Pinerdona To ray Kasalanan ya Agawad Apalabas

Say rason no akin ya peperdonaen nen Jehova so kasalanan tayo et lapud imbayar nen Jesus so dala to bilang dondon. (Efe. 1:7) Pero oniay ibabaga na Biblia: “Diad pantetepel [na Dios] et peperdonaen to ray kasalanan ya agawad apalabas.” (Roma 3:25) Ontutukoy iya ed samay panaon antis nin abayaran nen Jesus so dondon. Akin et sarag nen Jehova ya perdonaen iray kasalanan anggano agni abayaran so dondon? Kasin napatnagay hustisya ed satan?

Diad pakanengneng nen Jehova, singa la abayaran so dondon nen im-promise to ya walay “ilalak” ya mangibulos ed saray totoo ed kasalanan. (Gen. 3:15; 22:18) Talagan segurado so Dios ya diad inyeskedyul ton panaon et mabulos ya bayaran na alenleneg ya Anak to so dondon. (Gal. 4:4; Heb. 10:7-10) Diad tua, nen wadiad dalin si Jesus, sikatoy inikdan la nen Jehova na autoridad ya mamerdona anggano agni abayaran so dondon. Pinerdona nen Jesus so kasalanan na saramay angipanengneng na pananisia ta sikatoy segurado ya say pangibagat tod bilay to so mansakbong ed kasalanan da.​—Mat. 9:2-6.