantay ed puerta na templo pian protektaan so ugaw nin Jehoas manlapud managsamsam na trono ya si Reyna Atalia. (2Ar 11:4-8) Nen inekal nen Arin Josias so panagdayew ed idolo, tinmulong iray bantay na puerta ed impangekal na saray kagawaan ed templo ya inusar ed panagdayew ed si Baal. Insan da iratan pinoolan diad paway na syudad.—2Ar 23:4.
Saray Espiritual a Kayamanan
Makapaliket so Mandayew ed si Jehova!
10 Dadayewen tayo si Jehova kada no mangakansion tayo kaiba iray agagi. (Sal. 28: 7) Nensaman, importantin maong ed saray Israelita so pangansion na panangirayew ed si Jehova. Diad tua, 288 ya Levita so inyasain nen Arin David bilang managkansion diad templo. (1 Awa. 25:1, 6-8) Ontan met natan, nibabalikas tayoy panangaro tayo ed si Jehova kada no kakansionan tayo na panangirayew. Pero ompan isipen mo, ‘Panon to balet ey ta aliwan marakep so boses ko?’ Tandaan tayo ya aliwan say karakep na boses so pampopokusan nen Jehova. Di ba, ibabaga na Biblia ya ‘amin tayo et nalilingo ed panagsalita’ tayo? Pero manpupulong tayo nin siansia tan mankokomento tayod aral, anggano amta tayon nalilingo tayo no maminsan. (Sant. 3:2) Ontan met ed panagkansion. Anggano nalingo tayo ed tono tan aliwan onman karakep so boses tayo, impapuso tayo nin siansia ya kansionan na panangirayew si Jehova.
MAGMALIW YA EPEKTIBO ED MINISTERYO
Akin ya walay organisasyon na Dios?
1. Akin et inorganisa na Dios so Israel nensaman? Inorganisa na Dios so poli nen Abraham pian magmaliw iran sakey a bansa tan inikdan to ray ganggan. Sayan bansa et tinawag ton “Israel” tan imbangat to ra no panon so pandayew ed sikato. Inter to met ed sikara so salita to. (Salmo 147:19, 20) Kanian nabendisyonan so amin ya bansa lapud Israel.—Basaen so Genesis 22:18.
Pinili na Dios iray Israelita pian magmaliw iran tasi to. Ipapanengneng na saray agawa nensaman ed sayan bansa no panon tayon minabang no unoren tayo ray ganggan na Dios. (Deuteronomio 4:6) Kanian lapud saray Israelita et nakabat na arum so tuan Dios.—Basaen so Isaias 43:10, 12.
2. Akin ya naorganisa iray tuan Kristiano? Sinmabi panaon ya agla uunoren na bansan Israel so Dios, tan say insalat nen Jehova ed sikara et say Kristianon kongregasyon. (Mateo 21:43; 23:37, 38) Bilang kasalat na saray Israelita, saray tuan Kristiano la natan so manlilingkor bilang tasi nen Jehova.—Basaen so Gawa 15:14, 17.
Inorganisa nen Jesus iray papatumbok to pian manpulong ed amin ya bansa tan manbangat ed totoo pian magmaliw iran disipulo to. (Mateo 10:7, 11; 24:14; 28:19, 20) Pasyaan la iyan kimey diad sayan kaunoran a parte na sistema na mundo. Natan, pankakasakeyen nen Jehova so minilyon a totoo ed amin a bansa parad dugan panagdayew. (Apocalipsis 7:9, 10) Naorganisa iray tuan Kristiano pian pabiskegen tan tulongan so sakey tan sakey. Diad interon mundo, parehon impormasyon so aaralen na amin a kongregasyon diad pantitipon o aral da.—Basaen so Hebreo 10:24, 25.
3. Panon ya ginmapo so modernon organisasyon na Saray Tasi nen Jehova? Nen 1870’s, saray katuaan ya abayag lan niyamot et ginapoan ya diskobrien na melag a grupo na saray estudyante na Biblia. Amta ran inorganisa nen Jesus so Kristianon kongregasyon parad panagpulong a kimey, kanian inggapo ran impulong so Panarian diad dakel a bansa. Nen 1931, nandesisyon ira ya say tawag ed sikara et Saray Tasi nen Jehova.—Basaen so Gawa 1:8; 2:1, 4; 5:42.
4. Panon ya naoorganisa iray Tasi nen Jehova? Nen inmunan siglo, walay grupo na saray eksperiensyadon lalaki ya angasikaso ed amin ya Kristianon kongregasyon ed nanduruman bansa. Bibidbiren da ya si Jesus so Ulo na kongregasyon. (Gawa 16:4, 5) Ontan met natan, walay tatawagen ya Mananguley ya Ulop ya mangaasikaso ed amin a kongregasyon na Saray Tasi nen Jehova ed interon mundo. Saya so mangaasikaso ed saray branch office ya mangipapatalos, mangiimprinta, tan mangibubunog na saray publikasyon ya base ed Biblia diad masulok ya 700 a lenguahe. Kanian makapantatarya so Mananguley ya Ulop na panamaseseg tan instruksion ya base ed Biblia parad masulok ya 100,000 a kongregasyon ed interon mundo. Diad kada kongregasyon, wala ray kualipikadon lalaki ya manlilingkor bilang elder, odino manangasikaso. Maaro dan aasikasoen so pulok na Dios.—Basaen so 1 Pedro 5:2, 3.
Naoorganisa kami pian ipulong so maong a balita tan bangatan iray totoo. Singa saray apostol, manpupulong kami ed kaabungan. (Gawa 20:20) Manoopresi kami met na panagaral na Biblia ed saramay labay dan naamtaan so katuaan. Balet, saray Tasi nen Jehova et aliwa labat ya organisasyon, sakey kami met ya pamilya tan maaro so Ama mi. Ituturing min sanaagi kami tan manaaroan kami. (2 Tesalonica 1:3) Naorganisa iray lingkor nen Jehova pian gawaen so labay na Dios tan tulongan so arum, kanian sikara so sankaliketan ya pamilya ed interon mundo.—Basaen so Salmo 33:12; Gawa 20:35.
MARSO 13-19
KAYAMANAN ED SALITA NA DIOS | 1 AWARAN 27-29
“Say Maaron Bilin na Sakey ya Ama ed Anak To”
Alwaran so Talindeg Tayo Bilang Kristiano
9 Paneknekan yo ed inkasikayo so katuaan na Biblia. Say panmoria tayo ed talindeg tayo bilang lingkor nen Jehova so onletey no ag-itan malet a nibase ed pikakabat ed Kasulatan. (Filipos 1:9, 10) Malangwer man odino matakken, kaukolan a napaneknekan na kada Kristiano a say papanisiaan to et talagan katuaan a naromog ed Biblia. Pinaseseg nen Pablo iray kapananisiaan: “Salsalien yo ya ami’ ganagana; et mansiansia kayo ed maong.” (1 Tesalonica 5:21) Nepeg a moriaen na saray kalangweran a Kristiano a binmaleg ed matakot ed Dios iran pamilya ya ag-ira nayarin mandependi labat ed pananisia na atateng da. Say mismon ama nen Solomon, a si David, so animbawa ed sikato ya “amtaen mo so Dios na amam, tan manlingkor ka ed sikato ed ayadyari a puso.” (1 Awaran 28:9) Aglabat magenap so panimaton na malangwer a Solomon ed no panon a pinabiskeg na ama to so pananisia to ed si Jehova. Kinaukolan ton kabaten a mismo si Jehova, tan ontan so ginawa to. Oniay inyey-ey to ed Dios: “Ikdan mo ak natan komon na kakabatan tan pakatalos, pian makapaway ak tan makaloob ak ed arap na saya a baley.”—2 Awaran 1:10.
Pansiansiaey Sigpot-puson Panaglingkor ed si Jehova
13 Malinlinew so leksion. Say sigpot-puso a panaglingkor ed si Jehova et aglabat mankabaliksan na regular ya iyatendid saray miting tan pibiang ed ministeryo. (2 Awa. 25:1, 2, 27) No itultuloy ya aroen na sakey a Kristiano iray “walad benegan”—say klase na panagbilay ed sayan mundo—ipepeligro toy maabig a relasyon tod Dios. (Luc. 17:32) Kanian no talagan ‘bubusolen tayo so mauges, tan ompepeket tayo ed maong,’ magmaliw itayon ‘makanepegan ed panarian na Dios.’ (Roma 12:9; Luc. 9:62) Anggaman wala ray mausar odino marakdakep a bengatlan iyoopresi na sayan mundo nen Satanas, kaukolan tayon seguroen ya anggapoy mamatunda ed sikatayon sigpot-puso a manlingkor ed Dios.—2 Cor. 11:14; basaen so Filipos 3:13, 14.
‘Manpakpel Ka tan Igapom Lay Kimey’
20 Impaseguro nen Arin David ed si Solomon ya walad sikato si Jehova anggad nasumpal to so pangipaalagey na templo. (1 Awa. 28:20) Tinandaan tan impapuso nen Solomon iray imbaga nen ama to, kanian anggano ugaw ni tan anggapo ni eksperiensya to, inawat to nin siansia so kimey. Sikatoy nampakpel, nankimey, tan diad tulong nen Jehova et asumpal to so makapadinayew ya templo ed loob na pitora tan kapalduan taon.
21 No tinulongan nen Jehova si Solomon, tulongan to tayo met ya manpakpel tan nagawaan so kimey tayo, diad pamilya tan diad kongregasyon. (Isa. 41:10, 13) No ipanengneng tayon makpel tayo diad panagdayew tayo ed si Jehova, makapanmatalek tayo ya bendisyonan to tayo natan tan diad arapen. Kanian ‘manpakpel ka tan igapom lay kimey.’
Saray Espiritual a Kayamanan
Matoor ya Kaaro No Nasusubok so Pankakaaro
Wala ni arum ya kaaro nen David ya nanmatoor ed sikato nen aproblema. Sakey ed sikara si Husai, ya atawag ed Biblia ya “kaaro nen David.” (2 Sam. 16:16; 1 Awa. 27:33) Nayarin sikatoy sakey ya opisyal ed palasyo ya kaaro tan kaiba na ari, tan no maminsan et sikatoy igaganggan ya manggawad saray kompidensyal ya misyon.
Nen sinamsam nen Absalom ya anak nen David so trono, dakel ya Israelita so dinmapag ed si Absalom, balet agkaiba si Husai. Nen ontatakas si David, sikatoy inabet nen Husai. Asakitan ya maong si David ta trinaidor na mismon anak to tan arum nin panmamatalkan to. Balet nansiansian matoor si Husai, tan akaparaan ya irisgay bilay to tan gawaey misyon ya maneral ed sabwatan. Ginawa itan nen Husai aliwan lapud obligasyon to bilang opisyal na palasyo, noagta lapud sikatoy matoor ya kaaro.—2 Sam. 15:13-17, 32-37; 16:15–17:16.
MARSO 20-26
KAYAMANAN ED SALITA NA DIOS | 2 AWARAN 1-4
“Aliwan Marunong so Desisyon nen Arin Solomon”
mwbr23.03—it-1 174 ¶5
Armada
Nen nanuley si Solomon, walay balon kapitulo ya niyarum ed history na armada na Israel. Mareen so impanuley to pero namparakel nin siansia na saray kabayo tan saray karwahe. Say karaklan ed sarayan kabayo et sinaliw diad Ehipto. Kanian kaukolan so mangipaalagey na saray syudad ya pangikargaan ed sarayan balon dibisyon na militar. (1Ar 4:26; 9:19; 10:26, 29; 2Aw 1:14-17) Balet agbalot benendisyonan nen Jehova iyan ideya nen Solomon, tan nen inatey insan apaldua so panarian, kinmapuy so armada na Israel. Sinmabi panaon et oniay insulat nen Isaias: “Pakaskasi la iramay oonlad Ehipto pian onkerew na tulong, saramay mandedepende ed saray kabayo, a manmamatalek ed saray karwahen pan-guerra, lapud dakerakel iratan, tan ed saray kabayon parad guerra, lapud mabisbiskeg iratan, balet ag-ira nanilalo ed Masanton Dios na Israel, tan agda inanap si Jehova.”—Isa 31:1.
mwbr23.03—it-1 427
Karwahe
Awalaan labat na dakel ya karwahe so bansan Israel diad panaon nen Solomon. Antis to tan, nayarin ag-ira awalaan na dakel lapud samay pasakbay na Dios ya agnepeg ya manparakel na kabayo so sakey ya ari ta singa ditan laingen akadepende so seguridad na bansa. Lapud satan ya pasakbay, alimitaan so pangusar na saray karwahe ta kaukolan iray kabayo pian napabatik iray karwahe. (De 17:16) Nen pinasakbayan nen Samuel iray totoo nipaakar ed saray posiblin kerewen na toon ari ya mamabelat ed sikara, oniay imbaga tod sikara: “Alaen to iray ananak yon lalaki tan gawaen to ran sundalo to ya akalugan ed saray karwahe.” (1Sa 8:11) Nen sinali di Absalom tan Adonias ya samsamen so inkaari, pareho iran nampagaway karwahe, tan walay 50 ya lalaki ya ombabatik ed unaan na saratan. (2Sa 15:1; 1Ar 1:5) Nen tinalo nen David so ari na Zoba, angikera na 100 ya kabayo na karwahe.—2Sa 8:3, 4; 10:18.
Nen papabiskegen nen Arin Solomon so armada na Israel, pinarakel to ray karwahe ya anggad 1,400. (1Ar 10:26, 29; 2Aw 1:14, 17) Likud ed Jerusalem, wala ni ray arum ya baley ya nagmaliw ya syudad na saray karwahe, ya ditan et wala ray espisyal ya pasilidad pian naasikaso irayan amin ya uusaren parad guerra.—1Ar 9:19, 22; 2Aw 8:6, 9; 9:25.
Saray Espiritual a Kayamanan
Saray Pabitar ed Libro na Komaduan Awaran
1:11, 12. Apatnagan nen Jehova ed kerew nen Arin Solomon a say pirawat na puso to et say pakagamor na karunongan tan kakabatan. Saray pikakasi tayo ed Dios so talagan mangiparungtal ed saray pirawat na puso tayo. Sikatayoy makabat no usisaen tayo iray ipipikasi tayo.
MARSO 27–ABRIL 2
KAYAMANAN ED SALITA NA DIOS | 2 AWARAN 5-7
“Lanang ya Wadtan so Pusok”
Agpaulyanan so Pantitipon
Diad saginonor, sanen si David so ari ed Jerusalem, pirmin pinilalek to so mangipaalagey na permanentin abung a kigloriaan nen Jehova. Balet, lapud si David et sakey a lakin mibabakal, inkuan nen Jehova ed sikato: “Sika agka mangipaalagey na abung ed ngaran ko.” Imbes, pinili To so ilalak nen David a si Solomon a mangipaalagey ed templo. (1 Awaran 22:6-10) Inaguraan nen Solomon so templo nen 1026 K.K.P., kayari na impangipaalagey ya asabi toy pitora tan kapaldua a taon. Inabobonan nen Jehova iyan paalagey, ya inkuan to: “Pinasantos ko so sayan abung, ya impaalagey mo, pian yan ko so ngaran kod’man lawas; et saray matak tan say pusok walar’man ed maando.” (1 Arari 9:3) Daput no mansiansian matoor iray Israelita, abobonan nen Jehova itan ya abung. Balet, no italirak day maabig, ekalen nen Jehova so panangabobon to ed satan a pasen, tan ‘say abung a mismo so magmaliw a bunton na saray geray.’—1 Arari 9:4-9, NW; 2 Awaran 7:16, 19, 20.
mwbr23.03—it-2 1077-1078
Templo
History. Akaalagey iyan templo anggad nen 607 B.C.E., nen dineral itan na armada na Babilonia ya indaulo nen Arin Nabucodonosor. (2Ar 25:9; 2Aw 36:19; Jer 52:13) Lapud nandayew ed saray palson dirios iray Israelita, inabuloyan nen Jehova ya pairapen na arum ya bansa so Juda tan Jerusalem, tan wala ray inkagawa ya inaala da ray kayamanan na templo. Wala ra met so panaon ya apaulyanan so templo. Inaala nen Arin Sisac na Ehipto iray kayamanan ed templo (993 B.C.E.) diad panaon nen Rehoboam ya anak nen Solomon, manga 33 taon labat so linmabas kayari na inagurasyon na satan. (1Ar 14:25, 26; 2Aw 12:9) Walay respeto nen Arin Asa (977-937 B.C.E.) ed abung nen Jehova, balet pian naprotektaan toy Jerusalem, aliway ginawa to ta pinasuksokan toy Arin Ben-hadad I na Sirya na pilak tan balitok ya nanlapud kayamanan na templo, pian lingwanan to lay paknaan da nen Arin Baasa na Israel.—1Ar 15:18, 19; 2Aw 15:17, 18; 16:2, 3.
Saray Espiritual a Kayamanan
mwbr23.03—w10 12/1 11 ¶7
Sikato so Talagan Makapikabat ed “Puso na Too”
Naligliwa tayo ed pikakasi nen Solomon. Ompan ag-eksakton natalosan na totoo so talagan nalilikna tayo—say “paniirap” tayo tan say “sakit a nalilikna” tayo. (Proverbio 14:10) Balet amta nen Jehova so karga na puso tayo, tan interesadon maong ed sikatayo. No ibalikas tayod pikakasi so amin ya walad puso tayo, mas mainomay tayon arapen iray problema tayo. “Ipaawit yod sikato so amin a kapagaan yo,” so kuan na Biblia, “lapud iyaansakit to kayo.”—1 Pedro 5:7.
MAGMALIW YA EPEKTIBO ED MINISTERYO
No sakey a Kristiano so mansasakit odino manbabaroy tan agmakaatendi ed selebrasyon na Memoryal, kasin nepeg ton selebraan itan ed saginonor a bulan?
Diad kadaanan ya Israel say Paskua so tinaon ya agawa diad koma-14 ya agew na ununan bulan, a ningaran na Nisan (odino, Abib). Balet naromog tayo so espesyal a probisyon diad Numeros 9:10, 11: “Ibagam ed saray anak na Israel, a kuan mo, No siopan too ed sikayo odino ed saray kailalakan yo ya aliwa naani a malinis lapu ed bangkay na sakey a too ya inatey, odino wala ed dalan ya arawi, angaman ontan agamilen da naani pasko ya ipaakar ed kinen Jehova. Dia’d komadua’n bulan [angaranan ya Iyyar, odino Ziv], ed mansirunget na komalabin-apat ya agew, sikato so agamilen da naani; kanen da naani pati andilevadura a tinapay tan pisipising ya ampait.”
Imanoen a talagan ag-angiletneg iya na duaran panpilian a petsa parad Paskua (Nisan 14 odino Ziv 14), a siopaman ya Israelita odino sankaabungan et bulos a manpili, depende ed inkakumbiniente [ra]. Say probisyon na pangdem ed Paskua diad komaduan bulan so ageteran. Nikaduma, itan parad sakey ya Israelitan agmalinis unong ed seremonya diad Nisan 14 odino arawi ed pakakagawaan na selebrasyon.
Say nirekord labat ya agawa ed sayan kaslakan a gagawaen et diad panaon sanen si matoor ya Arin Hezekias so angipawil lamet ed panag-imaton na Piesta na Andi-lebaduran tinapay. Kulang la so panaon pian manparaan parad ununan bulan (saray saserdote so ag-akaparaan nisay adagup iray totoo), kanian agawa itan ed koma-14 ya agew na komaduan bulan.—2 Awaran 29:17; 30:1-5.
Nilikud ed ontan iran nikadkaduman sirkumstansya, impansiansia na saray Judio so Paskua unong ed petsan ingeter na Dios. (Exodo 12:17-20, 41, 42; Levitico 23:5) Sinelebraan nen Jesus tan saray babangatan to unong ed kakaukolanen na Ganggan, ya agbastabasta tratratoen iyan petsa. Ireport nen Lucas: “Et sinmabi agew na tinapay ya andi lebadura, a sikato so pankaokolan ya ibagat so pascua. Et imbaki to [Jesus] ra di Pedro tan Juan, ya inkuan to, Onla kayo tan itadia yo nipaakar ed sikatayo so pascua, pian mangan itayo.”—Lucas 22:7, 8.
Diad satan ya okasyon, inletneg nen Jesus so tinaon a selebrasyon a kabkabat na Kristianos bilang say Pangdem na Katawan. Kaukolan ya idanet a maong ed saray Kristiano so kablian na iyaatendi ed Pangdem na Katawan. Saya so say sankaimportantian ya ebento ed taon parad saray Tasi nen Jehova. Ipapanengneng na saray salita nen Jesus no akin: “Gawayo’ya a pakanodnonotan ed siak.” (Lucas 22:19) Kanian, balang sakey ed saray Tasi nen Jehova so nepeg ya akauna lan mangiplano pian pansiansiaen a bulos so petsa ed antokaman a tongtongan. Say Pangdem na Katawan so selebraan ed Martes, Abril 6, 1993, kaselek na agew diad lokal.
Diad matalag iran kipapasen arum ya ag-iilaloan a sirkumstansya, a singa say beblay odino saray kairapan ed panagbaroy so nayarin manebel ed iyatendi na sakey a Kristiano unong ed implano to. Anto so nepeg a gawaen ed ontan a situasyon?
Legan na selebrasyon say andi-lebaduran tinapay tan ambalangan alak so ipaliber, tan saramay alanaan na masanton espirituy Dios tan apili parad bilay diad tawen so mibiang. (Mateo 26:26-29; Lucas 22:28-30) No say sakey a tinaon a mibibiang et diad sayan taon et walad abung odino ospital a mansasakit, iyarunsa na saray mamatatken ed lokal a kongregasyon a sakey ed sikara so mangawit na pigaran tinapay tan alak ed mansasakit, singbaten iray matukoy a teksto ed Biblia unong ed tema, tan iserbi iray emblema. No say alanaan a Kristiano so arawi ed dilin kongregasyon to, nepeg ya iyuksoy to so iyakar ed sakey a kongregasyon ed kawalaan to’d satan a petsa.
Nisesengeg ed saya, dia lambengat ed silong na nikadkaduman tuloy iran sirkumstansya a say alanaan a Kristiano so kaukolan a manselebra ed Pangdem na Katawan diad saginonor a 30 agew (sakey a bulan), mitunosan ed ganggan diad Numeros 9:10, 11 tan say alimbawa diad 2 Awaran 30:1-3, 15.
Saraman so kabiangan na “arum a karnero” nen Jesus a walaay ilalo na andi-anggaan a bilay diad paraison dalin, so agnisilong ed ganggan a mibiang ed say tinapay tan say alak. (Juan 10:16) Importante so iyatendi ra ed tinaon a selebrasyon, balet ag-ira mibiang ed saray emblema. Kanian no sakey ed sikara so mansasakit odino manbabaroy tan anggapo’d dinanman a kongregasyon ed satan a labi, sikato so nepeg a pribadon manbasa ed matukoy iran kasulatan (pati ed salaysay na impangiletneg nen Jesus ed selebrasyon) tan ipikasi so bendisyon nen Jehova ed sankamundoan ya ebento. Balet diad sayan kaso agla nakaukolan so antokaman a kaaruman ya uksoy parad sakey a miting odino sakey ya espesyal a diskusyon ed Biblia sakey bulan diad saginonor.
ABRIL 10-16
KAYAMANAN ED SALITA NA DIOS | 2 AWARAN 8-9
“Pinabli Toy Karunongan”
Sano Ondaak so Inkamabunlok
Siempre, say reyna na Seba so nansakripisyo met a maong na panaon tan sagpot to pian nabisita si Solomon. Nayarin say Seba so walad lugar na kaplesan a Republika na Yemen; kanian say reyna tan say ulop na aka-kamelyo to so nambiahe na masulok a 1,600 a kilometro paarap ed Jerusalem. Singa inkuan nen Jesus, “[sikatoy] nanlapu ed saray sampot na dalin.” Akin kasin nansagpot nin maong a linma so reyna na Seba? Say manunan inakaran to et pian “ondengel na kakabatan nen Solomon.”—Lucas 11:31.
Sakey ya Imbisitan Mayamyaman ya Atumangan
Antokaman so kipapasen, sinmabi so reyna ed Jerusalem a walaan na “sankabalgan ya ulop, pati saray kamelyo a nanawit ed saray balingit, tan sankaraklan a balitok, tan mabli a batobato.” (1 Arari 10:2a) Inkuan na arum a say “sankabalgan ya ulop” et laktipen toray armadon guardia. Natalosan iya lapud say reyna et sakey a mapuersan dederlengen tan manbiabiahen walaan na saray agnatantiyan ankablin bengatla a mankantidad na sinamplon milyon a dolyares.
Balet, imanoen a nadngelan na reyna so inkabantog nen Solomon “nipaakar ed ngaran nen Jehova.” Kanian aliwa lambengat iyan biahen nipaakar ed negosyo. Mabitar, say manunan gagala na insabi na reyna et pian dengelen so kakabatan nen Solomon—ompan manaral ni ingen na bengatlan nipaakar ed Dios nen Solomon, si Jehova. Lapud sikatoy nayarin kapolian nen Shem odino si Ham, a managdayew nensaman ed si Jehova, sikatoy manuusisa la nipaakar ed relihyon na saray inmunan atateng to.
Sakey ya Imbisitan Mayamyaman ya Atumangan
Ontanlay impandinayew na reyna na Sheba ed kakabatan nen Solomon tan say inkaaligwas na panarian to kanian “anggapo la so linawa ed sikato.” (1 Arari 10:4, 5) Tinalosan na arum irayan salita a mankabaliksan a say reyna et “akanganga.” Insuheri ni ingen na sakey ya iskolar a sikatoy nalmay! Balet antokaman so agawa, mankelaw a maong so reyna ed anengneng tan nadngelan to. Inyabawag ton maliket iray lingkor nen Solomon lapud impakadngel to ed kakabatan na ari, tan benendito to si Jehova lapud impangitrono ed si Solomon. Insan inter to’d ari so ankabli iran regalo, a say balitok lambengat et mankantidad na manga $40,000,000 unong ed kaplesan a balor. Nanregalo met si Solomon, ya inter to ed reyna so “amin a pilalek to, anggan anto a kinerew to.”—1 Arari 10:6-13.
mwbr23.03—it-2 990-991
Solomon
Nen anengneng na reyna so karakep na templo tan na abung nen Solomon, say lamisaan tan say panagserbi na iinumen, tan say sulong na saray serbidor, tan say bagat a popoolan ya regular ya iyaapay ed templo, “agaylay pandinayew to,” kanian inkuan to, “Anggapo ni kapaldua may imbaga rad siak. Apalumbasan mo ni so abalitaan kon karunongan tan inkaaligwas mo.” Insan to imbagan maliket iray totoon manlilingkor ed sakey ya ari ya singa si Solomon. Lapud saratan ya amin, apakiwas so reyna ya idayew si Jehova, pinasanto toy Jehova a Dios, ya angipanengneng na panangaro ed Israel diad impanuro Tod si Solomon bilang ari pian mangipaakseb na hustisya tan inkatunong.—1Ar 10:4-9; 2Aw 9:3-8.
Saray Espiritual a Kayamanan
mwbr23.03—it-2 1097
Trono
Say tronon impagawa nen Solomon labat so trono na manuley ed Israel ya detalyadon indeskribe. (1Ar 10:18-20; 2Aw 9:17-19) Ompapaway ya say kawalaan na satan et diad “Pasen na Trono,” sakey ed saray bilding ya impaalagey ed Palandey Moria diad Jerusalem. (1Ar 7:7) Sakey iman ya ‘marakdakep a tronon garing (ivory) ya binalkot na puron balitok, tan walay malimpek a tarong diad benegan to tan wala ray tapewan na lima.’ Anggaman garing so nayarin manunan materyales na satan, say impanggawa ed satan et singa met ed paraan ya inusar ed impampaalagey na templo, kanian gawa met itan ed kiew insan binalkot na balitok tan dinekorasyonan na saray inyukit ya garing. No nanengneng mo itan, isipen mo ya say interon trono et gawad garing tan balitok labat. Kayarin abitla so anemiran balitang ya paonlad trono, oniay katuloyan na salaysay: “Walay duaran estatua na leon diad abay na saray tapewan na lima. Tan walay 12 estatua na leon diad anemiran balitang, sakey ed kada sampot na anemiran balitang.” (2Aw 9:17-19) Matukoy labat itan ta isisimbolo na leon so autoridad na sakey a manuley. (Ge 49:9, 10; Apo 5:5) Mapatnag ya say katumbas na 12 leon et say 12 tribu na Israel, ya posiblin mangisisimbolo ed pampasakop tan isuporta da ed manuley ya akayurong ed satan ya trono. Tan walay toonan na sali a gawad balitok ya akakabit ed trono. Base ed deskripsion na sayan trono ya gawad garing tan balitok—ya atarongan tan walad atagey ya pasen tan diad arap to et wala ray makapadinayew iran leon—sankabalibalian la itan ya trono ed saman ya panaon no ikompara ed saray trono ya adiskobre na saray arkeologo, saray nanengneng ed monumento, odino saray adeskribe ed saray akaukit. Singa naobserbaan na nansulat na awaran: “Anggapoy arum a panarian ya akapanggawa na singa satan.”—2Aw 9:19.
ABRIL 17-23
KAYAMANAN ED SALITA NA DIOS | 2 AWARAN 10-12
“Makatulong ed Sika Iray Maong ya Advice”
Nayarin Naawat To Komon so Pabor na Dios
Singa ag-amta nen Rehoboam no antoy gawaen to! No iter toy kekerewen na totoo, sikato, say pamilya to, tan saray opisyal ed palasyo to et nabawasan na luho tan ondaiset so naala da ed saray totoo. Balet no agto iter so kekerewen na totoo, ompan manrebelde ira. Anto kasi gawaen to? Unona, say balon ari et kinmonsulta ni ed saray mamasiken ya nanlingkor bilang mananimbawa nen Solomon. Balet, kayari na satan et kinmonsulta met si Rehoboam ed saray kalangweran a lalakin kaedaran to. Inunor toy simbawa na sarayan kalangweran, kanian nandesisyon ya pairapen a maong iray totoo. Oniay imbaga to: “Mas pabelaten koy pako yo, tan palooren ko ni itan. No si amak et dinusa to kayo ed panamegley na saray siplat, siak balet, dusaen ta kayo ed panamegley na saray latiko.”—2 Awa. 10:6-14.
No Panon Kan Makapanggawa na Maong Iran Desisyon
Itatarok met nen Jehova iray matakken ed loob na kongregasyon a napangibagaan tayo ed saray desisyon tayo. (Efeso 4:11, 12) Balet, diad itupleg ed arum et nepeg ya agtayo aaligen iramay onasingger ed nanduruman totoo anggad naromog dan siansia imay mansalita unong ed labay dan dengelen. Insan da ed satan tumboken so simbawa to. Nepeg met a tandaan tayo so manamasakbay ya alimbawa nen Rehoboam. Sanen sikatoy nipaarap ed sakey a seryoson dedesisyonan, sikatoy akaawat na ekselentin simbawa na saray mamasiken a nanlingkor ed ama to. Balet, imbes a tumboken toy simbawa ra, sikatoy tinmupleg ed saray kalangweran a lalakin kabansag ton binmaleg. Diad impanumbok to ed simbawa ra, sikatoy akapanggawa na makapkapuy a desisyon a nansumpal ed inkabalang na baleg a kabiangay panarian to.—1 Arari 12:1-17.
Sano onkekerew na simbawa, kerewen itan ed saramay eksperiensyado la ed bilay tan walaan na malaknab a pikakabat ed Kasulatan tan aralem a respeto ed maptek iran prinsipyo. (Uliran 1:5; 11:14; 13:20) Sano posibli, mangigana na panaon pian dalepdepen iray prinsipyon nasasaglawi tan ed amin ya impormasyon ya asukimat mo. Sano natalosan mo laray bengatla unong ed liwawa na Salita nen Jehova, maseguron say suston desisyon so lalon nipabitar.—Filipos 4:6, 7.
mwbr23.03—it-2 768 ¶1
Rehoboam
Lapud mapaatagey tan maruksa si Rehoboam, inmarawi so liknaan na dakel ya totoo ed sikato. Saray tribu na Juda tan Benjamin labat so tuloytuloy ya sinmuporta ed sikato, sinuportaan met na saray saserdote tan saray Levita na duaran panarian, tan walay pigaran indibidual manlapud samploran tribu ya sinmuporta met ed sikato.—1Ar 12:16, 17; 2Aw 10:16, 17; 11:13, 14, 16.
Saray Espiritual a Kayamanan
mwbr23.03—it-1 966-967
Singa Kanding a Demonyo
Nanengneng ed saray imbaga nen Josue diad Josue 24:14 ya naimpluensyaan iray Israelita na palson panagdayew na Ehipto nen nanayam ira diman, tan nanengneng ed saray imbaga nen Ezequiel ya tuloytuloy da ni itan ya ginawa diad andukey a panaon. (Eze 23:8, 21) Lapud satan, ikokonsidera na saray iskolar imay ganggan na Dios ya inter ed kalawakan pian pigilan iray Israelita ya “mangiyapay na saray bagat ed saray singa-kanding a demonyo” (Le 17:1-7) tan samay impanuro nen Jeroboam na saray saserdote “parad saray atagey a pasen, parad saray singa-kanding a demonyo, tan parad saray kilaw a baka a ginawa to” (2Aw 11:15) ya prueba ya wala ray Israelitan nandayew ed kanding ya singa gagawaen ed Ehipto, lalo lad Ehipto Diad Bandad Leksab. Ibabaga nen Herodotus (II, 46) ya diad satan ya klase na panagdayew ed Ehipto so angaligan na saray Griego ed pananisia da ed si Pan tan ed saray satyr—saraya et imoral ya dirios na katakelan ya sinmabi panaon et inyilustra ya wala ray saklor da, ikol na kanding, tan sali na kanding. Wala ray mangibabaga ya sarayan kapalduan-ayep-kapalduan-too ya itsura na saray paganon dirios so rason no akin ya kaslakan et iyiilustra si Satanas ya walaay ikol, saklor, tan pisag so kuko to ed sali, atan so apasalan na saramay mangibabagan Kristiano legan na Dark Ages.
Balet ag-abitla no anton talaga iratay “mabago” (seʽi·rimʹ). Anggaman ibabaga na arum ya literal ya kanding iratan odino idolo ya say itsura da et kanding, singa anggapo met so ontan ya direktan ipapasabi na satan; tan anggapo met so ebidensya ed arum ya teksto. Nayarin labay labat ya ipasabi na sayan termino ya diad isip na saramay mandadayew ed saratan et singa kanding so itsura na saratan ya palson dirios tan mabago ira. Odino, say impangusar na salitan “kanding” ed sarayan teksto et paraan labat pian ibalikas so pandimla ed amin ya uusaren ed panagdayew ed saray idolo, no panon ya say salita parad idolo ed dakel ya teksto et inalad termino ya say orihinal ya kabaliksan to et “angkekelag ya malimpek ya tai na ayep,” pero agto labay ya ibagan literal ya gawad tai na ayep iray idolo.—Le 26:30; De 29:17.
MAGMALIW YA EPEKTIBO ED MINISTERYO
Saray Personal a Desisyon tan Pamaakaran na Konsiensia
Sano tepeten na iyaaralan na Biblia odino kapananisiaan no anto so nepeg ton gawaen ed sakey ya espesipikon situasyon, panon so nepeg mon iyebat? Nayarin antam no anto so personal mon gawaen. Balet balang sakey a too so nepeg a manakbat ed responsabilidad ed saray dilin desisyon to ed bilay. (Gal. 6:5) Impaliwawa nen apostol Pablo ya impaseseg to so “katutulok panamegley na pananisia” ed totoon pinulongan to. (Roma 16:26, NW) Satan so maabig ya ehemplon tumboken tayo. Say sakey a toon mandesisyon pian paliketen labat so manbabangat ed sikato na Biblia odino sananey a too et manlilingkor ed totoo, aliwan manbibilay unong ed pananisia. (Gal. 1:10) Kanian say simple, direktan ebat so nayarin agmakagunggonan tuloy ed samay sakey a mantetepet.
Panon, sirin, so nayarin iyebat mo ed paraan a mitukoyan ed saray pananontonan na Biblia? Nayarin ipaimanom iray matukoy a prinsipyo na Biblia tan saray ehemplon wala ed kuritan na Biblia. Diad arum a kipapasen, nayarin ipanengneng mo ed sikato no panon so pansukimat ta pian naromog ton mismo iratan a prinsipyo tan ehemplo. Nayarian mo ni ingen ya isingbat iray prinsipyo tan say kablian na saray ehemplo balet ta ag-iratan iyaaplika ed walan kipapasen. Tepetan so too no kasin wala ed saratan so bengatlan nayarin ontulong ed sikaton makabat a makapandesisyon. Sikato so pasesegen mon mangonsidera unong ed liwawa na sarayan prinsipyo tan ehemplo ed no anton kurang so makapaliket ed si Jehova. Diad ontan et sikato so tutulongan mon ‘mangipasal ed saray dilin pakayari ton manebek a mangibiig ed maong tan mauges.’—Heb. 5:14.
ABRIL 24-30
KAYAMANAN ED SALITA NA DIOS | 2 AWARAN 13-16
“Mantiwala ed si Jehova—Kapigan?”
Sikayo ran Kabataan ya Brother —Antoy Gawaen Yo Pian Pantiwalaan Kayo ed Kongregasyon?
12 Nen kabataan ni Arin Asa, sikatoy mapaabeba tan makpel. Singa bilang, nen inatey so ama ton si Abias tan sikato lay sinmublay ya ari, nansagpotan ton deralen so amin ya idolo ed Juda. Imbaga to met ed saray taga Juda ya “anapen day Jehova a Dios na inmuunan atateng da tan unoren da so Ganggan.” (2 Awa. 14:1-7) Tan nen nilusob nen Zera so Juda ya kaiba toy 1,000,000 ya sundalo na Etiopia, kinmerew na tulong si Asa ed si Jehova. Impikasi to: “O Jehova, ag-importantid sika no kasin saramay tutulongan mo et dakel odino andiay pakayari. Tulongan mo kami, O Jehova a Dios mi, ta manmamatalek kami ed sika.” Nanengneng ed sayan impapuson pikakasi nen Asa ya baleg so tiwala tod si Jehova ya iliktar to ra. Lapud nantiwala si Asa ed Ama tod tawen, “tinalo nen Jehova iray Etiope.”— 2 Awa. 14:8-12.
Sikayo ran Kabataan ya Brother —Antoy Gawaen Yo Pian Pantiwalaan Kayo ed Kongregasyon?
13 Seguradon aprobleman maong si Arin Asa nen walay 1,000,000 ya sundalon linmusob. Balet lapud nantiwala ed si Jehova, analo ira. Makapaermen balet ta nen kapigan mas melag so problema to, agla nantiwalad si Jehova. Nen plano nen Arin Baasa na Israel ya lusoben so Juda, say kinerewan nen Arin Asa na tulong et say ari na Sirya, imbes ya si Jehova. Aliwa laingen so nansumpalan na desisyon to! Panamegley nen propetan Hanani, imbaga nen Jehova ed si Asa: “Lapud nanmatalek ka ed ari na Sirya tan agka nanmatalek ed si Jehova a Dios mo, say armada na ari na Sirya et akablos ed limam.” Manlapu lad saman, naynay ya walay migi-guerra ed si Asa. (2 Awa. 16:7, 9; 1 Ara. 15:32) Antoy naaralan tayod saya?
Sikayo ran Kabataan ya Brother—Antoy Gawaen Yo Pian Pantiwalaan Kayo ed Kongregasyon?
14 Agkomon ombabaleg so ulom tan naynay kan mantiwala ed si Jehova. Nen nampabautismo ka, impanengneng mo ya mabiskeg so pananisiam tan baleg so tiwalam ed sikato. Malikeliket si Jehova ed satan ya desisyon mo kanian in-welcome to ka ed pamilya to. Baleg itan ya pribilehyo. Importante sirin ya naynay kan mantiwala ed si Jehova. Ompan si Jehova so naisip mon tampol ya kerewan na tulong no walay importantin desisyonan mo. Panon to balet iramay angkelag ya bagay ey? Komon ta ipanengneng mo ya mantitiwala kad si Jehova ed amin ya desisyon mo, singa diad pampilim na libangan, trabaho, tan no anto ray planom ed bilay. Agka masyadon bilib ed sarilim. Mas maabig no amtaen mo iray prinsipyo na Biblia ya makatulong ed pandesisyon mo tan iyaplikam iratan. (Pro. 3:5, 6) No ontan so gawaen mo, napaliket moy Jehova tan naalam so respeto na saray agagi ed kongregasyon.—Basaen so 1 Timoteo 4:12.
Saray Espiritual a Kayamanan
Lingkoran si Jehova Diad Interon Puso!
7 Sarag na kada sakey ed sikatayo ya usisaen no kasin say puso tayo et talagan matoor ed Dios. Tepetay sarilim, ‘Kasin desidido ak ya paliketen si Jehova, idepensay dugan panagdayew, tan protektaay totoo to ed mauges iran impluensya?’ Isip mo pay impanpakpel nen Asa pian naekal toy Maaca ya “reyna” na bansa! Ompan anggapo met so kabat mon singa si Maaca, balet nayarin wala ray situasyon ya sarag mon aligey seseg nen Asa. Singa bilang, antoy gawaen mo no walay kapamilyam o maapit ya kaarom a nankasalanan balet agmagbabawi, kanian adispelo? Kasin desidido kan agmo la piulopan? Anto kasi idikta na pusom ya gawaen?